Eklesiastikus 42
42
1To bende nitie gik moko ma ok onego omiyi wichkuot,
nimar ka gimiyi wichkuot, to inyalo timo richo,
mana nikech iluoro gima jomoko paro.
Kamano, kik ibed gi wichkuot kuom:
2mako Chik Nyasaye Maduong’ Moloyo gi singruokne,
kata kuom ng’ado bura mana nikech iluor ni
dipo ka iweyo ng’ama ok oluoro Nyasaye monego yud kum,
3kata kuom pogo chudo mar wuoth maromre gi jawuodhi,
kata kuom pogo gi oweteni mamoko mwandu molamnu
4kata kuom bedo gi ratil mapimo kare,
kata kuom yudo ohala manok kata mang’eny,
5kata kuom yudo ohala kuom gik ming’iewo,
kata kuom chiko nyithindi motegno,
kata kuom chwado misumba ma jaketho nyaka rembe chuer.
6Ka in gi dhako ma ok inyal geno,
kata ka in gi jotich mang’eny,
to ber kiloro kar kenoni,
7kendo kigolo gik moko kar keno,
to nyaka ikwangi kendo ipimgi,
bende pesa duto miyudo kata michulo,
nyaka ikwan kendo indik e kitabu.
8Kik wiyi kuodi kuom kuero ng’ama onge rieko kata ng’ama ofuwo,
kata kuom siemo ng’ama ofuwo moti ma jakisech nyiri.
Kitimo kamano, to ininyis ni in ng’ama riek e weche duto,
kendo ji duto noyie kodi.
Parruok ma nyako kelo ni wuon
9Nyako mono wuon mare nindo, to en ok ong’eyo kamano.
Adier, paro ma wuon nyako nigo kuom nyare mone nindo.
Kapod nyako tin,
to wuon mare parore ni kamoro ok obi yudo dichwo,
to kosekende, to chuny wuon pod thagore,
koparo ni kamoro chwore ok bi here.
10To kapod en nyako, to oluor ni dipo ka ng’ato oketho kode,
mi omako ich e dalane.
To kata kosekende, to oluor ni kamoro onyalo doko jabayo,
kata onyalo bedo migumba.
11Ka wi nyari tek, to bed motang’,
dipo ka omiyo joma mon kodi onyieri,
kendo jogweng’ duto diwuo kuomi, ka ketho nyingi,
mi ibed gi wichkuot e nyim ji duto.
12Kik iyiene ogol chiane oko ni ji,
kendo kik iyiene obudhi gi mon,
13nikech kaka olwenda wuok e law,
e kaka nyiek mon bende wuok kuom mon.
14Ber bedo gi ng’ama dichwo, kata da bed ni en ng’at makoch,
moloyo bedo gi dhako, kata da bed ni en dhako mang’won,
nikech dhako ema kelo wichkuot gi achaye.
Duong’ mar Nyasaye mineno kuom gik mochue
15Koro adwaro paronu tije Ruoth Nyasaye,
kendo hulonu gik ma aseneno.
Wach Ruoth Nyasaye emamiyo tijene duto betie,
kendo en ema chuech duto winjo wachne.
16Kaka ler mar chieng’ opong’o gik moko duto,
e kaka duong’ maler mar Ruoth Nyasaye
bende opong’o chuechne duto.
17Ruoth Nyasaye ne ok omiyo kata mana malaikane maler
teko mar hulo wach gik miwuoro duto
mane oguro motegno gi tekone manyalo gik moko duto,
mondo gik moko duto mochue ochung’ motegno e nyim duong’ne.
18Nyasaye Maduong’ Moloyo oseneno chuny dhano nyaka iye,
kendo osefwenyo yore dhano moyuothore,
nikech ong’eyo gik moko duto,
kendo oneno ranyisi manyiso gik mabiro timore
e higni duto mabiro.
19Ohulo gik mosetimore, kendo mabiro timore,
kendo ofwenyo ndach gik mopondo.
20Onge paro kata achiel manyalo geng’orene,
kendo onge wach kata achiel ma ok ong’eyo.
21Oketo chik machano tije miwuoro mane oloso gi riekone.
Entie nyaka nene kendo nyaka chieng’,
bende onge gima inyalo medone kata minyalo kawo kuome,
kendo ok odwar jang’adne rieko.
22Tijene duto beyo sidang’, kendo lombo wang’ ndi,
23gingima giduto, kendo gisiko nyaka chieng’,
kendo kinde duto giwinjo wachne.
24Gik moko duto biro ariyo ariyo, ma achiel opogore gi wadgi,
kendo onge gimoro ma Nyasaye ochueyo ma gimoro oremo,
25to gimoro achiel miyo machielo bedo maber moloyo.
Kata ka ng’ato orango duong’ mar Nyasaye nyaka chieng’,
to mano pod ok nyal rome.
Currently Selected:
Eklesiastikus 42: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.