Eklesiastikus 39
39
Joma osepuonjore
1Ng’ama oketo chunye kuom puonjruok Chik Nyasaye Maduong’ Moloyo opogore gi joma kamago.
Onono rieko mag joma chon,
kendo okawo thuolo malach mondo opuonjre weche jonabi.
2Okano weche mane joma rahuma owacho,
3kendo onono tiend weche mopondo,
bende oparo ngeche, kofwenyo tiendgi maiye.
4Otiyo ni ruodhi, kendo obedo gi joma dongo,
bende owuotho e pinje maoko, kendo oneno ber gi rach mar dhano.
5Omondo chiew kotero chunye ir Nyasaye Maduong’ Moloyo mane ochueye,
kolemo kendo okwaye mondo owene richone.
6Ka Ruoth Nyasaye Maduong’ oyie,
to nomiye chuny mar ng’eyo weche mathoth.
Kuom mano, enohul weche mathoth mag rieko,
mana ka koth machue,
kendo nogoni Ruoth Nyasaye erokamano kolemo.
7Enong’ad rieko ni ji, kendo nopuonjgi,
kendo enopar weche matut mopondo mag Ruoth Nyasaye.
8Enonyis ji rieko mane opuonjore,
kendo enoyud mor kuom Chike mag Singruok mane Ruoth Nyasaye otimo ni joge.
9Ji mang’eny nopak riekone,
kendo wi ji ok nowil kode nyaka chieng’.
Adier, ji ok nowe pare,
kendo nyinge nosiki e tienge ka tienge.
10Dhoudi duto noland riekone,
kendo ji nopake e chikruokgi.
11Kodak aming’a, to nyinge noyud duong’ moloyo nying ji gana gi gana,
to kata kosetho, to pod enowe nying maber.
Jiwo ji mondo opak Nyasaye
12Adwaro medo chiwo parona,
nikech gipong’o chunya mana ka pi aora madwaro mwomo genge.
13Un nyithindo mobidhore, winjuru,
eka unudongi ka maua maber mopidhi e dho aora.
14Ngimau mondo obed ka manemane madum tik mamit,
kata ka maua mayoreyore, kendo keyo tikne kuonde duto.
Ting’uru duondu mondo uwer,
kupako Ruoth Nyasaye kuom timbene duto.
15Adier, miuru nyinge duong’,
kendo landuru duong’ne maler, kuwer kendo kugoyo thum.
Weruru niya,
16“Gik moko duto ma Ruoth Nyasaye osetimo beyo moloyo.
Gik mochiko duto timore mapiyo.”
Kik uwach ni, “Mano ang’o?” kata ni, “Macha ang’o?”
Nikech penjogo duto nodwoki e kinde mowinjore.
17Ka Ruoth Nyasaye owuoyo, to pi gingore ka pith,
kendo wachne loso kuonde ma pi chokoree.
18Kogolo chik, to gik moko duto timore kaka odwaro,
kendo onge ng’ama nyalo geng’o tekone moseresogo ji.
19Oneno gik moko duto ma dhano timo,
kendo onge gima nyalo pondone.
20Oneno gik moko duto nyaka nene kendo nyaka chieng’,
kendo onge gima nyalo bwoge.
21Kik iwach ni, “Mano ang’o?” kata ni, “Macha ang’o?”
nikech Nyasaye nochweyo gik moko duto mondo oti tije mowalnigi.
22Gueth mar Ruoth Nyasaye landore e piny ka pi aora mopong’ moo oko,
kendo miyo piny motwo bedo mang’ich.
23To otoyo mirimbe kuom joma ok ong’eye,
mana kaka notimo komiyo pi mabeyo olokore pi motimo chumbi.
24Oloso ni joma beyo yore mopie mondo giluw.
Yore joricho to oting’o chwanyruok mathoth.
25Nyaka a chakruok, Nyasaye nochweyo gik mabeyo ni joma beyo,
to gik maricho ni joketho.
26Gik madongo ma dhano onego obedgo mondo odag e ngima maber, gin:
pi, gi mach, gi nyinyo, gi kado, gi mogo, gi chak.
27Gigo duto gin gueth ma joma beyo yudo,
to gilokore gik maricho ni joketho.
28Nyasaye nochueyo yembe moko makudho mondo osandgo ji,
kolokogi kiboko motoyogo mirimbe.
Ka chieng’ bura ochopo, to giolo tekogi oko,
ka ginyiso mirima mager mar Jachuechgi.
29Nyasaye nochueyo mach, gi pe, gi kech, gi tho,
mondo obed gik ma osandogo ji.
30Ondiegi mager, gi thomoni, gi thuonde,
kod ligangla machulo kuor ka nego joricho,
31yudo mor ka gitimo gima Nyasaye dwaro.
Giikore ndalo duto mondo gitine e piny, kendo ka ndalogi ochopo, to ok gitamre winjo wachne.
32Nyaka a chakruok aseng’eyo ni wechego duto gin adier,
omiyo aseparogi ahinya, kendo asendiikogi.
33Tije Nyasaye duto beyo,
kendo ochiwo gik madwarore e sa mowinjore,
34Kik uwach ni, “Mae rach moloyo macha”,
nikech gik moko duto beyo ka ndalogi ochopo.
35Emomiyo weruru matek gi chunyu duto,
kupako nying Ruoth Nyasaye.
Currently Selected:
Eklesiastikus 39: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.