Abanya Roma 7

Ekĩmĩnyĩsyo kyʼerĩherũkya

1Sĩmwasĩ, balĩkyetu, ngabũga oko basĩ Emigambo, ngoko Emigambo iwite ehamũlĩ oko mundu omugulu gosĩ akineho kwehĩ? 2Kusangwa omũkalĩ oyũhĩkĩbwe abohĩre ũkwʼĩba wuwe omugulu gosĩ akineho; nĩkwa ĩba wuwe amahola, iniamaboholwa oko mugambo owamuboha ũkwʼĩba wuwe. 3Neryo ĩba wuwe amabya akineho, omũkalĩ oyo amĩkala nʼogundi mulume, asyahulwa mo mũsĩngĩrĩ; nĩkwa ĩba wuwe amahola, nĩ mwĩranda omo migambo. Sĩ mũsĩngĩrĩ amahĩkĩbwa nʼogundi mulume. 4Ko liri ritya busana nenyũ, balĩkyetu, mwabirihola oko Migambo busana nʼomubiri wa Kristo owahola, imwatoka eriherukira oko gundi, oyo walũbũkĩbawa oko baholĩ, imwatoka erireta endũndĩ busana na Nyamuhanga. 5Kusangwa omugulu twabya nʼamalengekanĩa wʼomubiri, esyongumbu nyibi syʼomubiri esyahuluka busana nʼEmigambo, mosyakola omo bĩtsũko byetu erituletera oluholo. 6Nĩkwa lino twabiriboholwa oko Migambo, kusangwa twabirihola oko myatsi eyabya ikatuboha. Neryo tukakola omo nzira nyihya-nyihya yʼOmũlĩmũ, butsira eya kera yʼAmasako.

Emigambo ni bibi kwehĩ?

7Neryo tũbũge tũtĩkĩ kwehĩ? Tuti Emigambo ni bibi kwehĩ? Iyihi nʼahake! Emigambo yo yaleka inaminya ebibi ngoko biri. Kusangwa sinaminya erirumwa nga nĩkĩ, kumbe Migambo ĩtabũga iti, Subye ukarumawa. 8Nĩkwa ebibi mobyabana omwanya omo bihano, mobyakola-kola omo mutima wage emĩsĩndo yosĩ yʼerirumwa; kusangwa ahate Migambo, ebibi biri ngʼekindu kĩholĩre. 9Nage nabyaho nyite oko Migambo; nĩkwa omugulu ekihano kyahĩka ebibi mobyasuba, nage monahola. 10Nʼekihano ekyahĩrawa busana nʼerireta engebe, mokyanyiretera oluholo. 11Kusangwa ebibi mobyabana omwanya busana nʼebihano, mobyandeba, kandi mobyanyĩta busana nʼebihano.

12Neryo Emigambo ĩbũyĩrĩre, kandi ekihano kĩbũyĩrĩre, kitunganene, kandi ni kibuya. 13Neryo ekindu kibuya mokyanyiretera oluholo kwehĩ? Iyihi nʼahake. Nĩkwa ni bibi ebyaletalo, ibikakola omo nzira yʼekindu kibuya erĩnyĩta, ibyatoka eriminyikala kwenene ngʼebibi. Neryo busana nʼebihano, ebibi bikabanika mo nabi kutsibu.

14Kusangwa tũnasĩ ngoko Emigambo nĩ yʼekĩrĩmũ; nĩkwa ĩngye indi wʼomubiri, nabĩrĩgũlĩbwa ngʼomukobe wʼebibi. 15Ĩngye sindiminya ebyo ngakola; kandi sindikola ebyo nyanzĩre erikola, nĩkwa ngakola ebyo ngakwa obusu. 16Neryo namabya ngakola ebyo ndanzĩre erikola, ngalĩga Emigambo kwʼiri mibuya. 17Neryo kandi oyukakola omwatsi oyũ sĩ ĩngye, nĩkwa ni bibi ebĩkere omwisi wage. 18Kusangwa nyĩnasĩ ngoko hate kibuya ekĩkere omwisi wage, omwisi wʼomubiri wage; kusangwa nyĩnanzĩre omo mutima wage erikola ekibuya, nĩkwa sinditoka erikolakyo. 19Sindikola ekibuya ekyo nyanzĩre erikola, nĩkwa ekibi ekyo ndanzĩre kyo ngakola. 20Nĩkwa namakola ekyo ndanzĩre, oyukakola sĩ ĩngye, nĩkwa ni bibi ebĩkere omwisi wage.

21Neryo ngabana omugambo oyũ omwisi wage. Omugulu nganza erikola ekibuya, ekibi ekiri omwisi wʼomutima wage kikagana. 22Ngalĩga nʼobutseme, omugambo wa Nyamuhanga omwisi wʼomutima wage. 23Nĩkwa ngabana ogundi mugambo owakakola omo mubiri wage owakalwa nʼomugambo wʼobũlengekanĩa bwage, kandi ngayirawa mo mundu wʼomũlĩkĩ wʼomugambo wʼebibi ebĩkere omo bĩtsũko byage. 24Ĩngye indi mundu wʼobũlĩge! Nindi wasyanyibohola oko mubiri oyũ wʼoluholo kwehĩ? 25Wasĩngya uku Nyamuhanga busana nʼomukama wetu Yesu Kristo. Neryo ĩngye omo bũlengekanĩa ngakola emigambo ya Nyamuhanga, nĩkwa omo mubiri ngakolera emigambo yʼebibi.

Currently Selected:

Abanya Roma 7: KB80

Highlight

Copy