Eklesiastikus 38
38
Tuoche gi yien mithiethogo
1Nyaka imi jathieth duong’ mowinjore kode, kigoyone erokamano kuom tije,
niech en bende Ruoth Nyasaye ema nochueye.
2Rieko mar thieth oa kuom Nyasaye Maduong’ Moloyo,
kendo oyudo mich moa kuom ruodhi mag piny.
3Rieko jathieth miye duong’, kendo ruodhi oluore.
4Ruoth Nyasaye nomiyo yien mathiethogo otwi e lowo,
kendo ng’ama riek ok okawogi ka gik manono.
5Donge yath mane oloko pi odoko mamit chande nonyiso ni yath nigi teko?
6Ruoth Nyasaye bende miyo ji rieko ni
mondo gikonyre gi timbene madongo, kendo gimiye duong’.
7Ruoth Nyasaye konyo ji gi yien
mondo giyud ngima kendo kik giwinj rem.
Kamano jaruw yien losogi mondo gilokre yath mithiethogo.
8Kuom mano, tich Nyasaye onge gikone,
kendo en ema omiyo ji bedo mangima e piny duto.
9Wuoda, kituo, to kik ibed gi kuyo,
to kwa Ruoth Nyasaye, kendo enokonyi.
10Lokri iwe richoni, kendo kik itim gimoro marach,
kendo ipwodh chunyi kuom richoni duto.
11Nyaka itim liswach ubani kaachiel gi mar mogo mayom mondo Nyasaye oparigo,
kichiwo chiwo maduong’ kaka inyalo.
12Eka iluong jathieth, nimar en bende Nyasaye ochueye,
kendo kik iyie oweyi, nikech onego obed kodi mondo okonyi.
13Kamoro jathieth nigi teko mar chango ng’ato,
14nikech en bende obiro kwayo Ruoth Nyasaye
mondo omiye teko mar kweyo rem kendo mar chengo,
mondo dhano obed mangima.
15Ka ng’ato oseketho e nyim Jachuechne,
to mondo odwar jathieth othiedhe.
Kuyo
16Wuoda, ka ng’ato otho, to ywage.
Adier, ywagi kinyiso ni in gi mirima mathoth.
Yik ringre kaka owinjore, kendo kik icha liende.
17Ywag malich kisedo,
kendo iywage kuom odiechieng’ achiel kata ariyo,
kaka owinjore kode, mondo kik ji kuodhi.
To bang’e iho chunyi mondo mirimbi orum,
18nikech mirima nyalo nego dhano,
kendo chuny mokuyo tieko tekruok.
19Kuyo nyaka rum ka osetim sap liel,
nikech siko gi kuyo ketho chuny.
20Kik iyie kuyo lo chunyi,
to riembe mabor kiparo ni in bende ibiro tho.
21Kik wiyi wil ni ng’ama otho ok duogi.
In ok inyal konye, to inyalo mana hinyori iwuon.
22Ng’e ni inibed kaka en.
En ema kindene ochopo kawuono,
to in mari kiny nochop kiny.
23Ka ng’ama otho osedhi yueyo, to wich mondo owil kode.
Omiyo ka chunye osedhi, to in bende mondo chunyi obed gi kue.
Tich lwedo
24Bedo gi kinde malach ma tich moro onge
ema miyo japuonj Chik thuolo mar yudo rieko.
Adier, ka ng’ato dwaro yudo rieko,
to ok onego obed gi tije mang’eny.
25Ere kaka ng’ama puro gi dhok, ma paro mana rundo jaridi,
nyaka doko ng’ama riek?
Ochiko dhok mopurogo, koketo chunye e tich,
kendo owuoyo mana kuom jamni kende.
26Oketo chunye kuom kiepe mag puodho mopuro,
to godhiambo bang’ pur omiyo nyiroye chiemo.
27Jochuecho gi jopecho duto bende chal kamano,
ka gitiyo matek odiechieng’ gotieno.
Joma goro kido e tere migoyogo sei otimo kinda ndalo duto mondo gifweny kido manyien,
kendo giketo chunygi mondo gilos kido machal chutho gi kido moselosi.
28Jatheth bende chalo mana kamano.
Obet but nyinj theth, koketoi chunye kuom gima othedho;
much mach rewo dende konyagore gi tich,
kendo koko mar nyundo odino ite,
kendo wang’e ng’iyo gima otemo loso kite.
Adier, oketo chunye kuom tieko tich,
kendo onindo bedo mondo otieke maber.
29Jachuech lowo bende chalo mana kamano.
Obet piny ka tiende wiro ndik chuech,
kendo ojiwo chunye e tich sa duto,
koparo kaka onego lwetene gwenyre.
30Onywaso chwodho gi lwete, kokulore ni mondo oyud teko,
kendo oketo chunye mondo olos kang’e gima ochueyo obed mapoth kendo manyiwni.
Bang’e onindo bedo koyweyo kendo ma owang’oe gik ma osechweyo.
31Joma kamago duto ogeno kuom lwetgi,
kendo moro ka moro olony kuom tije.
32Ka da gionge, to onge dala ma dibed gi ji modakie kendo mawuothoe.
33To kata kamano, joma kamago ok yier mondo obed jobura.
Kendo ok gibed jotelo e chokruok.
Bende ok gibed jong’ad bura,
kendo ok ging’eyo chike miluwo king’ado bura.
34Ok gin joma nyalo puonjo ji,
kata ng’ado rieko bende ok ging’adi,
kendo ok gin joma chuogo ngeche.
To kata kamano ka gionge to piny ok nyal chung’ motegno,
kendo tijgi mapile e lemo ma gilamogo Nyasaye.
Currently Selected:
Eklesiastikus 38: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.