Eklesiastikus 47
47
Nathan
1Bang’ Samuel, Nathan nowuok modoko janabi e ndalo loch Daudi.
Daudi
2Kaka ipogo boche kuom ring misango mar sawo
mondo owal ni Nyasaye,
e kaka Daudi bende nowal e kind yawuot jo-Israel.
3Notugo gi sibuoche mana ka gima gin nyidiek,
kendo notugo gi ondiegi mana ka nyirombe.
4Kane pod en rawera, nonego ng’at marabet,
mi oreso joge kuom wichkuot mane gin go.
Nodiro kidi gi orujrene, mi ogoyo Goliath,
kotieko nyadhi mane osungorego.
5Nokwayo Nyasaye Maduong’ Moloyo,
mi Nyasaye nomiyo bade ma korachwich teko
mondo oneg jalweny mathwon kendo omi joge olo wasikgi.
6Kuom mano, ji ne opake ka ng’ama onego ji gana gi gana,
kendo ne gipwoye ka gimiyo Ruoth Nyasaye duong’.
7Kane osesidhne osimbo mar ruoth,
nodwoko teko mag wasike piny kuonde duto,
kendo noloyo jo-Filistia ma wasike,
mi tekogi orumo nyaka chil kawuono.
8Kuom timbene duto, nogoyo erokamano ni Nyasaye Maduong’ Moloyo, komiye duong’
Nowero wende pak gi chunye duto,
nikech nohero Nyasaye ma Jachuechne.
9Noketo jogo thum mondo ower wende mamit, ka gigoyo thum e nyim kendo-mar-misango.
10Nomiyo ndalo moyiedhi obedo gi duong’,
kendo nochano sewni mosiko, mitimo e higa ka higa,
mondo ji opak nying’ maduong’ mar Ruoth Nyasaye,
kendo mondo Kama Ler opong’ gi wende pak,
chakre gokinyi nyaka otieno.
11Ruoth Nyasaye noweyone richone,
kendo noguro lochne nyaka chieng’,
kosingorene ni nyikwaye nobed ruodhi bang’e,
kendo nomiye loch man gi duong’ e Israel.
Solomon
12Daudi nonywolo wuowi mariek ma nyinge Solomon,
mane obedo ruoth kare,
kendo mane odak gi kue nikech wuon mare.
13Adier, Solomon nobedo ruothe ndalo mag kue,
nikech Nyasaye nomiye kue kuonde duto,
mondo obed gi thuolo mar gero ot
obed Kama Ler mosiko nyaka chieng’
komiyogo nying Nyasaye duong’.
14In Solomon, kane in rawera niriek ahinya,
kendo chunyi opong’ gi rieko ka aora mopong’ madwaro mwomo genge.
15Riekoni nolandore kuonde duto,
mi opong’o piny gi ngeche kod weche matut mopondo.
16Humbi nochopo nyaka chulni man kuonde maboyo
kendo ji noheri nikech ne in gi loch mar kue.
17Dhoudi duto nowuoro wendeni, gi ngecheni, gi sigendi,
kod dwoko mane idwokogo ji.
18E nying Ruoth Nyasaye, miluongo ni Nyasach Israel,
nichoko dhahabu gi fedha mathoth,
mana ka gima gin chumbe moko nono.
19To nichiwori ni mon,
kimiyogi loch kuomi nikech gombo mar ringri,
ikelo chandruok ni nyithindi kod nyikwayi,
21kendo gima nitimono, nomiyo jo-Efraim okawo lochgi githwon,
mi pinyi opogore diriyo.
22To Ruoth Nyasaye ne ok oweyo bedo mang’won,
kendo ne ok oketho singruokne kata achiel.
Ne ok oketho dhood ng’at ma en ema noyiero.
Adier, ne ok otieko nyikwa ng’ama nohere.
Kuom mano, noweyo joma nok odong’ ni Jakobo,
kendo noweyo ni Daudi nyakware achiel.
Rehoboam
23Solomon notho moluwo kwerene, kendo noweyo wuode kare.
Wuodeno ne nyinge Rehoboam, to ne en ng’ama ofuwo moloyo e pinye.
Ne oonge gi rieko, kendo timbene nomiyo jo-Israel opiem kode.
Jeroboam
24Jeroboam wuod Nebat nomiyo jo-Israel odoko joketho,
kochiko jo Efraim e yo marach.
Chakre kanyo, richogi nomedore moloyo
nyaka noriembgi e pinygi,
nikech ne gichiwore ni yore duto mag richo,
nyaka kum moa kuom Nyasaye nojukogi.
Currently Selected:
Eklesiastikus 47: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.