Eklesiastikus 46
46
Joshua
1Joshua wuod Nun ne jalweny mathwon,
kendo nomiye tich koro wach bang’ tho Musa.
Kaka tiend nyingi mar Joshua en jawar,
e kaka nobet jawar maduong’ mar jo-Nyasaye.
Noloyo wasike mane monjogi,
kendo notero jo-Israel e piny mane owalnigi ka gir keni margi.
2Mano kaka ne en gi duong’,
koting’o bade kosiemo mier gi ligangla!
3Chutho onge ng’ama ne nyalo sire,
nikech nokedo lwenje mag jo-Nyasaye.
4En ema nomiyo wang’chieng’ ochung’,
komiyo odiechieng’ achiel budho maromo gi odiechienge ariyo.
5Kane wasike othung’e kuonde duto,
nokwayo Nyasaye Manyalo Gik Moko Duto,
kendo Ruoth Nyasaye nowinjo kwayone,
mi nomiyo pe madongodongo ochue.
6Nogoyo wasigugo, monegogi ka giringo gia e got
mondo dhoudi duto ong’e tekone,
kendo ging’e ni Ruoth Nyasaye ema orite,
7nikech oluwo Nyasaye Manyalo Gik Moko Duto gi chunye duto.
Kaleb
E ndalo Musa, Joshua gi Kaleb wuod Jefune nokwero paro mar oganda duto,
ka ginyisogo ni gin joadiera.
Ne gimono ji timo richo
ka gikwerogi mondo giwe marach mane oyudo ging’urgo.
8Emomiyo ji ariyogo kende ema nokwo
kuom ji alufu mia auchiel mane nie wuoth,
kendo notergi e piny momew man gi chak gi mor kich mang’eny.
9Ruoth Nyasaye nomiyo Kaleb teko
mane osikogo nyaka nodoko moti.
Kuom mano, nomako piny gode
kuma nyikwaye pod odakie nyaka chil kawuono.
10Kamano jo-Israel duto ne nyalo neno malong’o
kaka luwo Ruoth Nyasaye en gima ber.
Jong’ad Bura
11Bang’ mano ne nitie jong’ad bura,
ma moro ka moro nigi nying marahuma.
Onge ng’ato kuomgi mane chunye olokore,
mi okwedo Ruoth Nyasaye.
Omiyo kwaparogi to ber mondo wapak nyingegi.
12Chokegi mondo okel ngima manyien gie lietegi kuonde ma giriere
kendo nyingegi omed yudo duong’ nikech pak mipakogo nyikwagi.
Samuel
13Samuel ne en ng’ama Ruoth Nyasaye ohero,
kendo ne en janabi mar Ruoth Nyasaye,
mane oketo Ruodh jo-Israel mokwongo,
kendo nowiro ruodhi gi mo mondo orit jo-Nyasaye.
14E kinde duto mane ong’adoe ni ji bura
kaluwore gi chik Nyasaye,
Ruoth Nyasaye ne rito joka Jakobo maber.
15Ji ne oyie ni en janabi nikech ne en jaadiera,
kendo wechene nonyiso ni en janabi maradier.
16Kane wasike othung’e kuonde duto,
nokwayo Ruoth Nyasaye Manyalo Gik Moko Duto,
kendo notimone liswa gi nyarombo mapod dhoth.
17Eka Ruoth Nyasaye nokok gie polo,
kendo duonde nowinjore mana ka polo mamor.
18Nonego jotend wasigu duto, mane gin ruodhi mag jo-Filistia.
19Kane thone chiegni, nokwayo Ruoth Nyasaye,
kaachiel gi ng’ama ne Nyasaye oyiero moketo ruoth,
mondo jobed joneno, kowacho niya,
“Nyaka nene pok akawo kata mana wuoche kaka asoya kuom ng’ato.”
To adier, onge ng’ama ne nyalo ng’eng’e.
20Kata mana bang’ thone nochako mokoro wach,
kohulo ni ruoth ni obiro tho.
Adier, noting’o duonde gie lowo kokoro wach, mondo Nyasaye owe ni ji richogi.
Currently Selected:
Eklesiastikus 46: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.