Abanya Roma 5

Abatunganene embere sya Nyamuhanga

1Neryo kusangwa twabiriyirwa mo batunganene busana nʼerĩkĩrĩrya, tunawite Obuholo uku Nyamuhanga, nʼobuholo obo mobwahĩka busana nʼomukama wetu Yesu Kristo. 2Iye abĩrĩtũhĩra omwisi wʼolukogo olo lwa Nyamuhanga busana nʼerĩkĩrĩrya, aho twimene ndeke. Kandi tukatsema omo maha wʼerisangira olukengerwa lwa Nyamuhanga. 3Nĩkwa tukatsema omo malĩge wetu, kusangwa tũnasĩ obũlĩge bukaleta erĩyĩyĩnĩa. 4Nʼerĩyĩyĩnĩa likaleta erĩsĩmwa na Nyamuhanga, nʼerĩsĩmwa likaleta amaha. 5Kandi amaha sialituteba, kusangwa Omũlĩmũ Abũyĩrĩre ogo Nyamuhanga atuha, abĩrĩũtũlĩra olwanzo lwa Nyamuhanga omo mitima yetu.

6Kusangwa omugulu twabya butsira maka, Kristo mwaholera abakola-nabi, oko mugulu Nyamuhanga ayisoga. 7Lĩkalĩre busana nʼomundu eriholera omundu oyutunganene, nĩkwa, kwamũhwa omundu anganahanda omutima eriholera omundu mubuya. 8Nĩkwa Nyamuhanga akakangaya olwanzo luwe busana netu, kusangwa omugulu twabya tukine bakola-nabi, Kristo mwatuholera. 9Neryo twamabya twabiriyirwa mo batunganene busana nʼomusasi wuwe, neryo kwilaba aho, Kristo asyatũlamya okwʼihitana lya Nyamuhanga. 10Nĩkwa twabya nzĩgũ sya Nyamuhanga, neryo mwatũsanganĩa omo luholo lwa Mugala wuwe; nĩkwa kwilaba aho, kusangwa twabĩrĩsanganĩbwa, twasyalamĩbwa omo ngebe ya Kristo! 11Neryo kandi kwilaba aho, tukatsema uku Nyamuhanga busana nʼomukama wetu Yesu Kristo, oyo wabĩrĩtũsanganĩa na Nyamuhanga.

Adamu na Kristo

12Neryo ebibi mobyahĩka munakihugo busana nʼomundu muguma, nʼoluholo molwingira busana nʼekibi kiwe, neryo litya oluholo molwahĩka oko bandu bosĩ, kusangwa abosĩ mobakola ebibi. 13Ebibi mobyabya omo kihugo embere wʼerihuluka lyʼEmigambo; nĩkwa ebibi mobitaganzwa ahate Migambo. 14Nĩkwa oluholo molwatabala oko bandu erĩtsũka uku Adamu nʼerĩhĩka uku Musa; nibya molwatabala oko batakola ekibi ekiringene ngʼerĩlolo lya Adamu.

15Adamu ali ngʼekĩsosekanĩo kyʼoyukandisyasa. Nĩkwa olũsũnzo lwa Nyamuhanga silulingene nʼerĩhalya lya Adamu. Kusangwa erĩhalya lyʼomundu muguma molyaleta oluholo lʼoko bandu bangi. Nĩkwa olukogo lwa Nyamuhanga ni lunene kwʼaho, nʼolũsũnzo busana nʼolukogo lwʼomundu muguma, ye Yesu Kristo lwasyakanyirira oko bandu bangi. 16Nʼakandi olũsũnzo lwa Nyamuhanga silulingene nʼekibi kyʼomundu muguma; kusangwa olubanza lwʼerĩhalya liguma lo lwaleta omusango, nĩkwa olũsũnzo lwʼolukogo lũkalũsaya omusango wʼamalolo mangi. 17Kusangwa erĩhalya lyʼomundu muguma molyaleka oluholo ilwatabala busana nʼomundu oyo; kwilaba aho, omundu muguma ye Yesu Kristo akaleka abandu abakangirira olukogo lunene nʼolũsũnzo lwʼeritunganene, ibatabala omo ngebe busana na Yesu Kristo.

18Neryo ngoko erĩhalya liguma molyahĩra abandu bosĩ kwʼomusango; litya erikola eritunganene liguma likabohola abandu bosĩ, nʼerihabo engebe. 19Kusangwa busana nʼerĩtendĩowa lyʼomundu muguma, abandu bangi mobayirwa mo bakola-nabi, neryo litya busana nʼerĩowa lyʼomundu muguma, abandu banene basyayirwa mo batunganene embere sya Nyamuhanga.

20Emigambo moyahĩka erireka erĩhalya iryakanyirira. Nĩkwa aho ebibi byakanyirira, olukogo lwa Nyamuhanga molwakanyirira kutsibu. 21Neryo ngoko ebibi byatabala omo luholo, litya olukogo lwa Nyamuhanga lukatabala omo litunganene, nʼerireta engebe yʼerikota busana nʼomukama wetu Yesu Kristo.

Currently Selected:

Abanya Roma 5: KB80

Highlight

Copy