Eklesiastikus 40
40
Chandruok ma dhano neno
1Tich mapek en pok ma ji duto yudo.
Adier, yawuot Adam duto nigi ting’ mapek,
chakre chieng’ wuokgi ei minegi,
nyaka chop chieng’ ma nodwokgi e lowo, ma en min ji duto.
2Ji osiko gi parruok kod luoro e chunygi,
nimar giluoro chieng’ thogi.
Ngima dhano opong’ gi mirima, gi nyiego,
gi parruok, kod luoro mar tho,
3bed ni en ruoth mobet e kome mar duong’,
kata en jadhier mobet e lowo,
4kata en ng’ama rwakore gi lewni maratiglo,
kosidho osimbo e wiye,
kata en ng’ama rwakore gi lep gugru.
5Kata konindo gotieno, to lek kelone mana paro ma kamago,
mak mana ni gibirone e kido mopogore.
6Sa asaya ma nindo ochako tere, to oneno gik malich e lek,
kendo onenogi malong’o mana ka gima onenogi godiechieng’,
kendo gimiyo otetni mana ka ng’ama oringo lweny.
7Ka lekne osechopo kama oyudoe resruok, to ochiew,
kowuoro kaka ne odoko maluor, to kara nende oleko aleka!
8Tho, gi chuero remo, gi goruok, gi lweny,
gi masiche, gi kech, gi chandruok kod tuoche,
e pok ma gik mochue duto yudo, bed ni gin dhano kata le.
9To joketho yudogi nyadibiriyo moloyo.
10Gigo duto nochue ni joketho,
kendo pi mane oimo piny bende nobiro nikech gin.
11Gik moko duto moa e lowo dok e lowo,
to gik moko duto moa e pi dok e nam.
Ngeche mopogore opogore
12Asoya gi timbe mobam duto norum,
to adiera nosiki nyaka chieng’.
13Mwandu mag joketho noduon kaka aora,
kendo nokadhi kaka mor polo kadho ka koth chue.
14Ng’ama ohero konyo joma odhier nobed mamor,
to joketho nolal chutho.
15Nyithind joketho ok nobed mang’eny.
Gichalo gi yien mobedo maricho
nikech tiendegi twi e lwanda matek.
16Odundu motwi e dho aore duto,
nopudh kapok opudh lum mamoko duto,
17to ng’wono chalo gi puodho momew makelo gueth,
kendo konyo joma odhier en gima ber mosiko nyaka chieng’.
Gik mabeyo moloyo
18Ng’ama tiyo tichne owuon, kod ng’ama tiyo matek, gin johawi,
to ng’ama oyudo mwandu, oloyogi giduto.
19Bedo gi nyithindo, kod gero dala maduong’, miyo ng’ato huma,
to yudo rieko loyo mago duto.
Bedo gi dhok kod puoth mzabibu miyo ng’ato ng’ere,
to bedo gi dhako maber loyo mago duto.
20Kong’o gi thum miyo ng’ato mor,
to hero rieko loyo mago duto.
21Thumbe medo mit mar wer, to dwol mamit ber moloyo.
22Wang’ ohero neno chia mar nyako mamuol!
To puodho man gi cham mang’ich ndalo chwiri ber moloyo.
23Ber bedo gi osiep kata wat,
to bedo dichwo gi dhako ber moloyo.
24Bedo gi omine kod jokony ber ahinya ka ng’ato nigi chandruok,
to kony ma ng’ato chiwo kuom ng’wonone ber moloyo.
25Dhahabu gi fedha miyo ng’ato chung’ motegno,
to rieko mong’adi maber, ber moloyo.
26Mwandu gi teko miyo ng’ato bedo gi chir,
to luoro Ruoth Nyasaye ber moloyo.
Ng’ama oluoro Ruoth Nyasaye ok chand gimoro,
kendo ok onego odwar ng’ama konye.
27Luoro Ruoth Nyasaye chalo gi puodho momew makelo gueth,
kendo omiyo ng’ato duong’ moloyo gik moko duto.
Kuecho
28Wuoda, kik ibed jakuecho,
to ber mondo itho moloyo bedo jakuecho.
29Ngima mar ng’ama ng’iyo mana chiemb ng’ama chielo ndalo duto,
ok en ngima kata matin!
Chamo chiemb ng’ato nono kelo wichkuot,
omiyo ng’ama riek mong’eyo chik maber, ok nyal timo gima kamano.
30Kuecho yot ni ng’ama onge wichkuot,
to gikone iye nowang’.
Currently Selected:
Eklesiastikus 40: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.