Eklesiastikus 37
37
Osiepe ma jowuond
1Ng’at moro amora nyalo wacho ni, “An bende an osiepni.”
To osiepe moko gin osiepe mana gi nying kende.
2To mano kaka en gima lit ahinya, ka osiep moher olokore jasigu!
3To ere kama gombo mar timo richo noaye?
Yaye! Mano kaka opong’o piny gi ndhogruokne!
4Ng’at moro ohero osiepne mana ka en gi mwandu,
to ka osiepneno oyudo chandruok, to okwede.
5Ng’at machielo to riwore gi osiepne e ndalo chandruok mondo oyud chiemo,
to kata kamano, ka lweny owuok, to okonyo osiepneno.
6Kik wiyi wil gi osiepni mosekedo lwenjeni,
kendo kiseyudo mwandu, to nyaka ipare.
Jong’ad rieko
7Jang’ad rieko ka jang’ad rieko,
wacho ni rieko mong’ado ema ber,
to moko kuomgi ng’ado mana rieko makonyogi giwegi.
8Omiyo bed motang’ ni ng’ama ng’adoni rieko,
kendo mokwongo nyaka ing’e gima en owun odwaro,
nikech onyalo ng’ado rieko mokonyorego mana en owuon,
to in to riekono ok konyi.
9Onyalo wacho ni, “Yoreni beyo.”
To kata obedo ni owachoni kamano, to nyaka iter mos,
mondo ine ane gima biro timoreni!
10Kik idhi ir ng’ama ok ogeni mondo ong’adni rieko,
kendo pand yoreni ni joma nigi nyiego kodi.
11Kik ikwa dhako mondo ong’adni rieko kuom nyieke,
kata kik ikwa jaluoro mondo ong’adni rieko kuom lweny,
kata jaohala kuom nengo gik midwaro ng’iewo kuome,
kata jang’iewo kuom nengo gik mong’iewo kuomi,
kata jaguondo kuom erokamano, kata ng’ama guol kuom ng’wono,
kata jasamwoyo kuom tich moro amora,
kata ng’ama owak saga, kuom kinde mobiro tiekoe tich,
kata jatich ma jasamuoyo kuom tich matek.
Adier, kik idhi ir joma kamago mondo ong’adni rieko.
12To ber mondo ng’at ma oluoro Nyasaye ema ong’adni rieko,
nikech en ema ong’eyo ni omako chike, kendo chunye chal gi mari,
bende onyalo kechi kiyudo chandruok.
13To bende gen kuom riekoni iwuon,
nikech onge ng’ama inyalo geno kuome moloyo in iwuon,
14nikech chuny ng’ato nyalo nyise gima dihinye
kapok gino otimorene,
moloyo jorit abiriyo mochung’ malo kar rito.
15To moloyo mago duto, onego ikwa Nyasaye Maduong’ Moloyo mondo otayi, iluw yor adiera.
Rieko maber gi rieko marach
16Rieko ema nyaka bed chakruok mar tije duto,
kendo kapok ichako tichh moro amora, to nyaka ipar gima ibiro timo.
17Paro dhano chakore e chuny,
kendo luwo yore ang’wen, ma gin:
18ber gi rach gi ngima kod tho,
to lep ema yiero yo ma ng’ato luwo.
19Kamoro ng’ato riek kuom puonjo jomoko,
to ok onyal konyore owuon kata matin.
20Kamoro ng’ato ong’eyo twak mamit, to ji ok dware,
kendo achien kech ema nege,
21nikech Nyasaye ne ok ohere,
nimar noonge gi rieko ngang’.
22Ka ng’ato riek kuom chano ngimane owuon,
to inyalo geno rieko mong’ado kowuoyo.
23Adier, ka ng’ato riek, kendo opuonjo joge,
to inyalo gene kong’ado rieko.
24Ng’ama riek noyud gueth mang’eny,
kendo ji duto ma onene, noluonge ni jahawi.
25Ndalo mag ngima dhano inyalo kwano,
to ndalo mag oganda Israel okadho akwana.
26Ji nogen kuom ng’ama riek,
kendo nyinge nosiki nyaka chieng’.
Ngima ma e diere
27Wuoda, non dendi ndalo duto mag ngimani,
kendo kik icham gima ineno ni rachni,
28nikech gik moko duto ok winjre gi ji duto,
nimar ji duto ok ohero gik machal.
29Kik iher chamo gik mamit sa duto,
kendo kik ichiem mang’eny.
30Chiemo mang’eny kelo tuo, kendo kuodo ich.
31Wuoro osenego ji mathoth,
omiyo tang’ kode, eka inidag aming’a.
Currently Selected:
Eklesiastikus 37: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.