Eklesiastikus 36
36
Lemo mikwayogo Nyasaye mondo ores jo-Israel
1Ruoth Nyasaye ma Nyasach gik moko duto,
kechwa kendo ng’iwa gi ng’wono,
kendo imi luoro moa kuomi omak ogendini duto.
2Siem ogendini mamoko gi badi, mondo ging’e tekoni.
3Kaka yande isenyisorinigi ni in Ng’ama Ler,
e kaka mondo koro iyie inyisgi tekoni e nyimwa.
4Migi giyie kaka wan waseyie ni,
in Ruoth Nyasaye, e Nyasaye kende, maonge moro machielo.
5Yie ior ranyisi manyien, kendo itim honni manyien,
mondo tekoni maduong’ oyud pak.
6Bed mager, mondo mirimbi otiek joma mon kodi,
kendo ineg wasiki.
7Par singruokni, mondo chieng’ ma nichiko ochop piyo,
kendo imi ji owuo kuom timbeni madongo.
8Or mach mager owang’ joma odong’,
kendo ineg joma timo ni jogi marach.
9Yie ito wiye ruodhi ma wasikwa mawacho ni,
“Onge ng’ato marom kodwa.”
10Chok dhout Jakobo kaachiel,
kendo ichak ikawgi ka mwanduni iwuon.
11A Ruoth, kech jogi miluongo gi nyingi.
Adier, kech oganda Israel, mane ikawo ka wuodi makayo.
12Tim ng’wono ni Jerusalem, dalani maler,
ma en kar betni, miyueyoe.
13Yie mondo Sayun opong’ gi wende mipakigo,
kendo imi odi maler opong’ gi duong’ni.
14Nyis ji duto ni, jogo mane ichueyo nyaka a chakruok gik moko, gin jogi,
kimiyo weche mane okor gi nyingi chopo kare.
15Mi jogo mogeno kuomi pokgi,
kendo ichop weche mane jonabi magi okoro,
mondo ji ong’e ni gin joma wacho adiera.
16A Ruoth Nyasaye, winj lemo ma jotichni kwayigo,
kaluwore gi gueth mane Harun oguedhogo jogi,
17mondo ji duto manie piny ong’e ni
in Ruoth Nyasaye mochwere.
Pogo maber gi marach
18Ich chamo chiemo duto, to chiemo moko beyo moloyo moko.
19Kaka lew dhano pogo ndhath ring’o mopogore opogore,
e kaka ng’ama riek bende fwenyo weche mag miriambo.
20Ng’ama chunye rach kelo chandruok,
to ng’ama riek ong’eyo kaka onyalo chulone kuor.
Yiero
21Dhako nyalo yie mondo dichwo achwoya kende.
Ng’ama dichwo to nyalo hero nyako achiel moloyo nyiri mamoko.
22Chia dhako miyo dichwo mor moloyo gik moko duto.
23Dichwo man gi dhako mawuoyo maber kendo mamuol
en jahawi moloyo chwo moko duto.
24Ka ng’ato okendo dhako, to oyudo chakruok mar mwandu.
Adier, oyudo jakony morome, kendo oyudo siro monyalo siroree.
25Puodho maonge chiel nyaka yaki.
Kamano bende e kaka ng’ama onge dhako en jabayo,
ma dwaro kar dak.
26Onge ng’ama ogeno jabayo moting’o gilweny,
kendo wuotho e mier ka mier.
27Kamano bende ji ok ogeno ng’ama onge ot,
to nindo kamoro amora ma piny oyusonee.
Currently Selected:
Eklesiastikus 36: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.