Matewus 24
24
Ɓliki-n'edi na wiini tempel gaini wazagai zi siŋki wuzani dibiɗi yai
Mark. 13.1-23; Luk. 21.5-24
1Yesu a niya anene warni tempel par, a hala edi. “Daini zi hitri e hilisi sini buri e siŋkini dalamni tempel paŋ. 2Amma a waya seŋ a miɗiɗi, ki tili hanɗa paŋ kai ɗi? Jre, mu miɗiki, woni ahi-fuŋ ktai n'aga a hina gai tiki miɗini ahi-fuŋ na zamai n'aga a haɗa azumai kai, aŋ kai. 3Won hlai n'a sumna amai midiɗi huwuŋ zi luwuŋ olive, ɗaini zi hitri e hilisi sini war ŋoyai e miɗini, miɗiyi haw, wazagai hanɗa aga a za kaswata ɗa? Siŋki na maɵa ɗa aga a za miɗini giziku gaini dibiɗi yai?
Wazagai n'a siŋka miɗini giziɗi yai
Mark. 13.5-13; Luk. 21.8-19
4Yesu a waya seŋ a miɗiɗi: ki zi hangal, kapai ɗif a wuliki edi kai. 5Buri viya aga e hilisi war yikiŋa aŋ miɗi, ta mu Kristu, nagai aga e wuli ɗai viya edi lai. 6Aga ki ɵini gaw gaini labarni gaw, ki zi hangal kapai hunai te yimiki kai. Buri gaini dewele hanɗa aga a za amma hlai zi dibi a za kai hai. 7Buri ɗai na midini afti ktai aga e fiki amai siɗi ɗai na midini afti zamai, pai midiɗi pai lai, wiyamai aga te za, afti aga a ziriya war hlai zamai zamai 8Amma hanɗa paŋ a pin gir zi tiki. 9Won hlai ni aga e siki edi min gir, aga e fiɗiki edi lai. Pinzibaɗi ɗai paŋ aga e bili gaw siki burini yikiŋa. 10Won hlai ni ɗai viya aga e hini yimi edi, aga e zi tege piɗi marɗi, aga e bili gaw siɗi marɗi. 11Ɗai na min-Alaw na jrekai-kai aga e fiki amai, aga e wûli ɗai viya edi. 12Wala n'a za woɗi futini ɗikat kai aga a riya amai, buri nɵa diri na warɗi ɗai viya aga a ɵaɗa. 13Amma ni n'a siika pin yimi haa hlai zi dibi, ni aga a kora. 14Labar zi firiyi na wiiɗi pai aga a ɓaka midiɗi yai paŋ, kapai pinzibaɗi ɗai paŋ, e ɵini seŋ hanɗa. Asakal hanɗa, hlai zi dibi aga a halasi. 15Buri nɵa, won hlai na ki tili hihir na wiini ɓilki-n'edi na ɗif na min Alaw Daniyel a muɗa miɗini, a ɗiya midini hlai na sɗik, ni n'a tala ɗû hanɗa aga a za hangal, kapai a ɵina ezini edi. 16Won hlai ni, nagai n'e ɗa war Yudiya aga e rûvi siɗi huwuŋ. 17Ni n'a na amai midini dalam aga a niya azumai aŋ mula wazagai warni dalamni par kai, 18ni n'a edi war vowai, aga a waya buri a mula dawrani kai. 19Haw buriɗi falakai n'e ziyi gaiɗi nagai n'e si fiyaw wiiɗi aliyagoi na koɗokokai war mefeŋ hanɗa. 20Amma ki siiwi buri ruviki aga a za amsai kai, war Sabbat kaalai. 21Buri won hlai ni gir aga a za, war piɗi yai zi tiki par haa tiyana gir n'abai maini nɵa a za kai, aga a za pra kaalai. 22Mefeŋ hanɗa a ɗukla fu gulai kai ɗa, ɗif a kora kai zaŋ, amma buriɗi zi viri n'edi, hanɗa aga a ɗukla gulai. 23Na ɓa ɗif a halasi aŋ miɗi ɓa Kristu an na, zaw aŋsi na ɗi, ki yimi hanɗa kai. 24Kristukai na jrekai-kai gaiɗi ɗai na min Alaw na jrekai-kai e fiki amai aŋ zi wazagai zi siŋki n'abakai gaini wazagai zi hiila, haa zi viri n'edi tekeɗeɗi e diri e wuliɗi edi, na ɓa wala hanɗa a sida aŋ za nɵa. 25Tili, mu miɗiki hanɗa avut. 26Na ɓa e miɗiki ɓa, a na edi war basga na kaɗataŋ, ki hili woni kai, zaw ɓa a na amlai war dalam, ki yimi hanɗa kai. 27Buri maini wildi n'a wulda piɗi futi na dawai-par par a ŋala haa piɗi futi na koskoi, gizini Ahini ɗif aga a za nɵa lai. 28Woɗi paŋ na kopoŋ a na, woni bagasakai aga a tapa.
Gisini Ahini ɗif
Mark. 13.24-31; Luk. 21.25-33
29Amma safai agwi asakal ni gir na wiini mefeŋ zi gir hanɗa par, futi aga te bunda gegeŋ, tile aga a za gaglaini kai, meeɵek aga a yakasi azumai war hlai n'amai par, gadaŋni n'amai aga a jiriya. 30Won hlai ni, siŋki na wiini Ahini ɗif aga a siŋka sini edi war hlai n'amai, won hlai ni pinzibaɗi ɗai na midiɗi yai paŋ aga e tûwi, nagai aga e tili Ahini ɗif a halasi war ɗugul, war hlai n'amai par gaini spak gaiɗi abai. 31Aga a ɵiniɗi ɗaini zi ɵeŋ na war fuŋ-n'Alaw edi gaini wulani hum n'a wa gara, aga e tipiɗisi zi viri n'edi, na war koŋɗi yai na puɗu paŋ par, war min dibini hlai n'amai ktai par haa sin min dibini na zamai. 32Ki hitri seŋ zi siŋka maini sin luwuŋ Fige par. Won hlai na fiyaw a cosi warni graŋni, sugoini a goɗa lai, ki siɗi ɓa piya te na gobi. 33Tiki nɵa lai, won hlai na ki tili wazagai hanɗa paŋ, aga ki siɗi ni a na gobi wuzani min hlai. 34Jre, mu miɗiki, pinziba na hanɗa aga a vada edi kai haa wazagai hanɗa paŋ a za li. 35hlai n'amai gaiɗi yai lai aga a vada edi, amma seŋ na wiya aga a vada edi kai zaŋ.
Mefeŋ gaini ler hanɗa, ɗif a sɗaŋ kai
Mark. 13.32-37; Luk. 17.26-36; 21.34-36
36Amma mefeŋ hanɗa gaini ler hanɗa ɗif a sɗaŋ kai, ɗai zi ɵeŋ na war fuŋ-n'Alaw e siɗiŋ kai, Ahi lai a siɗaŋ kaalai, amma a Api ni kiini ktai. 37Amma maini a za war mefeŋ na wiini Nowa nɵa, gizini Ahini ɗif aga a za nɵa lai. 38Buri maini mefeŋ na wuzani yem zi niɓi n'abai, e simi, e ci, e tiki falai e si aŋ tiki, haa sin mefeŋ na Nowa a niya warni arken. 39E siɗi walakai ha yem zi niɓi a halasi a miliɗi paŋ. Gizini Ahini ɗif aga a za nɵa lai. 40Ɗai sulu aga e simni edi war vowai ktai aga a tika edi, na zamai aga a hina. 41Falakai sulu e siri midiɗi funi, ktai aga te tika edi, ktai aga te hina 42Buri nɵa ki simni karki, buri tiki ki siɗi mefeŋ n'Epiɗ-ɗaiki aga a halasi woni kai. 43Amma hanɗa aga ki siɗi; na ɓa epin-dalam a sɗa ler zi giɗimi na duvuk na mihill a halasi warni ɗa, aga a sumna karni a jiɓira, a hina ɗif a niya warni dalamni kai. 44Buri nɵa ki simni gaini zizini buri Ahini ɗif aga a halasi war ler na ki hiini midini kai.
Ɗai zi sida na jrekai gaiɗi na jrekai-kai
Luk. 12.41-48
45Ɗif zi sɗa na jre na hangal, n'epin-gezani a tikaŋ midiɗi ɗai n'ahani buri a siɗi simiɗi woɗi futini, ni asiya ɗa? 46Ɵeɗ midini ɗif zi sɗa n'epin-gezani a navaŋ aŋ za nɵa, won n'a halasi. 47Jre, mu miɗiki, aga a tikaŋ amai midini wazagaini paŋ. 48Amma na ɓa ɗif zi sida na meefeŋ n'a hiina warɗi agulni ɓa, epingesa aga a halasi gop kai. 49Nɵa a tika pini a ɵiɓiɗi marni zi sda, a suma a sa gaiɗi ɗai zi ci suwul lai, 50hlai n'epin-gezani ɗif zi sida hanɗa aga a halasi war mefeŋ n'a bayaŋ kai, war ler n'a sɗaŋ kaalai, 51aga a ɗuklaŋ edi, a sini bri na wiini gaiɗi ɗai zi rhai. Woni tuwi gaini hirɗini sesiyeŋ aga a za.
Currently Selected:
Matewus 24: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
