Rom Teeb 11
11
Yennu nba mɔk ninbatinu Israel teeb paak biaŋinba
1N loon ki n boi ki laan i dukii a Yennu nyik u mɔŋ niib Israel teeb amii? Aaii, u ki nyikibi kaa. N mɔŋ tee Israel nirɔe, ki tee Abraham yaaboonn, ki nyii Benjamin naakuuk ni. 2Yennu ki ŋaan u niib nba ki u dɔŋ gannib na. I mi la sɔb Yennu gbouŋ ni ki want Elaija nba din beer Yennu, Israel teeb biit po biaŋinba a 3“N Yomdaanɔ, bi kpii a sɔkiniinba kura, ki biir a binbinta na, a ki n kuukɔɔe biar, ki bi kor a bin kpin.” 4Yennu din jiin bia? Yennu din jiin a u mɔk niib tusa ŋannlore binba daa ki mi jiant patir Baal na. 5Li tee nnee mɔtana. Niib waaminnae daa be ki Yennu gannib u ninbatinu paak. 6Yennu-i gann niib, u ninbatinu paake ki u gannib, ki li ki tee bi tumu paak kaa. Yennu-i bo-i gann niib bi tumu paakie, u ninbatinu na bo kii tee barmɔnii ninbatinu kaa.
7Tɔn, li want nan Israel teeb ki la ba loon linba. Bi waaminnae ki Yennu gannib ki bi lar; ŋaan binba biar na teen tubkangbata damme. 8Li tee kaman nan la sɔb Yennu gbouŋ ni a “Bina nba gar ki tan tuu dinna, Yennu te ki bi yan lin, ki bi bia ki laati, ki bi tuba ki gbia.” 9Ki li ji sɔb Yennu gbouŋ ni a David yet a
“Yennu-n te ki linba ki nibooru na jiantir na,
lii tee tanbare ki soorib, ki bin di fara;
10ki te ki bi ninbina-n jɔɔn, ki bi daa laati,
ki bi sii bɔɔ ki bi sai ni kan naati.”
11N loon ki n boi ki laan i dukin nan Israel teeb din gbiat ki baa a bin biir amii? Aaii, li ki tee nna kaa. Ba tun toonbiit na paak, ki Yennu tinn binba ki tee Juu teeb na. Yennu tun nna a ŋamm Juu teeb na-ii mɔk funfunn binba ki tee Juu teeb na paak. 12Ki Juu teeb biit paake te ki tingbouŋ na teeb la tinnu; ki ŋamm Juu teeb nba din ki tun Yennu lomm nae te ki binba ki tee Juu teeb na la tinnu, li paak, Juu teeb maŋ kur-i munii nyik bi biit ki la tinnu, tingbouŋ na teeb sa mantik la bonchiann ki gar nnawa.
Binba ki tee Juu teeb tinnu labaar
13N piak ki teen yimm nba ki tee Juu teeb nee: Yennu nba te ki n tee Masia toomii i boor ni na, n sii mɔk yuugontir n toonn maŋ paak. 14Mi-i bo-i sa fit te ki n mɔŋ booru niib Juu teeb-ii mɔk funfunn binba ki tee Juu teeb na paak, li pasiar ŋanne sa te ki Juu teeb na siab-n tinn. 15Yennu nba din yêt Juu teeb na, ki u ji te ki tingbouŋ na teeb soorɔ yɔɔs; Yennu-i ŋmant ki gaarib ki bi tee u niib, li ji sii tee nlee? Li sii tee manfoore ki tur kpeemm. 16Li-i tee ki sinsinn boroboro na tee Yennu yarie, linba biar na mun bia tee u yare. Li-i tee ki tiik jiina tee Yennu yarie, li yiinii na mun bia tee u yare. 17Juu teeb na tee kaman nan ŋaak ni tiik nba ŋan nee, ki Yennu kɔnn tiik na yiinsia, ki jii muuk ni tiik yiinii na ki tukin nan ŋaak ni yar na, ki li taan yomm. Yimm nba ki tee Juu teeb na tee kaman nan muuk ni tiik yiinu nee, ki gaan Yennu barŋanii nba nyii Juu teeb boor ni na, ki tee kaman nan muuk ni tiik yiinu nba gaan bonŋann nba nyii ŋaak ni tiik ni na. 18Li paak, a daa mɔk parbifaant nan yiinii nba ki Yennu kɔnnib ki lu ki bi tee kaman nan ŋaak ni tiik yiinii na. Daa mɔk parbifaant, kimaan a tee yiinu kuukɔɔe; nyakir nee teena sommir, fin kaa teen nyakir na sommiri.
19Ŋaan a sa jiin ki yet a “Mɔniie, a Yennu kɔnn yiinii na ki tur min nba tee muuk ni yiinu na yiare.” 20Li set tee mɔniie; ba ki teen yada na paake ki u kɔnnib, ki fin nba teen yada na paake ki u jiin tukina li paak. Ŋannimi a ji daa mɔk parbifaant dudukit li paaki, ŋaan kii mɔk jaŋmaanii. 21Juu teeb nba tee kaman nan ŋaak ni tiik na, Yennu din dat bi tuba; li paak, i daa dukii nan u kan fit ki dat i tuba biaki. 22Gotir Yennu nba mɔk ninbatinu ŋaan bia mɔk ninkoonii biaŋinba. U mɔk ninkoonii ki tur binba ki teen yada, ŋaan u tiina ninbaauk; fi-i kpaŋŋi teen yada, u mun sii tiina ninbaauk, ŋaan li-i kii tee nna, u mun bia sa kɔnnae ki lua. 23Juu teeb-i lebit bi dudukit ki ŋmat teen Yisa yada, Yennu sa te ki bin tukin nan ŋaak ni tiik na, kimaan u sa fit ki tun nna. 24Yimm nba ki tee Juu teeb na tee kaman nan muuk ni tiik yiinu nee, ki Yennu kɔnnir ki tukinir nan ŋaak ni tiik na. Li ki paar ki wun jii yiinii nba ki u kɔnn ŋaak ni tiik na ni, ki bia tukin nan li mɔŋ tiik na biaki.
Yennu nba tiin sɔɔ kur ninbaauk biaŋinba
25N naa waas, n loon ki yin bann woonin ni bonsiar, a i daa dukii nan i tee yan damme; ki li tee a Juu tesiab yura paar, ki li sii be nnee ki tan baar yoo nba ki binba ki tee Juu teeb kur nba ki Yennu gannib na, bin tan teen Yisa yab. 26Nnee ki Juu teeb kur sa la tinnu. Li tee nan la sɔb Yennu gbouŋ ni a Yennu yet a
“Tinntɔɔ sa nyi Sion doo nie,
ki baar ki tan nyinn Jakɔb yaaboona biit kur ni.
27Ki ma din senn mɔsonn ki turib na tee nnee;
n tan sa nyinnib bi biit ni.”
28Juu teeb nba din ki sak Yisa barŋanii na paake, ki bi teen Yennu datai, ki li te ki yimm nba ki tee Juu teeb na la tinnu; Yennu nba din gann Juu teeb booru ki loomm na, bi yejamm paake te ki u loomm; 29kimaan Yennu-i gann niib ki turib piinii, u ji ki lebitir u pari. 30Yimm nba ki tee Juu teeb na, i din ki sak Yennu mɔb; ki mɔtana ki u ji tini ninbaauk, kimaan Juu teeb nba ki sakɔ na. 31Mɔtana, Juu teeb ki sak Yennu kaman nan ya din ki sakɔ biaŋinba na; Yennu nba din tini ninbaauk biaŋinba na, u sa tinib mun ninbaauk. 32Yennu loon ki niib kur-n bann nan bi tee tubkangbata dammewa, ki wun fit tinib ninbaauk.
Yenpaku labaar
33Yennu mɔkint ki mɔk gbennu; ki u yan nan bannu sumii bonchiann. Ŋmee mi ŋɔɔ Yennu dudukit ki sa fit bann u sɔnii? 34Li sɔb Yennu gbouŋ ni a
“Ŋmee mi Yennu dudukit ki sa kpaanɔɔ?
35Ŋmee mi ki tur Yennu siar
ŋaan ji tan loon wun pa ki jiinii?”
36Yennue din nan bonsiar kur, ki dia li kura, ki u paake ki li kur be. Ŋaant ki wun la paku yoo nba kaa gbennu. Mɔmɔmm.
Currently Selected:
Rom Teeb 11: BIM
Highlight
Share
Compare
Copy
Want to have your highlights saved across all your devices? Sign up or sign in
