Eklesiastikus 50
50
Simon jadolo maduong’
1E ndalo Simon wuod Onias, jadolo maduong’,
ema ne ochak olosie Hekalu,
kendo Kama Ler nolos motegno mar siro lweny.
2En ema ne oketo mise mar ohinga modhi malo ahinya,
kendo mane olworo Hekalu duto.
3E ndalone bende ema nokunyie yawo mar pi malach ka nam.
4Noiko Jerusalem motegno mar siro lweny,
kodwaro ni mondo joge kik lo.
5Mano kaka ne en gi duong’,
kane owuok e tok rageng’ mar Hekalu, ka ji olwore!
6Ne en kaka sulue mar okinyi marieny e boche polo, kendo ka due marieny motegno,
7kata ka chieng’ marieny kuom Hekalu mar Nyasaye Maduong’ Moloyo,
kata ka lihudu marieny e boche polo,
8kata ka maua mag ros e ndalo koth,
kata ka maua mag lili manie geng aora,
kata ka lum mang’ich e got Lebanon e ndalo oro,
9kata ka mach ma wang’o ubani e tap ubani,
kata ka kikombe molos gi dhahabu,
kendo ochomie kite ma nengogi tek mopogore opogore,
10kata ka yadh zeituni mogundho gi olemo,
kata ka yadh saipras ma wiye ochopo e boche polo.
11Kane Simon orwakore malich gi lewni modhing’ore
kendo odhi e kendo-mar-misango,
to duong’ mare ne omiyo Kama Ler nenore maber moloyo.
12Kane ochung’ but kendo-mar-misango
ka jodolo miye lemo mag chiayo motimgo lisweche,
kendo ka owetene olwore,
to nochalo gi yadh sida man Lebanon ma yiend othidhe olworo.
13Yawuot Harun gi duong’gi duto
nochung’ e nyim oganda duto mar jo-Israel,
korwakore gi lepgi mag duong’
ka giting’o chiwo mimiyo Ruoth Nyasaye e lwetgi.
14Kane gichung’ kamano,
jadolom maduong’ ne tieko lemo e kendo-mar-misango
kochiwo mich ni Nyasaye Maduong Moloyo kendo Manyalo Gik Moko Duto.
15Norieyo lwete mondo ogamne kikombe,
kendo noolo divai e tiend kendo-mar-misango
mondo obed misango madum tik mamit
ni Nyasaye Maduong Moloyo, kendo ma Ruodh Gik Moko Duto.
16Eka yawuot Harun ne kok ka gigoyo tunge mothedh gi fedha,
ka gimiyo piny wuo matek,
mondo obed rapar e nyim Nyasaye Maduong’ Moloyo.
17E sano, ji duto ne podho piny auma,
ka gilamo Ruoth Nyasaye ma Nyasachgi, kendo Manyalo Gik Moko Duto,
ma Nyasaye Maduong’ Moloyo.
18Eka jower ne wero wende mag pak,
ka dwondgi duto oriwore e wer mamit.
19Kendo ka ji ywak ni Nyasaye Maduong’ Moloyo.
Ne gilemo e nyim Ruoth Nyasaye mang’won kamano,
nyaka chop tij kendo-mar-misango rum.
20Bang’ mano, jadolo maduong’ ne lor
kendo rieyo letene kochomo wi jo-Israel,
koguedhogi kendo koluongo nying Ruoth Nyasaye
ma jadolo maduong’ kende ema nyalo luongo.
21Kuom mano, ji ne chako podho piny auma,
mondo giyud gueth mar Nyasaye Maduong’ Moloyo.
Jip
22Koro pakuru Nyasach gik moko duto,
matimo timbe madongo kuonde duto,
kendo mosemiyo wadongo chakre nywolwa,
kendo moritowa gi ng’wono.
23Nyasaye mondo omi chunywa mor,
kendo omiwa kue e ndalogi,
kendo omi Israel kue mosiko nyaka chieng’.
24Ng’wonone mondo osik kodwa,
kendo mondo owarwa kapod wangima.
Ngero moro
25Nitie dhoudi ariyo ma ajokgo,
kendo nitie moro maradek ma ok nyal kwan ka dhoot kata matin.
26Kod joma odak e got Seir, gi jo-Filistia,
kod joma ofuwo modak Shekem!
Weche mogik
27An Joshua wuod Sirak,
ema asendiko weche makelo rieko gi chike mabeyo e kitabuni.
Gin weche mane owuok e chunya, machalo soko mar rieko.
28Ng’ama opuonjore wechegi,
mi odoko mariek komakogi e chunye, en jahawi.
29Ka oluwogi adimba, to enoyud teko mar timo gik moko duto,
nikech ler mar Ruoth Nyasaye menyo yorene.
Currently Selected:
Eklesiastikus 50: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.