Eklesiastikus 48
48
Elija
1Bang’ mano, Elija ma janabi nothinyore ka mach, kendo wechene ne rieny ka meny maliel.
2En ema ne okelo kech e piny,
kendo notimo kinda momiyo ji mang’eny otho
nyaka ne gidong’ manok.
3Ruoth Nyasaye nomiyo oloro polo mondo kik koth chue,
kendo nomiyo mach oa e polo molor piny nyadidek.
4A yaye Elija, mano kaka honni magi dongo!
Ere ng’ama nyalo sungore maromo kodi?
5In ema ne imiyo ng’ama otho obet mangima,
kigole e piny jomotho gi wach Nyasaye Maduong’ Moloyo.
6In ema ne itieko ruodhi,
kendo ne imiyo jotelo matuo otho.
7In ema ne iwinjo weche mag siem e got Sinai,
gi buche mag sand ewi got Horeb.
8In ema ne iwiro ruodhi mondo obed jochul kuor,
kendo niwiro jonabi mondo okaw kari.
9In ema ne oteri e polo gi kalausi mar mach,
e gari man gi farese mag mach.
10In ema jonabi ne ohulo wachni e weche mane gikorogo masiche,
ni ibiro kueyo mirimb Nyasaye kapok oto chuth.
In ema ne ohul ni ibiro kelo winjruok e kind wuone gi nyithindgi,
kendo ni ibiro loso dhout Jakobo mane okethore.
11Joma ne oneni gin johawi,
kendo joma nihero bende gin johawi.
Elisha
12Kalausi noimo Elija, to roho ma en-go nopong’o chuny Elisha.
E kinde duto mane Elisha ngima, onge ruoth moro mane nyalo bwoge,
kendo onge ng’ama ne nyalo kete e bwo lochne.
13Onge tich moro mane otame timo,
kata kane osetho, to ringre ne pod nigi teko mar koro wach.
14E ndalo duto mag ngimane notimo honni,
kendo ne omedo timogi kata kane osetho.
Kwedruok gi sand
15Kata obedo ni mago duto notimore,
jo-Israel ne ok oloko chunygi oweyo richogi
nyaka chop omakgi mi ogolgi e e pinygi,
kendo okegi e pinje duto.
16Joma nok kende ema nodong’, ka gin gi ruoth ma jadhood Daudi.
Jomoko kuomgi ne timbegi long’o e nyim Nyasaye,
to jomoko ne medo timo richo mathoth.
Hezekia
17Hezekia noloso Jerusalem motegno mar siro lweny,
kendo notiyo gi gitich mag chuma
kokunyogo fereji mopowo lwanda,
mokelogo pi e dala,
kendo nokunyo kuonde mikanoe pi.
18E ndalo lochne, Senakerib nomonjo pinye.
Senakerib nooro Rabshake mi obiro osiemo Sayun
kosungore gi duol maduong’ kod nyadhi mathoth.
19Chuny ji nobedo maluor, kendo luetgi notetni,
mi gichalo mana gi dhako ma muoch kayo.
20To ne giywak ni Ruoth Nyasaye mang’won
ka giting’one bedegi malo.
Nowinjogi piyopiyo gie polo, mi oresogi gi lwet Isaya.
21Nyasaye nomiyo malaikane ochwado kambi jo-Asuria, mi onegogi pep.
Isaya
22Timbe Hezekia ne long’o e nyim Nyasaye,
nikech noluwo yore Daudi kwar mare adimba,
kendo noluwo chike Isaya mane janabi maduong’,
kendo mane okoro weche ma adiera.
23E ndalo Isaya, chieng’ nodok chien,
kendo ndalo mag ngima ruoth nomedore.
24Gi teko mar Nyasaye noneno gik mabiro timore,
kendo nokueyo chuny Sayun mane ywak.
25Nohulo gik mabiro timore kapok otimore,
Adier, nofwenyo gik mopondo mane biro timore nyaka chop giko piny.
Currently Selected:
Eklesiastikus 48: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.