Matewus 23
23
Yesu a muɗa haw midiɗi ɗai zi ɗû wazagai gaiɗi Farisekai
Mark. 12.37-40; Luk. 11.39-52; 20.45-47
1Yesu a ɓaka seŋ sin firiɗi ɗai, siɗi ɗaini zi hitri lai, a muɗa: 2ɗai zi ɗû wazagai gaiɗi Farisekai e simni warɗi Paramai na wiini Musus, 3buri nɵa aga ki zi wazagai paŋ n'e gidiki gaini, amma ki zi pin sdaɗi kai. Buri e miɗi gaini miɗi, amma e ziŋ kai. 4E niggi jak n'abakai n'a luba gaini gir, e tikiŋ amai midini kerpeɵɗi ɗai, amma gaini midiɗi dama e titimiŋ gaini ahi-tiɗi kai. 5Amma sidaɗi paŋ e ziŋ ɗa arɗi ɗai, Buri e zizini wazagai n'abakai n'e ɗû haga warni, n'e niggiŋ miɗini arɗi zaw wulani tiɗi gaini vara na mogo kai min sapaɗi. 6E diri hlai zi simni n'edi avut warɗi fet, e diri Paramai n'edi avut warni sinagogne lai. 7E diri ɵiɓini wuti war kosko, e diri ɓa ɗai e yikiɗi ɓa Rabbi lai. 8Amma aga ki hini ɗif a yikiki Rabbi kai, buri Api-zi-hitri na wiiki a ktai, Kristu, amma tiki paŋ ki ɗi tawalakai. 9Aga ki yiki ɗif na midiɗi yai aŋ epiki kai, buri Epiki a ktai, ni n'a na war fuŋ-n'Alaw. 10Aga ki hini ɗif a yikiki Api-zi-hitri kaalai, buri Api-zi-hitri na wiiki a ktai, a Kristu. 11Amma n'abai arbaki aga a za aŋ ɗif n'a zina piki. 12Buri asiya ɗi paŋ n'a kola sini amai, aga a hosa azumai, amma a siya ɗi paŋ n'a hosa sini azumai, aga a kola amai. 13Amma haw buriki, tiki ɗai zi ɗû wazagai gaiki tiki Farisekai, tiki zi rhai, tiki ki dûgûti paini fuŋ-n'Alaw buriɗi ɗai. Tiki dama jaaki buri ki niyi warɗi kai, nagai n'e piyi aŋ niyi ɗa, ki hiniɗi aŋ niyi kaalai. 14Haw buriki, tiki ɗai zi ɗû wazagai gaiki tiki Farisekai, tiki zi rhai. Tiki ki simiɗi falakai na war greŋ, ki siiwi siiwa na mogo pin arai, buri nɵa aga ki nivi kûɗi-sariya na goma n'a suwa. 15Haw buriki, tiki ɗai zi ɗû wazagai gaiki tiki Farisekai, tiki zi rhai, buri tiki ki piyi amai anene kata duɓani yem-ra-n'abai, ki piyi midini afti lai aŋ bindi ɗif ktai aŋ tapa piki. Won hlai n'a bunda li, ki bindiŋ aŋ ahiɗi avai-z'afu, meefeŋni azi sulu a suwa meefeŋ na wiiki tiki. 16Haw buriki, tiki zi ɵi wuze na malvanai na ki miɗi na ɓa ɗif a ha wala mini gaini tempel ɗa, a za wala kai, amma ni n'a ha wala mini gaini or na wiini tempel, ni aga a pulta kai. 17Tiki zi dûûli na malvanai. N'abai a suwa a na wata ɗa, a or ɗa zaw, a tempel n'a bunda or aŋ sɗik ɗi? 18Na ɓa ɗif a ha mini gaini gûwiŋ zi ɓaka, a za wala kai, amma ni n'a ha mini gaini wala zi ɓaka n'a na midini hlai zi ɓaka ɗa, a kiɗa a pulta kai. 19Tiki na malvanai, n'abai n'a suwa a ma ɗa, wala zi ɓaka zaw gûwiŋ zi ɓaka n'a bunda ɓaka aŋ sɗik ɗi? 20Buri nɵa, ni n'a ha mini gaini gûwiŋ zi ɓaka ɗa, a ha mini na ɗa gaini, gaini wazagai n'a na warni paŋ lai. 21Ni n'a ha mini gaini tempel, a ha mini gaini, gaini ni n'a sumna warni lai. 22Ni n'a ha mini gaini fuŋ-n'Alaw ɗa a ha mini gaiɗi paramaini Alaw gaini ni n'a sumna warɗi lai. 23Haw buriki, tiki ɗai zi ɗû wazagai gaiki tiki Farisekai, tiki zi rhai, ki si doogoni mante gaini anet gaini kumin, amma ki hini wala n'a na abai a suwa n'aŋ war seŋ zi gadai maini jre, gaini yum gaini yimi ɵa edi. Hanɗa a wazagai n'aga ki ziŋ, na zamai zamai ɗa a hina edi kaalai. 24Tiki zi ɵi wuze na malvanai, ki yûri avili edi, amma ki rɓi ɵigini. 25Haw buriki, tiki ɗai zi ɗû wazagai gaiki tiki Farisekai, zi rhai, tiki ki mi duɓaɗi feŋkiya gaini tasa edi, amma warni a va gaini wazagai zi hill gaini wazagai zi dulam. 26Tuku Farise na melveŋ, ma warɗi feŋkiya gaini tasa edi avut, kapai duɓani a siɗa aŋ bunda hilu lai. 27Haw buriki, tiki ɗai zi ɗû wazagai gaiki tiki Farisekai, si rhai, tiki ki ɗa maini yeɵ na gaini ɵirɓi muɗukwi, na duɓani pɗem gara, amma warni a va gaini keɵkeɗi ɗai zi mri, gaini wazagai na haharai paŋ. 28Maini nɵa, tiki lai, ki zi siki jrekai arɗi ɗai, amma warki a va gaini rhai gaini wala na war futini ɗikat kai. 29Haw buriki, tiki ɗai zi ɗû wazagai gaiki tiki Farisekai, ki rgi yeɵɗi ɗai na min Alaw, ki zizini yeɵɗi ɗai na jrekai pɗem lai, 30ki miɗi, ɓa tiyi mi ɗi fu war mefeŋɗi tamaiyi ɗa, aga mi tipi ktai gaiɗi aŋ ma felɗi ɗai na min Alaw edi kai. 31Nɵa ki zi zaida midiki dama na ɗa ɓa tiki ki ɗi aliɗi nagai n'e fiɗiɗi ɗai na min Alaw ɗa. 32Tiki lai ki vi amai daramɗi tamaiki. 33Tiki wala meefeŋ, pinsibani hibe, aga ki pri edi min kûɗi-sariya na wiiɗi avai-z'afu maɵa maɵa ɗa? 34Buri nɵa, tili, mu siki ɗai na min Alaw gaiɗi ɗai na yalakai gaiɗi ɗai zi ɗû wazagai, zamai arbaɗi aga ki fiɗiɗi edi, na zamai aga ki tûkûɗi amai sin luwuŋ zi dagra, zamai arbaɗi aga ki ɵûɗi siɗi edi warni sinagogneɗi, aga ki ziɗi gir, aga ki ɵimiɗi war fuŋ-fuŋ. 35Kapai felɗi ɗai na jre-ɗikat paŋ n'a ma edi midiɗi yai aga a kɵasi midiki, sini felni Abel na jre-ɗikat par ha felni Sakariyas, ahini Berekiya, na ki fiɗiŋ edi arbani tempel garni hlai zi ɓaka. 36Jre, mu miɗiki, wazagai hanɗa paŋ aga a halasi miɗini pinziba hanɗa.
Yesu a tuwa midiɗi Yeruzalem
Luk. 13.34-35
37Yeruzalem. Yeruzalem, tuku na ku fiɗiɗi ɗai na min Alaw edi, na ku ɵiŋkiɗi gaini kriyit nagai n'e ɵiniɗisi suku lai. Azi viya mu firiya mu tipiɗi aliku maiɗi yuguri na te tapa aliɗi na kuɗu-kuɗu azumai pin baadaɗi nɵa, amma ki diri kai. 38Buri nɵa, dalamki aga a hina edi aŋ greŋ. 39Buri mu miɗiki, tiki aga ki tiliŋa kir kai, haa won hlai n'aga ki miɗi, kol sini ni n'a halasi war yikini Epiɗ-ɗai.
Currently Selected:
Matewus 23: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
