Eklesiastikus 44
44
DUONG’ MAR NYASAYE MINENO KUOM TIMBE JI.
Kwere jo-Israel
1Koro wapak kwerewa marahuma,
mane obedo thuondi mag ogandawa e tiengegi.
2Ruoth Nyasaye osetimo gik mang’eny mowinjore pako,
konyisogo duong’ne nyaka nene.
3Jomoko kuomgi ne gin ruodhi mane ong’ere
nikech ne gin thuondi mager
moko to ne jong’ad rieko mariek, mane koro gik mabiro timore,
4to moko ne tayo ji ka ging’adonigi rieko,
nikech ne gipuonjogi gi rieko,
5Moko ne olony kuom goyo thumbe, ken do kuom chuogo wer
6Moko to ne jopith marateke, mane odak e miechgi gi kue.
7Jogo duto ne nigi duong’ e ndalogi,
kendo ne gikelo ni ogandagi duong’.
8Moko kuomgi noweyo nying man gi huma,
ma pod ipako nyaka chil kawuono.
9To moko kuomgi ok par kendo giselal,
ka gichalo joma ne ok nitie.
Adier, gichalo joma ne ok onywol ngang’,
kendo nyithindgi mane oluwo bang’gi bende chalo kamano.
10To koro adwaro chano nying jomoko ma jo adiera,
ma timbegi mabeyo wich ok osewilgo.
11Mwandu osiko e dhoutgi,
kendo ne gilamo ni nyithindgi gikeni maggi.
12Nyithindgo osiko ka rito singruok mane Nyasaye otimo gi ogandawa,
kendo nyikwagi bende osiko ka rito singruokgo.
13Nyinggi nopar nyaka chieng’, kendo humbgi ok nolal ngang’.
14Ringregi ne oyiki gi kue, to nyinggi nosik nyaka chieng.
15Ogendini mamoko noland riekogi, kendo oganda jo-Nyasaye nopakgi.
Enoka
16Enoka ne long’o e nyim Nyasaye,
emomiyo notere e polo
mondo obed ranyisi ni tienge mabiro
mondo gilokre giwe richogi.
Nowa
17Nowa ne oyud ni en ng’ama kare chutho,
emomiyo nolokore wuon ji duto e ndalo mag sand,
kendo kane pi oimo piny,
to en ema nomiyo jomoko manok otony.
18Nyasaye notimo kode singruok mochwere,
ni pi ok nochak otiek gik mangima kendo.
Ibrahim
19Ibrahim en kwar dhoudi mathoth,
kendo onge ng’ama osebedo gi duong’ marom kode.
20Norito chik Nyasaye Maduong’ Moloyo, kendo notimo kode singruok,
kendo kane oyudo tem, to ne ok oweyo yie ma en-go kuom Nyasaye.
21Kuom mano, Ruoth Nyasaye nosingorene,
kokuong’ore ni nyikwaye nokel ni ogendini duto gueth,
kendo ni enomed nyikwaye obed mang’eny ka kuoyo,
kendo ni enoting’gi malo ka sulue,
kendo ni enomigi piny malach,
chakre e nam ma yo podho chieng’ nyaka nam ma yo wuokchieng’,
kendo chakre aora maduong’ mar Yufrate, nyaka chop tung’ piny.
Isaka gi Jakobo
22Isaka bende ne Nyasaye omiyo singruok nogo
23mana nikech Ibrahim wuon mare,
kosingore ni obiro kelo ni ogendini duto gueth.
Bang’e nomiyo Jakobo bende singruok, kendo nogure motegno,
komiyo nyikwaye piny Kanaan mondo obed mwandugi.
Nopogo pinyno kidienje kidienje, mondo omi dhoudi apar gariyo.
Currently Selected:
Eklesiastikus 44: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.