Rom Teeb 9
9
Israel teeb labaar
1N tee Masia nirɔe ki ki fa faaki. Yennu Seyeeŋ nee yen n dudukit ki teen siara a n ki fa faak, linba ki n yaa n pak na tee mɔniie; 2a n mɔk parbiir bonchiann nba kaa gbennu, 3n mɔŋ booru paak. Li-i bo-i sa fit ki n set n niib paak ki Masia-n biirin, n bo sa sak nna. 4Ŋamme tee Israel teeb, ki Yennu din gannib ki din te ki bi tee u waas, ki din taan namm nan yentsaakar, ki turib mɔlora, ki bia turib u sennu, ki wannib barmɔnii jiantu, ki senn mɔsona ki turib. 5Bi yejamm din tee nijaanae, ki Masia nba din kpant nisaarik na, u din tee bi booru ni yenɔe. Yennu nba yen bont kur na, u sa la paku ki li kii mɔk gbennu. Mɔmɔmm.
6N ki yeen a Yennu mɔsonn na ji kan tun kaa, kimaan Israel yaaboona kur kaa tee Israel teeb nan barmɔnii. 7Abraham yaaboona kur kaa mun tee u yaaboona nan mɔnii, kimaan Yennu din yet Abraham a “Aisak booru tan sii tee a yaaboonae.” 8Li paak, binba ki Abraham marib nifosaarik maaru na ki tee Yennu waasi. Binba tee Yennu mɔsonn maaru waas na, ŋamme set tee Yennu waas. 9Yennu mɔsonn na din tee a “Yoo nba ki n tan sa jen na, li yooe ki Sara sa mar bonjabik.”
10Ŋaan li kur kaa na. Ti yaa Rebeka din mar waas bannlee ki bi taa baa, wunba tee ti yeja Aisak. 11-12Yoo nba ki bi daa din ki marib ki bi ki tun linba ŋan amii linba bi na, ki Yennu din yet a bikperik na tan sii tee waarɔ po na jiamɔ. Yennu din yet nna a u loomm na-n saan tɔɔnn. Li paak, u loomm na tee wun gann niibe, li ki tee bi toona paak kaa ki bi tee u niibi; ŋaan li tee wa loon ki gann nee. 13Li tee kaman nan Yennu nba yet u gbouŋ ni biaŋinba nee a “N loon Jakɔb ki gar Esɔ.”
14Ki ti ji sa yet a bee? Ti sa yet a Yennu ki tun linba ŋan amii? Aaii, ti kan yet nna kaa. 15Yennu din yet Moses a “Binba ki n loon ki n tinib ninbaauk na, ŋamme ki n sa tinib ninbaauk.” 16Li ki tee nisaarik loomm amii binbeŋ kaa, ŋaan li tee Yennu ninbatinue. 17Li sɔb Yennu gbouŋ ni ki tur Faro a “Min Yennu dinna naan linba na paake a n jiia ki wanna n paŋ, ki te ki n sann-n mɔɔnt lin tingbouŋ na kur.” 18Li paak, binba ki Yennu loon ki wun tinib ninbaauk na, ŋamme ki u tiinib ninbaauk, ki bia teen siab nikangbata kaman nan wa loon biaŋinba.
Yennu wutoor nan ninbatinu labaar
19Tɔn, li pasiar ki i yenɔ-n boin a ki li-i tee nnaie, nlee ki Yennu laat nisaarik biiti? Ŋmee sa fit ki yêt linba ki Yennu senni? 20Ŋaan n yɔɔk, a tee ŋmee ki sa pak jiin Yennu? Bobir kan fit boi bobmaarɔ a “Bee ki a maan ki n tee nna?” 21Bobmaarɔ mɔk yaak ki sa jii yɔuk bur ki maa bobŋann nan bob-biiuk. 22Nnee ki Yennu tun ki loon wun wann u wutoor ki niib kura-n bann u paŋ. Li paak ki u mɔk mintir nan binba ki u wutoor sa baar bi paak ki li bo jaŋ nan wun biirib na; 23ki bia poŋ dɔŋ gann niib nba ki u tinib ninbaauk na a wun donnib ki wann wa mɔk burchint bonchiann biaŋinba. 24Li tee timm nba ki u gann nee; ki li ki tee Juu teeb kuukɔɔ kaa, ŋaan li tee binba ki tee Juu teeb na mun biake. 25Li tee kaman nan Hosea nba din sɔb Yennu gbouŋ ni biaŋinba, a Yennu yet ki yaa a
“Niib nba din ki tee n niib na,
ŋamme ki n sa jiib ki bii tee n niib;
a ki booru nba ki n din ki loon na,
ŋamme ki n sa yiimm booru nba ki n loomm.
26a ki siaminba ki bi din yetib a bi ki tee n niib na,
a leŋe biak ki bi sa yiimm ‘Manfodaanɔ Yennu na waas.’ ”
27Yennu sɔkinii Aisaya din fiit yeenin ni ki wann Israel teeb po ki yet a “Israel teeb-i lekii yab kaman nan mɔkgbeŋŋir tanbiinii na, ŋaan bi waaminnae sa la tinnu; 28kimaan ti Yomdaanɔ sa dat tingbouŋ na teeb tuba yian yian ki gbenn kaman nan wa yet biaŋinba na.” 29Li tee kaman nan Aisaya nba din yet nee a “Ti yabint Yomdaanɔ-i bo-i kii tennit waas, li bo tan sa tun ki turit kaman nan la din tun ki tur Sodom nan Gomora doi ni niib biaŋinba nae.”
Israel teeb nan barŋanii labaar
30Tɔn, ti sa yet nlee? Binba ki tee Juu teeb na din ki kor a bin teen niŋamm Yennu boori, ŋaan ki Yennu yet a bi tee niŋamm u tɔɔnn, bi yada na paak. 31Ŋaan Israel teeb nba din kor a bin la sennu nba sa te ki Yennu yet a bi tee niŋamm u tɔɔnn na, ki bi ji kɔŋ. 32Bee ki bi din kɔŋi? Bi din ki kor a wun yet a bi tee niŋamm u tɔɔnn bi yada paaki; bi din kor a Yennu-n yet a bi tee niŋamm u tɔɔnn bi toona paake; bi gbiat tanne ki baa, 33tann nba ki bi sɔb li po Yennu gbouŋ ni a
“Gotir, min Yennu bir tann Sion doo ni,
linba sa te ki niib-n gbiat ki baa;
a li tee tangbeŋŋire,
ki bi sa birint li paak ki baa.
Ŋaan wunba teenɔ yada, u kan di fei.”
Currently Selected:
Rom Teeb 9: BIM
Highlight
Share
Compare
Copy
Want to have your highlights saved across all your devices? Sign up or sign in
