Eklesiastikus 43
43
Chieng
1Mano kaka polo mambulu kendo maler ber manadi!
En gima ber neno ahinya!
2Ka chieng’ wuok, kochako wuodhe, to owacho ni,
“An e hono moa e lwet Nyasaye Maduong’ Mooloyo.”
3To kochope e dier polo tir to owang’o piny,
kendo onge ng’ama nyalo siro lietne.
4Ng’ama chwako mach e kendo winjo liet mach,
to chieng’ wang’o gode nyadidek moloyo mano,
kogolo pilni mag mach, kendo korieny kendo otaro wang’.
5Mano kaka Ruoth Nyasaye duong’, nikech en ema ne ochueye,
kendo en ema ochike e yo moluwo.
Due
6Due bende Nyasaye nochueyo,
mondo opog dueche kod ndalo.
7Due ema nyiso ndalo sewni,
kendo kosepong’ to lerne dok chien.
8Dueche mag higa iluongo ni due,
nikech due ema nyiso chakruokgi gi gikogi.
Yo ma lerne medore en gima iwuoro,
kendo ka orieny e polo kamano, to onyiso sulue yo ma onego giluw.
Sulue
9Sulue miyo polo nenore maber.
Adier, gilicho polo mane Nyasaye oguro malo.
10Gichung’ karegi kaka Nyasaye Maler ochikogi,
ka ok gilew kata dichiel.
Lihudu
11Neye lihudu, kendo ipak Jachuechne!
Onenore maber ahinya, kochalo gi atung’ maduong’ miwuoro,
ma Nyasaye Maduong’ Moloyo oywayo e kor polo.
Honni mineno e piny
13Nyasaye ema chiko pe mondo olwar,
kendo ooro mil polo mondo otim gima odwaro piyopiyo.
14Kamano bende koyawo kuonde kendo mage,
to boche polo wuok kahuyo ka winy.
15Odhuro boche polo pidhe pidhe gi tekone maduong’,
eka ong’inyogi matindotindo mondo gilokre pe malwar.
16aKa gode onene, to giyiengni,
17akendo ka ponde mor, to piny wuo
16bNyasaye ema omiyo yamb Imbo
17bkata yamb Nyandwat kata kalausi kudho,
mana kaka en ema odwaro.
18Okiro theluji#43.18 Theluji en gima ngich malwar koa e polo, machalo pamba. mi pi piny mana ka winy,
kata ka rumbi mar det bonyo.
Ka ji onene, to giwuoro kaka gin rachar dhiriri,
kendo omiyo chunygi wuoro kaka olwar.
19Nyasaye omiyo tho moko e lum, mi lokre pe,
kendo nenore mana ka chimbi moyar piny,
kendo kosepoto kamano, to lekene ochikore mana ka kuthe.
20Ka yamb Nyandwat mang’ich kudho,
to wi pi lokore pe koumo nembe duto,
kendo pi rwakore kode mana ka ng’ama orwakore gi law akor.
21Nyasaye mwonyo gode kendo rewo thimbe,
kowang’o lum mana ka mach.
22Bang’ oro, to boche polo miyo piny doko maber piyopiyo,
nikech koth moa kuomgi osekueyo liet mar piny.
23Nyasaye nokweyo ataro gi riekone kod tekone,
kendo noketoe chulni mana ka ng’ama kiro kodhi.
24Joma wuotho e nam gi yiedhi,
gano ni ji sigendini ma gineno,
kendo kwawinjo wechegigo, to wawuoro,
25nikech e nam kuro bende nitie gik malich miwuoro,
kod gik mangima mopogore opogore mang’eny kendo madongo ahinya.
26Nyasaye miyo gik moko duto chopo kare mana kaka odwaro,
kendo wachne ema miyo gik moko duto osiko.
27Kata ka wamedo weche mang’eny machal nadi,
to pod wechewa rem arema,
omiyo wanyalo riwo weche duto e wach achiel ni:
Nyasaye e gik moko duto.
28Ere kuma dwayudie teko mwapakogo Nyasaye kaka owinjore?
Nikech en Ruoth maduong’ moloyo gik moko duto mane ochweyo.
29En Ruoth malich kendo maduong’ moloyo,
kendo en gi teko mar timo honni.
30Pakuru Ruoth Nyasaye kaka unyalo,
to nyaka ung’e ni onge pak maduong’ moromo gi duong’ne maler.
Adier, pakeuru gi tekou duto, kendo kik uol,
to ng’euru ni kata da upake gi pak machal nadi,
to pod ok unyal miye pak morome.
31Ere ng’ama oseneno Nyasaye, mondo onyiswa ane kaka ochalo?
Koso ere ng’ama nyalo miye duong’ mowinjore kode?
32Wasewinjo mana tijene manok kende,
to nitie timbene mopondo mang’eny kendo madongo moloyo mago!
33Ruoth Nyasaye ema ne ochueyo gik moko duto,
kendo en ema omiyo joma oluore rieko.
Currently Selected:
Eklesiastikus 43: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.