Rom Teeb 12
12
Nirɔ nba sa tun Yennu toona biaŋinba
1Li paak, n naa waas, Yennu ninbatinu paake te ki n barimi ma yi jii i gbanant ki turɔ, ki lii tee mannu nba fo, kii waa ŋɔɔ kuukɔɔ, ki li sa maŋɔ; ŋanne tee Yenjiantu nan barmɔnii. 2I daa te ki i binbeŋ tee kaman nan tingbouŋ na niib binbeŋ na, ŋaan ŋaant ki Yennu-n lebit i dudukit nan barmɔnii, kii ŋamm i binbeŋ fanu; ŋanne ki i sa bann Yennu yanbɔɔt nba ŋan ki bia tee fanu ki gbenn.
3Yennu nba tinin ninbaauk na paake ki n yeen sɔɔ kur a sɔɔ daa dukii u par ni a u tee nijaann ki gar wa tee biaŋinba; ŋaan ŋaant ki sɔɔ kur-ii dukii ki bann yada nba ki Yennu turɔ na bikinu. 4Tɔn, nirɔ gbanant bɔkite, ki mɔk bont kur nan li toonn, ŋaan taan ki tee gbananyennkɔɔ. 5Li mun bia tee nnee nan ta yab bonchiann, ŋaan timm nan Masia lakin tee gbananyennkɔɔ, ki ti kura na gbanant taan ki tukin ki ji teen gbananyenn. 6Li paak, sɔɔ kur-n jii u piinii nba ki Yennu Seyeeŋ turɔ na ki tun biaŋinba ki Yennu turɔ yaak na. A piinii na-i tee fii sɔkint Yennu maan naie, li ŋan fan tun a yada biaŋ; 7ki a piinii na-i tee a somm leeb, li ŋan fan somm a leeb; li-i tee a teen wanntɔɔ, li ŋan fan wann leeb; 8li-i tee ki a kpaan a leeb kpaanii, fan tun nna; fin nba mun pi piinii, i tuun nna kaman nan burchimɔ na; wunba mun mɔk yaak niib paak, li ŋan wun tun yaak toonn maŋ bonŋann; ki wunba mun mɔk ninbatinu nan niib, li ŋan wuu mɔk ninbatinu nan parpeenn.
9Ŋaant ki loomm-ii tee barmɔnii loomm, ŋaan kii soor linba ŋan na fanu, ŋaan kii nân biit. 10I loon leeb man bonŋann kaman nan nirɔ nan u naa bik nba tuu loon leeb biaŋinba na, ki kot kii baakit leeb; 11kii tee nikakitii, ki daa tiin gbannyakiri, ŋaan kii tuun ti Yomdaanɔ toona nan i para kura, 12ŋaan kii mɔk parpeenn i dindann paak, kii mɔk mintir i fardinu sinsuuk ni, ŋaan kii mei Yennu yoo kur; 13ŋaan paat linba ki i mɔk na ki tur Yennu niib nba ki mɔki, ŋaan kii gaan saamm kii chantirib i ŋei ni.
14Binba mukisi, yin jiimm a “Yennu mɔsonŋann-ii be i paak.” Mɔmɔmm, yii jiimm nna, i daa teemm mɔpor gbaa. 15Wunba mɔk parpeenn, yii mun-ii mɔk parpeenn mun; ki wunba mun mɔk parbiir, yii mun-ii mɔk parbiir mun. 16Yii mɔk man dudukyennkɔɔ ki daa mɔk dontinmɔŋ; ŋaan kii saak toona nba ki mɔk dontinmɔŋi, ki daa dukii nan i mɔk ninyentiri.
17I daa tuun biit ki jiint biit paaki; kotir i mɔŋ kii tuun linba ki niib kur sa la ki li ŋan. 18Yii yabir i mɔŋ man kii mɔk parmaasir nan niib kur. 19N naa walonkai, i kpan daa tuun biit ki jiint biit paaki, ŋaan ŋaant ki Yennu-n pa pann maŋ ki dat bi tuba ki jiin. Li sɔb Yennu gbouŋ ni a ti Yomdaanɔ yet a “Min kuukɔɔe mɔk yaak nba ki sa dat niib tuba; mine sa jiin ki tun biit maŋ.” 20Yii tee kaman nan la sɔb Yennu gbouŋ ni a “A dataak-i mɔ kon, fan dinnɔ, nyunyukiru-i soorɔ, fan turɔ nyun wun nyu; a ki fi-i tee nna, a dintɔ feie.” 21Daa ŋaant ki biit-n nyannani, ŋaan jii toonŋana ki nyann biit.
Currently Selected:
Rom Teeb 12: BIM
Highlight
Share
Copy
Want to have your highlights saved across all your devices? Sign up or sign in