Matewus 25
25
Seŋ zi siŋka maini midiɗi ɓulamakai na doogo
1Won hlai ni, paini fuŋ-n'Alaw te na maiɗi ɓulamakai doogo, n'e mili lampaɗi e hili aŋ nivi gaini epiɗ-drai. 2Ɵim arbaɗi e ɗi tatalakai, ɵim e ɗi yalakai. 3Na tatalakai e mili lampa na wiiɗi, amma e tiki emel tiɗi kai. 4Amma na yalakai e mili lampa na wiiɗi, e piyi emel tiɗi ta lai. 5Amma won hlai n'epiɗ-drai aŋsi hai, gaini hlaiɗi e dûŋri e kili weseŋ. 6War duvuk n'abai ɗûûli a wa, tili, epiɗ-drai a na halasi, hili aŋ nivi gaini. 7Won hlai ni ɓulamakai paŋ e fiki amai, e zizini lampaɗi. 8Amma na tatalakai e miɗi wiiɗi na yalakai, ki siyi emel agwi, buri lampa na wiyi a na mra. 9Amma na yalakai e wiyi seŋ e miɗi, zaw kai, a kida buriyi gaiki tiki lai kai, marya ki hili siɗi ɗai zi cakala aŋ wûri buriki dama. 10Amma won hlai n'e hili edi buri e wûri, epiɗ-drai a halasi, nagai n'e ɗa gaini zizini, e niyi warni dalam zi fet na wiini tiki gaini, min hlai a doogo. 11Asakal par ɓulamakai na zamai e hilisi lai e miɗi, Epiɗ-ɗai, Epiɗ-ɗai, miliyi min hlai edi. 12Amma a wiyiɗi seŋ a muɗa, jre, mu miɗiki, mu siɗiki kai. 13Buri nɵa ki simni karki, buri tiki ki siɗi mefeŋ ni gaini ler hanɗa kai.
Seŋ zi siŋka maini miɗini talent
14Won hlai ni, paini fuŋni Alaw te na maini nɵa: ɗif ktai n'a hala morkoi midini afti na zamai, a yikiɗi ɗaini zi sɗa wuzani a siɗi faraini tiɗi. 15Ktai a sini talent ɵim, na zamai sulu, na zamai pra ktai, sin asiya asiya paŋ pin gdaŋni, nɵa a hala wiini. 16Ni n'a nava talent ɵim, a hala tar a cakala gaini, a nava talent na zamai ɵim pini. 17Nɵa lai ni n'a nava na sulu, a nava zamai pini sulu lai. 18Amma ni n'a nava ktai a hala edi a wuuda waŋ a ŋoya faraini epin-gezani arni afti. 19Mefeŋ yaw asakal par epingezaɗi ɗai si sɗa hanɗa a halasi. A yikiɗi buri a tala wazagaini n'a siŋɗi. 20Nɵa ni n'a nava talent ɵim a halasi a kasi talent na zamai ɵim, a muɗa: Api, tuku ku saŋa talent ɵim, tala, mu nava zamai pini ɵim lai. 21Epin-gezani a miɗini: Pɗem, tuku ku ɗif zi sɗa na pɗem, na jre, tuku ku za jre gaini n'agwi, aga mu tukuku midini wazagai na viya, ku niya war firiyi na wiini epin-gezaku. 22Nɵa ni n'a nava talent sulu a halasi lai a muɗa: Api, tuku ku saŋa talent sulu, mu nava na zamai pini sulu. 23Epin-gezani a miɗini: Pɗem, tuku ku ɗif zi sɗa na pɗem, na jre, tuku ku za jre gaini n'agwi aga mu tukuku midini wazagai na viya, ku niya war firiyi na wiini epin-gezaku. 24Amma ni n'a nava talent ktai a halasi lai a muɗa: Epin-geza, mu sɗa ya tuku ku ɗif na gdaŋ, na ku haɗa war hlai na ku bla kai, na ku tapa war hlai na ku suuɗa kai. 25Buri nɵa mu huna, mu hala edi mu ŋoya talent na wiiku arni afti, tala, walaku a na. 26Amma epin-gezani a waya seŋ a miɗini: Tuku ku ɗif zi sɗa na meefeŋ na faali, tuku ku sɗa ɓa mu haɗa war hlai na mu bla kai, mu tapa war hlai na mu suuɗa kai, 27buri nɵa ku sa faraiŋa tiɗi nagai n'e cikili kai buri ma ɗa, nɵa mu nava walaŋa na ɗa gaini yemni, won hlai na mu halasi. 28Buri nɵa tiki talent na ktai tini par, siŋni wiini ni na talent aŋ tini doogo ɗa. 29Buri asiya, asiya paŋ na wiini a na, aga a sa sini pra, aga a va amai. Amma ni na wiini aŋ kai, tini par aga a yimasi walani n'a na ɗa edi. 30Ɵiŋki ɗif zi sɗa n'a nafa wala kai ɗa anene war gegeŋ, woni tuwi gaini hirɗini sisiyeŋ aga a za.
Zamai gaini Ɓiki, zamai gaini tûûsi
31Won hlai n'Ahini ɗif aga a halasi warɗi abai na wiini gaiɗi ɗai zi ɵeŋ na war fuŋni Alaw paŋ gaini, aga a sumna azumai warɗi Paramai zi abai na wiini, 32pinzibaɗi ɗai paŋ aga e tipi wuzani, aga a ɓûrwiɗi edi siɗi marɗi par maini ɗif zi giɗimi a ɓurwa arbani adumai gaini afkasai nɵa. 33Aga a ɗiya adumai war graŋni na wus, amma afkasai war graŋni na muni. 34Won hlai ni pai aga a miɗiɗi wiiɗi nagai na war graŋni na wus, hilisi na, tiki n'Apa a ɓikiki, ki mili aŋ bulum pai na te zizina buriki war piɗi yai zi tiki par. 35Buri mu na ka gaini wiyamai, ki siŋa simi; mu na ka sai, ki siŋa wala zi ci; 36mu na ka morkoi, ki yimiŋa siki, mu na ka ganala, ki wiiŋa sapa sa, mu na ka gaini veglek ki ɗûgûliŋa mu na ka warɗi daŋgai, ki hilisi sa. 37Won hlai ni ɗai na jrekai aga e wiyini seŋ aŋ miɗi: Epiɗ-ɗai, wata ɗa na mi tuluku gaiɗi wiyamai na mi suku simi kaswata ɗa? Zaw gaiɗi sai na mi suku wala zi ci kaswata ɗa? 38Mi tiluku morkoi mi yimuku siyi kaswata ɗa? Zaw ganala, mu wuku sapa kaswata ɗa? 39Won hlai na tiyi mi tuluku veglek, warɗi daŋgai lai, na mi hiliɗi suku kaswata ɗa? 40Pai aga a waya seŋ: Jre, mu miɗiki, wala ki ziŋ sini ktai arbaɗi tawalakaya n'agogoi hanɗa, hanɗa ki ziŋ sa ta. 41Won hlai ni aga a miɗiɗi wiiɗi nagai na war graŋni na muni lai ɓa: Ki yimi siki edi sa par, tiki na gaini tuusa, ki hili arni afu n'a vada kai, n'a zizina burini Mat gaiɗi ɗaini zi ɵeŋ. 42Buri mu na ka gaiɗi wiyamai, amma tiki ki siŋa simi kai; mu na ka gaiɗi sai, tiki ki siŋa wala zi ci kai; 43mu na ka morkoi, tiki ki yimiŋa siki kai; mu na ka ganala, ki wiŋa sapa kai; mu na ka veglek, warɗi daŋgai lai amma ki ɗûgûliŋa kai. 44Won hlai ni nagai lai aga e wiyini seŋ aŋ miɗi: Epiɗ-ɗai, won hlai na tiyi mi tuluku gaiɗi wiyamai zaw gaiɗi sai, zaw morkoi, zaw ganala zaw veglek zaw warɗi daŋgai, na mi zini puku kai kaswata ɗa? 45Won hlai ni aga a waya seŋ aŋ miɗiɗi: Jre, mu miɗiki, wala na ki ziŋ sin ktai arbaɗi n'agogoi na hanɗa kai ɗa, hanɗa ki ziŋ sa ta kaalai. 46Nagai aga e hili edi warni ŋiba n'a vada kai, amma nagai na jre-ɗikat war suŋfa n'a vada kai.
Currently Selected:
Matewus 25: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
