Matewus 20
20
Ɗai zi sɗa warni vowai zi vin
1Tili, Paini fuŋ-n'Alaw te na maini nɵa: Epini dalam ktai a niya anene gorof aŋ mula ɗai warn zardeŋ ni zi luwuŋ zi vin, 2a kata mini gaiɗi ɗai zi sɗa burini vrak na war yuvai, a kiɗi edi war zardeŋ zi luwuŋ zi vin. 3Won hlai na futi te yimasi amai li dai dai ɗa, a niya anene pra a niviɗi ɗai zi sɗa zamai war hlai na ɗai e tipi warni ta ta ɗa kadai ca ca, 4a miɗiɗi: Hili warni zardeŋ zi luwuŋ zi vin na wiya lai, aga mu siki na miɗini arcukki ɗa. 5E hili woni, girvudi sek ɗa, a hala aŋ paya ɗai pra, futi te ɵa wulaɗi edi ɗa a hala aŋ paya ɗai zamai pra. 6Gobi futi te nawa sek ɗa, a hala pra, a niviɗi na zamai ɗuk ɗuk, a miɗiɗi: ki yivi won na ca kadai, ki zi wala ktai kai ɗa buri maɗa? 7E wiyini seŋ e miɗi: buri ɗif n'a miliyi aŋ kai. A miɗiɗi, tiki lai hili war zardeŋ zi luwuŋ zi vin na wiya. 8Won hlai na futi te za li koskoi, epin-gezani zardeŋ zi luwuŋ zi vin ɗa, a miɗini wiini ɗif zi giɗimi wazagai na wiini: Yikiɗisi ɗai zi sɗa ɗa, virgiɗi faraiɗi ɗa, ku tikasi puku siɗi ɗai na asakal ɗa par, ku vada gaiɗi nagai n'e tiki piɗi avut ɗa. 9Nagai n'a miliɗi futi gobi te nawa sek ɗa, ɗif paŋ a nava vrak na burini sɗa na war yuvai ɗaw ta ta. 10Nagai n'e tiki piɗi gorof e hilisi, e hiini ɓa aga e nivi a suwa ɗi, amma nagai lai ɗif a nava a vrak na burini sɗa na war yuvai ɗaw ɵa lai. 11Won hlai na e nivi hanɗa, e tiki piɗi e ŋûriyi sini epini dalam, e miɗi: 12Nagai n'e hilisi asakal ɗa e zi sɗa burini ler ɗaw kadai, amma ku kitiɗi gaiyi tiyi na mi yivi warni kayai, arni futi lai, kal kal maɵa maɵa ɗa? 13A waya seŋ wiini ktai arbaɗi, a muɗa: Marmaya, mu zuku meefeŋ kai koo, mu kutumu mumu ɓa: mu suku ɗa a vrak na burini sɗa na war yuvai ɗaw, a na ɵa kai ɗi? Yima vrakku. 14Hala walaku, mu firiya mu sini wiini n'asakal maini na wiiku ɵa lai. 15Mu kiɗa mu za gaini faraiŋa maini na mu firiya ɵa kai ɗi? Zaw mu za pɗem ɗa arku meefeŋ ɗi? 16Nɵa n'asakal aga e bindi aŋ n'avut, n'avut ɗa aŋ n'asakal lai.
Yesu a muɗa edi ezini n'ag'aŋ hu miɗini mrini gaini ɵiyini n'amai
Mark. 10.32-34; Luk. 18.31-34
17Hlai na Yesu a na war hilini n'amai a Yeruzalem sek, a yimiɗi ɗaini zi hitri na doogo pi sulu edi kiiɗi, a miɗiɗi: 18tili, mu ɗumu aŋ hulumu amai a Yeruzalem, Ahini ɗif aga a sa edi tiɗi paakai n'abakai zi ɓaka gaiɗi ɗai zi ɗû wazagai, aga e kûti sariya zi mri miɗini lai. 19Aga e siŋ edi tiɗi pinziba na zamai, buri e zini yewere, e ɵiɓiŋ, e tûkûŋ sini luwuŋ zi dagra lai. Amma war mefeŋ n'ag'aŋ hu aga a ɵiya amai.
Siiwa na wiiɗi emini Yakob gaini Yohana
Mark. 10.35-41
20Won hlai ni emiɗi alini Sebedewus te halasi sini gaiɗi aliɗi, te hurga azumai wuzani aŋ zilbaŋ burini wala ktai. 21A miɗiɗi: ku firiya ɗa a maɗa? Te miɗini: ku sa futi ɓa, aliya na sulu na e ɗi na ɗa, ktai a sumna war graŋku na wus par, na ktai na graŋku na muni par lai, warɗi paiku ɗa. 22Yesu a wiyiɗi seŋ a muɗa: Wala na ki zilbiŋ na ɗa, ki sɗiŋ tiɓ? Ki kiɗi aŋ citi kup zi gir n'aga mu citi ɗa ɗi? E miɗini mi kiɗi ya. 23A miɗiɗi: A futini, kup na wiya zi gir ɗa, ki kiɗi ki citi, amma burini simni na war graŋŋa na wus par, zaw war na muni ɗi, mu saŋ ɗa mu ta kai, hanɗa a na buriɗi nagai n'Apa a zizinaŋ buriɗi ɗa.
Mark. 10.42-44; Luk. 22.24-27
24Won hlai na nagai na doogo, e ɵini hanɗa, e tiki piɗi aŋ zi hiy siɗi tawalakai na sulu ɗa. 25Amma Yesu a yikiɗi sini a muɗa: Ki siɗi ɓa paakai na midini afti ɗa, e ŋi spak midiɗi ɗai aŋ abakai, e ŋi gdaŋ miɗiɗi lai, 26arbaki aga a za nza kai. Amma ni n'a bunda aŋ abai arbaki ɗa, aga a za aŋ ɵeŋ na wiiki. 27Ni n'a dara a bunda aŋ n'avut arbaki aga a bunda aŋ ɵeŋ n'a zina piki. 28Ahini ɗif a halasi buri ɓa ɗif a za ɵeŋni kai, amma buri ni gaini midini dama aga a za aŋ ɵeŋ, buri a sa suŋfani edi aŋ vrak buri a bundasi ɗai viya.
Yesu a zuula ɗai na malvanai sulu a Yeriko
Mark. 10.46-52; Luk. 18.35-43
29Won hlai n'e niyisi edi warɗi Yeriko par fara n'abai a tapa pini. 30Nɵa, war hlai ni, ɗai na malvanai sulu e simni ɵimaɗi futi, e ɵini ɓa Yesu a na vuga, e ɗûûli e miɗi: Epiɗ-ɗai, Ahini David, ku hiina haw buriyi. 31Firiɗi ɗai e ɓiriɗi kapai e bi, amma e ɗûûli a suwa pra, e miɗi: Epiɗ-ɗai Ahini David, hiina haw buriyi. 32Yesu a ɗiya zaw, a yikiɗisi a muɗa: Ki diri mu za siki ɗa a maɗa? 33Nagai e miɗini, Epiɗ-ɗai, mi diri ɓa aryi a mala edi. 34Hiinini haw a yimaŋ, a tetema arɗi, tizaw tar arɗi a mala edi, e tipi pini lai.
Currently Selected:
Matewus 20: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
