Eklesiastikus 49
49
Josia
1Ka ji oparo timbe Josia, to gidumnigi mamit
mana ka tik ubani ma ng’ama olony kuom tich ruwo ubani oloso,
kata ka mor kich ma ng’ato chamo,
kata ka thum migoyo e nyasi.
2Notimo gik makare koloko chuny ji,
kendo komiyo giweyo timbegi maricho.
3Notiyo ni Nyasaye gi chunye duto,
kendo e ndalo mane richo ng’eny e piny ahinya,
nojiwo ji mondo oluor Nyasaye.
Ruodhi gi jonabi mane obiro achien
4Ruodhi mag Juda duto ne richo,
mak mana Daudi gi Hezekia kod Josia.
Ne gilal nikech ne giketho chik Nyasaye Maduong’ Moloyo.
5Kuom mano, Nyasaye nomayogi lochgi,
moketogi e bwo loch jomoko nono.
6Dalagi Maler, mane Nyasaye oyiero, nowang’
kendo yorene nodong’ nono,
7mana kaka Jeremia nosehulo chon.
Mano notimore nimar ne gitimone Jeremia marach,
kata obedo ni noyiere mondo obed janabi kane pod en ei min mare,
mondo opudh gik moko gi lop tiendgi, kokethogi kendo omukogi,
to bende mondo oger gik moko kendo opidhgi.
8Ezekiel ema noneno fweny, monenoe Duong’ Maler mar Nyasaye
kobet ewi gach Kerubi.
9Nyasaye noparo wasike mogoyogi gi koth malich,
mondo okony joma ne luwo yo makare.
10Mad choke jonabi apar gariyo okel ngima manyien gie lietegi,
nikech ne gikueyo chuny joka Jakobo,
kendo ne giresogi nikech yie kod geno mane gin go.
Zerubabel gi Joshua
11Ere kaka wanyalo pwoyo Zerubabel?
Nochalo gi tere miketogo sei
manie lwet Ruoth Nyasaye ma korachwich.
12Joshua wuod Jozadak bende ne chal kode.
Gin ema ne gigero Hekalu e ndalogi.
Ne gigero ni Ruoth Nyasaye ot maler,
mondo omiyego duong’ nyaka chieng’.
Nehemia
13Nying Nehemia bende owinjore wami duong’,
nimar nochako ogero ohinga ma dalawa mane omukore,
koketoe rangeye gi lodi,
kendo nochako ogero utwa.
Weche jomoko e yo machiek
14Onge ng’ama osebet e piny mipimo gi Enoka,
nimar nogole e piny kitere malo.
15Bende onge ng’ama ne chalo gi Josef,
mane en jatend owetene kendo teko mar joge.
Ruoth Nyasaye norito ringre.
16Shem gi Seth noyudo duong’ e kind ji,
to Adam ema nigi duong’ moloyo ji duto.
Currently Selected:
Eklesiastikus 49: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.