Eklesiastikus 45
45
Musa
1Kuom nyikwa Jakobo, Nyasaye noyiero Musa,
jatichne mogen mane ji duto oyiego,
kendo mane Nyasaye gi ji ohero.
Ka ji opare, to giluonge ni ng’ama oguedhi.
2Nyasaye nomiye duong’ maromo gi duong’ mar malaika,
kendo nomiye teko mane ogoyo wasike gi kibaji.
3Kane okwayo Nyasaye,
to Nyasaye nomiyo honni mane osebedo ka thago jo-Misri, orumo,
kendo nomiye duong’ e nyim ruodhi.
Bende nomiye Chike mondo omi joge,
kendo nonyise duong’ne maler.
4Ne en ng’ama ogen kendo mamuol,
omiyo Nyasaye noyiere kuom ji duto, mowale ni en owuon,
5kendo noyiene winjo dwonde owuon,
kendo notere e mudho mar rumbi molil.
Noromo kode wang’ gi wang’, komiye chike makelo ngima gi rieko,
mondo opuonj jo-Israel ma nyikwa Jakobo.
Harun
6Nyasaye noyiero Harun kuom joka Lawi.
Ne en ng’ama kare machal gi Musa owadgi.
7Nyasaye notimo kode singruok mochwere
komiye tich dolo ni oganda.
Norwake gi lewni mabeyo, komiyego duong’.
8Adier, norwake maber ahinya, komiye ranyisi mag teko ma en-go.
Lewnigo ne gin: sirwali, gi kandhu, kod law agoko.
9Noketone gik mong’inore ka machunga,
kaachiel gi okode mag dhahabu mathoth e riak kandhune alwora duto,
mondo oywagi kowuotho, kendo owinji e Hekalu,
mondo obed rapar ni joge.
10Nomiye law dolo ma jatueng’o ogoyoe maridadi gi usi mag dhahabu, gi maratiglo, kod makwar.
11Nomiye bende law ng’ado bura makare,
moting’o ombulu miluongo ni Urim gi Thumim,
mane ng’ama olony kuom tueng’o oloso gi usi makwar momin.
Bende nomiye kite ma nengogi tek mochom e dhahabu,
mogorie ranyisi apar gariyo e yo ma igoroe kite miketogo sei,
mondo obed rapar miparogo nying dhout israel.
12Noketne gima olos gi dhahabu mopamore ka san e kilemba,
mogorie ni “Mowal ni Ruoth Nyasaye”,
kaka ranyisi mar duong’ ma en-go.
Ne en gima olos maber ahinya malombo wang’,
kendo ng’ama riek ahinya ema nolose.
13Gik mabeyo ma kamago ne pok obetie nyaka nene,
kendo onge ng’ato moserwakogi,
mak mana yawuot Harun gi nyikwaye nyaka chieng’.
14Gitimo lisweche miwang’o pep diriyo odiechieng’ kodiechieng’, ma ok gilewo
15Musa ema noketo Harun e tije, kowire gi mo maler,
mane obedo ranyisi mar singruok
mane Nyasaye otimo kode gi nyikwaye.
Singruokno en singruok mochwere ni Harun nobed jatich Nyasaye,
kotiyo tich dolo kendo koguedho jo-Nyasaye e nying Ruoth Nyasaye.
16Ruoth Nyasaye noyiere e kind ji duto
mondo otimne liswach ubani gi gik mang’ue ng’ar,
kendo mondo otim misango mag golo richo mag oganda.
17Nomiye Chikne, komiye teko mar ng’ado bura,
kendo nonyise mondo opuonj jo-Israel ma nyikwa Jakobo chikene.
18Jomoko ne opiem kode e thim, nikech ne gitimo kode nyiego.
Ne gin Dathan gi Abiram gi joge, kod Kora gi joge,
mane jobedo kode gi mirima mager.
19Ruoth Nyasaye noneno kamano, kendo ne obedo mosin gi jogo.
Omiyo notimo hono ka en gi mirima mager,
motiekogi gi mach mang’ang’ni.
20Eka nomedo Harun duong’ komiye mich moko moyiedhi,
kendo nowalone cham mokwongo chiek mabeyo moloyo,
mondo Harun obed gi chiemo mang’eny ma ok orem.
21Kuom mano, jodolo chamo lisweche mitimo ni Ruoth Nyasaye,
mane omiyo Harun gi nyikwaye nyaka chieng’.
22To ne ok opogo ni Harun lowo e piny joge,
kendo en kende ema ne ok oyudo pok kuom ji duto,
nimar Ruoth Nyasaye owuon ema obedo ka mwandune gi pokne.
Finehas
23Finehas wuon Eleazar en ng’at maradek kuom duong’.
Notimo kinda mondo Nyasaye oyud duong’,
kotimo chir e kinde mane ji otimoe koko,
kendo kuom mano Nyasaye noweyo ni jo-Israel richogi.
24Mano omiyo Nyasaye notimo kode singruok,
kamiye teko mar rito Kama Ler,
kaachiel gi oganda jo-Israel bende.
Kendo en kod nyikwaye nomigi duong’ mar bedo jodolo madongo nyaka chieng’.
25Kaka Nyasaye nosingore ni Daudi wuod Jesse ma jadhood Juda,
ni wuode gi nyikwaye nobed ruodhi,
e kaka wuod Harun gi nyikwaye bende nomi tich mar bedo jodolo.
26Kamano un jodolo,
Ruoth Nyasaye mondo omiu rieko mar yalo joge gi adiera,
mondo kik gueth ma gin go lal,
to tienge duto mabiro obed gi duong’ ma jo-Israel nigo nyaka chieng’.
Currently Selected:
Eklesiastikus 45: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.