Abanya Roma 6

Erihola oko bibi nʼeribyaho busana nʼerimatikana na Kristo

1Tũbũge tũtĩkĩ kwehĩ? Tukwamirire ebibi, olukogo lwa Nyamuhanga ilwatoka erikanyirira kwehĩ? 2Iyihi nʼahake. Ĩtwe twamahola oko bibi, twanganatoka eriswabya omo bibi kwehĩ? 3Sĩmwasĩ kwehĩ? ĩtwe bosĩ ngoko twabatĩsĩbawa erimatikana na Kristo ĩtwabĩrĩbatĩsĩbwa erimatana nʼoluholo luwe kwehĩ? 4Neryo omo lũbatĩso lwetu twabiritabwa haguma na Kristo omo luholo luwe, neryo ngoko Kristo alũbũkĩbawa oko baholĩ omo lukengerwa lwa Tata, litya netu itwatoka erirendera omo mibere yʼengebe nyihyanyihya. 5Kusangwa twamabohana naye omo luholo luwe, kwenene litya twasyabya buguma naye omwʼĩlũbũka liwe, 6kusangwa tũnasĩ ngoko mundu wetu wa kera abiribambwa oko musalaba haguma na Kristo, neryo amalengekanĩa wʼebibi atoke erĩherĩbwa, situbye kandi abakobe bʼebibi. 7Kusangwa oyo wabirihola, abiriboholwa oko maka wʼebibi. 8Neryo twamabya twabirihola haguma na Kristo, tũkĩkĩrĩraya ko twasyabyaho haguma naye. 9Tũnasĩ Kristo abĩrĩlũbũkĩbwa oko baholĩ, isiendisyaswahola na kera; oluholo silukimuwite ko hamũlĩ. 10Kusangwa omo luholo luwe, mwahola busana nʼebibi engendo nguma nyisa; na lino engebe yiwe ikabyaho busana na Nyamuhanga. 11Nenyũ nibya muyiganze ngʼabaholĩ oko bibi, nĩkwa ngʼabaliho uku Nyamuhanga busana nʼerimatikana na Kristo Yesu.

12Simuleke ebibi bikabatabalako omo mibiri yenyũ yʼerihola, ebikaleka mwowa esyongumbu syʼomubiri. 13Kandi simuhe ebĩtsũko byʼemibiri yenyũ busana nʼebibi, erikola ebitatunganene; nĩkwa muyihe uku Nyamuhanga ngʼabandu ababĩrĩlũbũka oko baholĩ, kandi muhe ebĩtsũko byenyũ uku Nyamuhanga, bikole ebitunganene. 14Kusangwa ebibi sibikibawite ko hamũlĩ, kusangwa Simuli oko Migambo nĩkwa oko lukogo lwa Nyamuhanga.

Abakobe bʼeritunganene

15Neryo, tũkolekĩ kwehĩ? Tukole ebibi kusangwa Situli omo Migambo, nĩkwa omo lukogo lwa Nyamuhanga kwehĩ? Iyihi, nʼahake! 16Sĩmwasĩ ngoko mugulu mukayiha oko mundu erĩmowa ngʼomukobe, kwenene muli bakobe bʼoyo mũkowa, amabya wʼebibi, akaleta oluholo, amabya wʼerĩowa, akabayira mo batunganene. 17Nĩkwa wasĩngya uku Nyamuhanga, kusangwa nomo mwanabya bakobe bʼebibi erĩmbere, lino mũkowa nʼomutima gosĩ erĩkangĩrĩrya lyʼekwenene eryo mwahabawa. 18Kandi momwaboholwa oko bibi, nʼeribya bakobe bʼeritunganene. 19Ngabũga omo bĩnywa byʼabandu busana nʼobolo-bolo bwʼomubiri wenyũ. Ngoko mwabya mukaha ebĩtsũko byenyũ ngʼabakobe bʼebĩtĩsĩrĩre nʼebibi, ebikaleta emigendere mibi, neryo lino muhe ebĩtsũko byenyũ ngʼabakobe bʼeritunganene erikaleta emigendere mĩbũyĩrĩre.

20Omugulu mwabya bakobe bʼebibi, mwabya bwĩranda oko litunganene. 21Neryo momwabana endũndĩ yahi omo myatsi eyo eyikabahemula lino kwehĩ? Kusangwa endũlĩ yʼemyatsi eyo ni luholo. 22Nĩkwa lino mwabiriboholwa oko bibi, mwabiribya bakobe ba Nyamuhanga, mukabana endũndĩ yʼeribya nʼemigendere mĩbũyĩrĩre, nʼendũlĩ ni ngebe yʼerikota. 23Kusangwa obũhĩngĩ bwʼerikola ebibi ni luholo, nĩkwa olũsũnzo olũkalũa uku Nyamuhanga ni ngebe yʼerikota busana nʼerimatikana na Kristo Yesu, Omukama wetu.

Currently Selected:

Abanya Roma 6: KB80

Highlight

Copy