Rom Teeb 10

1N naa waas, n loon nan n par kur ki mei Yennu a wun tinn n mɔŋ booru. 2N mi ki teemm siara nan bi waa Yennu nan ninmɔnn; ŋaan bi ki mi u sɔnu nan barmɔnii. 3Bi ki mi sɔnu nba te ki Yennu yet a niib tee niŋamm u boor, ŋaan loon bi mɔŋ sɔnu, ki li paak, bi ki jii bi mɔŋ ki lor nan Yennu sɔnu na. 4Kimaan Moses sennu weiu ji kan te ki Yennu-n yet a sɔɔ tee niŋanɔ u boori; ŋaan wunba kur teen Masia yada, Yennu sa yet a li daanɔ tee niŋanɔe u boor.

Tinnu nba tee booru kur yar biaŋinba

5Moses din sɔb a “Wunba tee popeendaanɔ kaman nan sennu nba senn biaŋinba, u sa la manfoor li paaka.” 6Ŋaan binbenŋaŋ nba waa yada teenu na paake, Yennu gbouŋ yet nnee a “A daa dukii a par ni a Ŋmee tan sa do Yendɔuŋ ni?” (Li paak tee a Ŋmee sa do Yendɔuŋ ni ki te ki Masia-n siki?) 7“A bia daa boi a Ŋmee tan sa sik kpeenn tiŋ ni?” (Li paak tee a Ŋmee sa sik ki te ki Masia-n fiir kuun ni?) 8Yennu gbouŋ nba want biaŋinba na tee a “Yennu barŋanii na perawa; li be a mɔb ni nan a par ni.” Barŋanii maŋ tee yada labaar nba ki ti mɔɔntir na. 9Li-i tee ki a set pak ki kat nyinn a mɔb ni ki yet a Yisa tee a Yomdaanɔ, ki bia teen yada a par ni nan Yennu set fiinɔ kuun ni, Yennu sa tinnawa. 10Kimaan nirɔ set teen Yisa yadae u para ni, ki Yennu yet a u tee niŋanɔ u tɔɔnn, ki li set nyii u mɔb nie ki yet nna, ki li paake ki u la tinnu. 11Li sɔb Yennu gbouŋ ni a “Daanɔ nba teenɔ yada, u kan mi di fei.” 12Bɔkitu kaa Juu teeb nan binba ki tee Juu teeb sinsuuk ni, Yennu kuukɔɔ nee tee ti kura Yomdaanɔ, ki binba kur meiɔ, u sommitib nan burchintuk. 13Li sɔb Yennu gbouŋ ni a “Wunba kur mei ti Yomdaanɔ sommir po, u sa la tinnu.”

14Tɔn, niib-i kii teenɔ yada, bi sa teen nlee ki miarɔ sommir po? Ki bi-i kii gbat barŋanii maŋi, bi sa teen nlee ki teenɔ yada? ki bi-i kii mɔɔnt barŋanii maŋi, nlee ki niib sa gbat li po? 15Ki Yennu-i kii tun toomiinba, nlee ki barŋanii maŋ sa mɔɔnti? Li sɔb Yennu gbouŋ ni a “Binba lin ki mɔɔntir barŋanii maŋ, bi baaru ŋan bonchiann.” 16Ŋaan niib kur kaa sak barŋanii maŋi. Aisaya din sɔb Yennu gbouŋ ni a “N Yomdaanɔ, ŋmee sak barŋanii na?” 17Li paak, nirɔ-i gbia barŋanii, ŋanne sa te ki wun teen Masia yada; ki niib-i mɔɔntir Masia barŋanii na, li mun sa te ki u gbiar.

18N loon ki n boi ki laan niib ki gbat barŋanii maŋ amii? Mɔmɔmm, bi gbata. Li sɔb Yennu gbouŋ ni a

“Niib gbat bi kunkɔra nan bi mɔmaan tingbouŋ lokir kur po.”

19N yaa n ŋamm ki boie ki laan Israel teeb din ki bann li paak amii? Moses tiauŋo din dɔŋ jiin sinsinn, a Yennu din yet Israel teeb, a u sa te ki bii mɔk funfunn nan niib nba ki mɔk booru na paak, ki te ki bi wutoa-n do booru nba tee jatit na paak. 20Ki Aisaya mɔk par, ki yet a Yennu yaa a niib nba ki fiin u po na, bi tan lauwa; a ki niib nba ki boi u po na, ki u jii u mɔŋ ki fiit wannib. 21Ŋaan ki u yet Israel teeb po a u tant u nuu yennu ni nan nyiɔk a wun gaarib, ŋaan ki bi tee tubkangbata ki ki saak u mɔbi.

Currently Selected:

Rom Teeb 10: BIM

Highlight

Compare

Copy