Eklesiastikus 51
51
Lemo mar erokamano
1A Ruodha, agoyoni erokamano!
Apaki, yaye Nyasaye Jawarna.
2Agoyoni erokamano nimar iserita kendo isekonya.
Iseresa kuom tho,
kendo isewara e obadho mane johang wach ochikona gi wechgi mag miriambo lilo.
Nikonya kendo niwara kane wasika oriworena.
3Kuom ng’wononi maduong’, niwara e lak joma ne dwaro kidha,
kendo e lwet joma ne dwaro nega,
kendo e masiche mathoth mane omaka,
4kendo kuom mach mane olwora ka dwaro thung’a.
Ee, niresa e dier mach mane ok amoko,
5kendo kuom piny matut mar jomotho,
kendo kuom lep mochido gi weche mag miriambo.
Adier, niresa kuom jawuond mane ohanga e nyim ruoth.
6Chunya ne chiegni chot.
Chutho ngimana nosechopo e dhoranga piny jomotho.
7Wasika nolwora kuonde duto, to ne onge ng’ama konya.
Nadwaro ng’ama dikonya, to ne ok ayudo.
8Eka naparo ng’wononi, A Ruoth Nyasaye,
kendo naparo timbeni ma nyaka nene,
kaka ikonyo joma obedo modhil mos kariti,
kiresogi e lwet wasikgi.
9Naywakni gie piny, kakwayi mondo iresa e tho,
10kawachoni ni, “A Ruoth Nyasaye, in e Wuora.
Kik iweya e chandruokna, ka aonge gi teko mar siro janyadhi.
Ok anawe paki, kendo anawerni wende mag pak.”
11Ang’eyo ni niwinjo ywakna, nimar niresa e tho,
kendo niwara e chandruokna.
12Kuom mano, A Ruoth Nyasaye, agoyoni erokamano,
kendo apaki, kamiyo nyingi duong’.
Yor yudo rieko
13Kane an rawera, kapok achako wuodhena,
nalemo ratiro mondo ayud rieko.
14Nathoro lemo e nyim Hekalu mondo ayude,
kendo pod anamed dware nyaka thona.
15Chunya osebedo mamor gi rieko a chakruok nyaka giko.
Tienda osewuotho e yo moriere
kaluwo ndach rieko chakre tinna
16kane achikone ita kata mana matin kende, to nayude,
kendo nanwang’o puonj mang’eny.
17Namedo ng’eyo gik mang’eny nikech en.
Duong’ obed ni Nyasaye mane omiya rieko!
18Naketo chunya mondo atim mana gik mane opuonja.
Adier, nanano ni timo gik makare, kendo ok naywag ang’e.
19Nakedo matek gi chunya duto ni mondo abed gi rieko,
kendo namako Chik adimba.
20Narieyo bedena malo kaywak nikech ne ok ang’eyo rieko,
to naketo chunya ni mondo abed kode,
kendo nayude, nimar ngimana ne ler.
Nyaka nene aseketo chunya mondo abed kode,
emomiyo ok enowita nyaka chieng’.
21Nadware ka an gi siso moloyo,
omiyo koro an gi mwandu makare.
22Ruoth Nyasaye nomiya lep mayot, kaka pokna
omiyo abiro pake gi lep mayotno.
23Suduru buta, un joma pod ok opuonjore,
kendo ubed e oda mar puonjruok.
24Unubed kuonge gi gigo nyaka karang’o,
to siso omako chunyu kodgi?
25Agoyonu milome, ka awacho niya,
26“Ng’iewuru rieko nono maonge pesa.
Kuluru wiu piny mondo oketnu jokne, kendo yieuru gi chikene.
Kudwaro yude, to ok ochunou ni nyaka udhi mabor.
27An, ne atiyo mana matin kende,
to koro neyeuru kaka aseyudo kue maduong’!
28Winjuru puonj mar rieko kapod un rawere,
eka enomi uyud mwandu mathoth mag fedha gi dhahabu.
29Chunyu mondo obed mamor nikech ng’wono mar Nyasaye,
kendo kupake, to kik une wichkuot.
30Tiekuru tijeu ka sa podi,
eka Nyasaye bende nomiu poku e sa mowinjore.”
Currently Selected:
Eklesiastikus 51: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.