Eklesiastikus 41
41
Tho
1A yaye, in tho!
Mano kaka nyingi lich ni ng’ama nigi kue kod mwandu,
maonge parruok, kendo ma yorene duto dhi kare,
bende man gi ngima maber, kendo machiemo gi mor.
2A yaye, tho!
Mano kaka ikelo mor ni ng’ama odhier ma tekone orumo,
kendo moseti, man gi parruok kuom gik mang’eny,
maonge gi mor, kendo ma ok nyal bedo modhil.
3To in, kik iluor tho mochomowa waduto,
to par jogo mosetho moteloni, kod mago mapod biro tho bang’i.
4Ruoth Nyasaye ema nong’ado buch tho ni gik mangima duto,
koro ere gima omiyo ikecho gi gima Nyasaye Maduong’ Moloyo oketo?
Kata da bed ni itieko higni apar, kata mia, kata alufu e pinyni,
to onge ng’ama nodew hikigo e piny jomotho!
Bura mong’adi ni joricho
5Nyithind joketho modak kuonde ma ji timoe richo
gin joma ji ojokgo ahinya.
6Mwandugi lal, kendo nyikwagi nigi wichkuot mosiko.
7Ka wuon nyithindo jaricho, to nyithinde ochaye,
nikech wichkuot mokelonigi.
8Yaye, un joricho moseweyo Chik Nyasaye Maduong’ Moloyo!
9Kane onywolu, ne onywolu joma okuong’,
kendo ka utho, to pod unubed joma okuong’!
10Gik moko duto moa e lowo dok e lowo.
Kamano bende e kaka joma ok oluoro Nyasaye onywol kokuong’,
kendo achien gilal chutho.
11Ji ywago jogi motho,
to nying joricho manono olal.
12Rit nyingi, nimar nodong’ bang’i,
kosiko moloyo pesa gana gi gana.
13Kata mana ngima maber nigi gikone,
to nying maber siko nyaka chieng’.
Bedo gi wichkuot
14Wuoda, mak chikena, eka inibed gi kue.
Rieko mopandi chalo gi mwandu mopandi, nimar giduto gionge gi tich.
15Ng’ama pando fupe, ber moloyo ng’ama pando riekone.
16Bed gi wichkuot kuom gik ma abiro nyisigi,
nikech nitie wichkuot moko ma ok ber kipando,
to bende ji duto ok nyal ng’ado bura kare e weche duto.
17Kapo nii itimo timbe mochido,
to bed gi wichkuot e nyim jonywolni,
18kendo kiseriambo,
to bed gi wichkuot e nyim ruoth, kata e nyim jatelo.
Bende ka in gi ketho, to bed gi wichkuot e nyim jobura,
19kata kisewuondo osiepni kata ng’ama uriworugo e ohala,
to bed gi wichkuot e nyimgi,
kendo kikwelo, to bed gi wichkuot e nyim jogweng’u.
20To par adiera mar Nyasaye, kod singruok mane otimo kodwa,
mondo ibed gi wichkuot kapo ni in gi chike maricho e chiemo,
21kata ka ichiwo mich ni joma ok dwar michgo,
kata kidagi moso joma mosi,
22kata king’iyo ohodho,
kata kijwang’o wadu,
23kata kimayo ng’ato pokne,
kata kisero chi ng’ato.
24Bende bed gi wichkuot kisero nyako ma jatichne,
kendo kik iterri kode.
25Bed gi wichkuot kiyanyo osiepni,
kata kimedo weche maricho ewi mich mimiyo ng’ama odhier,
26kata kilando mbekni miwinjo,
kata kihulo weche mokuodhni.
27Ka gik ma kamago miyi wichkuot, to in gi wichkuot madieri,
kendo ji duto noheri.
Currently Selected:
Eklesiastikus 41: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.