Rom Teeb 13
13
Ta sa sak yent damm mɔi biaŋinba
1Nirɔ kur-ii saak yent damm mɔi; kimaan sɔɔ ki mɔk u mɔŋ yikoo ki li ki nyii Yennu boori. Yennue te ki binba mɔk yikoo na mɔk yikoo. 2Wunba ki saak yent damm sennu na, li want nan u bia ki saak Yennu mɔbi; ki wunba kur tun nna, u baat nan tubdatue u mɔŋ paak. 3Binba tuun toonbiit nee tiin yent damm jaŋmaanii, ŋaan binba ki tuun toonbiiti, bi ki tiin yent damm jaŋmaanii. I-i kii loon yii tiin yent daanɔ, li ŋan yii tuun linba ŋan, ki wun paki; 4u tee Yennu toontunnɔe ki tuun linba ŋan ki teeni; ŋaan fi-i tuun toonbiit, fii tiinɔ, kimaan u mɔk yaak nba ki sa dat a tubir. U tee Yennu toontunnɔe ki see Yennu paak ki daar binba tuun toonbiit na tuba. 5Li paak, li kpaa talas ki a gaar yent damm mɔi, ki li ki tee a mantik tiin tubdatu na kuukɔɔ kaa, ŋaan a mi nan li tee linba ŋane. 6Li paake te ki ti pa lampo, kimaan Yennue senn yent damm na a yoo kur bin jiir ki dia tingbouŋ na bonŋann. 7Li paak, turimm linba tee bi yar; li-i jaŋ nan bin gaar niib lampo, amii linba ki a mɔk paak lampo, fan pa ki turib; li-i jaŋ nan ki a baak nirɔ, fan baakɔ; li-i biakii jaŋ nan fii tiin nirɔ, fan tinɔ.
Ta sii loon leeb biaŋinba
8Daa mɔk sɔɔ panni. Ya sii mɔk pann nba tee, yii loon man i leeb. Wunba loon u lɔɔ, li daanɔ gbeen Yennu sennu na kura. 9Yennu sennu na yet a “Daa chommi; daa kpi a lɔɔ; daa jaami; daa mɔk niauŋ a lɔɔ bont paaki;” ki senn-yena biar ki pukin linba na paak ki li kur taan ki yet a “I loon a lɔɔ kaman nan fa loon a mɔŋ biaŋinba na.” 10Ki fi-i loon a lɔɔ, a kan tun bonbiir ki turɔ; kimaan niib loommu tee Yennu sennu gbeenu.
11Yii tee nna man kimaan ya mi yoo na nba tee biaŋinba na. Yoo na baara ki i sa fiir i gɔɔn ni. Ti tinnu daar pera, ki ki fɔk kaman nan la din fɔk biaŋinba yoo nba ki ti din piin ki teen Yisa Masia yada na. 12Nyiɔk na bɔnn ki gaare, ki li ji loon lin yent. Li paak, ŋaant man ki tin nyik bunbɔnn ni toona nba tee toonbiit na, ŋaan jii tɔbtiat nba ki Yennu teent na. 13Ŋaant ki ti toona-ii yeen kaman nan niib nba tuu be yentu ni na, ki daa nyu daan ki yibi, ki daa tuun yuukpeensimi. Ti daa baa joona, ki daa tuun toonbiit booru booru, ki daa kɔn kunkɔna, ki daa mɔk funfuna nan leebi. 14Yii tee man kaman nan ti Yomdaanɔ Yisa Masia nba tee biaŋinba na, ŋaan nyik i gbanant loonbiit, ki daa dukii li po jiki.
Currently Selected:
Rom Teeb 13: BIM
Highlight
Share
Copy
Want to have your highlights saved across all your devices? Sign up or sign in