Matewus 19
19
Hitirini Yesu miɗini bidi-n'edi arbani wus gaiɗi muni
Mark. 10.1-12; Luk. 16.18
1Won hlai na Yesu a vada gaini seŋ zi miɗi ya, a fakasi a Galeliya par, a hala midini afti na Yudiya, anene kata duɓani Yurdan. 2Firiɗi ɗai viya a tapa pini, war hlai ni a zûûliɗi lai. 3Farisekai e hilisi sini e titimiŋ gaini seŋ e miɗi: ɗif a kiɗa a biditi munini edi burini seŋ na maɗi maɗi paŋ ɗi? 4A waya seŋ a muɗa: Ki tili war ɗû kai ɗi? Ni n'a rgiɗi war pi zi tiki, a rgiɗi wus gaiɗi muni. 5A muɗa: Buri nɵa wus aga a hina epini gaiɗi emini edi, a tapa gaiɗi munini, nagai na sulu hanɗa aga e bindi aŋ si ktai. 6Nɵa nagai e ɗa sulu kir kai, amma e ɗi si ktai, wala n'Alaw a tapaŋ tap ɗa, hina ɗif a ɓurwaŋ edi kai. 7E miɗini: Na ɓa ɵa ɗa, Musus a muɗa ɓa e siɗi maktuɓ zi bidi edi wiiɗi muni ɗaw, won hlai na mofaɗi a biditi li ɗa, buri maɗa? 8A miɗiɗi: Musus a siti futi aŋ bidi falakai burini hriŋ na wiiki, war pi zi tiki par a na fu ɵa kai. 9Amma mu miɗiki Ni n'a biditi munini, na ɓa burini maɵara kai, a tikiti muni na zamai ɗa, a za maɵara. 10Ɗaini zi hitri e miɗini: Na ɓa seŋ na wiini tiki n'arbani wus gaiɗi muni a na maini hanɗa nɵa ɗa, a pɗem ɓa ɗif a tika kai. 11A miɗiɗi: ɗai aga e ɵini ezini seŋ zi siŋka maini hanɗa paŋ kai, sai nagai n'a sa siɗi. 12Buri ɗai na kɓarai zamai e ɗa, n'e wisi ɵa, na zamai ɗa e ziɗi kɓarai e ɗi ɗai, na zamai e zi siɗi e ɗi nagai dama buriɗi paini fuŋ ni Alaw. Ni n'a kiɗa a ɵina ezini hanɗa aga a ɵinaŋ.
Yesu a ɓikiɗi aliyagoi n'agogoi
Mark. 10.13-16; Luk. 18.15-17
13Nɵa ɗai e kinisi aliyagoi na agogoi sini kapai a tikiti tini midiɗi, a siiwa buriɗi lai, amma ɗai zi hitri e ɓiriɗi. 14Amma Yesu a miɗiɗi: hiniɗi aliyagoi e hilisi, ki ɗiliɗi kai, buri paini fuŋ-n'Alaw te na buriɗi nagai n'e ɗa maiɗi nɵa. 15A tikiti tini midiɗi, a halaɗi woni par.
Yesu gaini gawla na faraini abai
Mark. 10.17-31; Luk. 13.30; 18.18-30
16Nɵa, ɗif ktai a halasi a zilbaŋ a muɗa: Api zi hitri, aga mu za na pɗem ɗa a ma ɗa, kapai mu nava suŋfa n'a vada kai ɗa? 17A wiyini seŋ: ku zilbaŋa miɗini wala na pɗem buri ma ɗa? Na pɗem a na ɗa ktai, na ɓa ku dara ku niya warni suŋfa ɗa, za pini seŋ zi gadai. A miɗini a na wata ɗa? 18Yesu a miɗini: ku ɵiɓa belek kai, ku za maɵara kai, ku hala wala kai, ku muɗa zaida z'eles kai, 19apuku gaiɗi amuku ku kûlûɗi amai, aga ku dara maiku maini suku ɵa lai. 20Gawla a miɗini: hanɗa paŋ mu za pini ya, n'a hina zamai ɗa a maɗa? 21Yesu a miɗini: na ɓa ku dara ku va amai aŋ pɗem ɗa, hala, wura wazagaiku n'a na ɗa paŋ edi, ku siŋɗi wiiɗi na murgakai; aga ku nava godai amai warni fuŋ-n'Alaw, asakal par ku halasi, ku tapa pa. 22Asakal na gawla a ɵina seŋ hanɗa, a hala war kwimi, buri faraini a na fu viya gara. 23Yesu a miɗiɗi wiiɗi ɗaini zi hitri: jre, mu miɗiki, a gir gara burini ɗif zi farai aŋ niya warɗi paini fuŋ-n'Alaw. 24Mu midiki pra: Ɵigini a niya warni baŋani lepre gop a suwa ɗif zi farai n'a niya aha warɗi pai n'Alaw. 25Won hlai na ɗai zi hitri e ɵini seŋ hanɗa, e bindi hiyak. E zilbi siɗi e miɗi: na ɓa nɵa ɗa aga a kora asiya ɗa? 26Yesu a tiliɗi a miɗiɗi: buriɗi ɗai ɗa a wala n'a sɗa aŋ za kai, amma burini Alaw wala n'a kiɗa a za kai aŋ kai. 27Nɵa Peter a miɗini: tiyi mi hinisi wazagaiyi paŋ edi, aŋ tikiti futi puku, aga mi zi wa sek lai ɗa? 28Yesu a miɗiɗi: jre, mu miɗiki, tiki na ki tikiti futi pa na ɗa, war wi na hehe ɗa, won hlai na Ahini ɗif a sumna li midiɗi paramaini zi pai, warɗi abaini ɗa, tiki lai aga ki simni midini Paramai zi pai doogo pi sulu lai aŋ ziti sariya wiini pinziba na doogo pi sulu na wiiɗi Izrayel. 29Asiya ɗi paŋ n'aga a hinasi dalamni edi, zaw tawalakaini na maɵagai zaw na falakai, zaw epini, zaw emini, zaw ali, zaw aftini buriya ɗa, aga a nava hanɗa azi miya, aga a nava suŋfa n'a vada kai aŋ bulum lai. 30N'avut viya aga e bindi aŋ n'asakal, n'asakal viya aga e bindi aŋ n'avut lai.
Currently Selected:
Matewus 19: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
