Eklesiastikus 35
35
Chik gi lisweche
1Mako chik romre gi golo lisweche mang’eny,
kendo ng’ama omako chike golo lisweche mag sawo.
2Ng’ama dwoko erokamano
chal gi ng’ama timo liswa gi mogo mayom,
kendo ng’ama okonyo ng’ama odhier otimo liswa mipakogo Nyasaye.
3Kikwedo richo to Ruoth Nyasaye nomor kodi,
kendo kiweyo timbe mobam, to ichulo gop richoni.
4Kik ichop e nyim Ruoth Nyasaye gi lueti nono,
nikech mago duto gin misengni mochiki mondo itim.
5Ka ng’ama kare owang’o misangone mar bor e kendo-mar-misango,
to tik misangono chopo e nyim Nyasaye Maduong’ Moloyo.
6Liswach ng’ama kare, ber ni Nyasaye,
kendo wiye ok nowilgo nyaka chieng’.
7Chiw ni Ruoth Nyasaye mabup, kimiyego duong’,
kendo kik itim migundia kichiwo cham mokwongo chiek.
8Kichiwo michni duto, to bed mamor,
kendo kigolo achiel kuom apar mag gigi, to bed gi chuny moil.
9Kichiwo ni Nyasaye chiwo mari,
to chiw mang’eny kaka inyalo,
kitimone mana kaka osebedo kotimoni,
10nikech Ruoth Nyasaye chiwo pok maber,
kendo nodwokni nyadibiriyo moloyo kaka imiye.
Adiera mar Nyasaye
11Kik item miyo Nyasaye asoya, nikech ok onyal kawo,
kendo kik igen ni obiro yie gi liswa ma ok ni kare,
12nikech Ruoth Nyasaye en jang’ad bura ma ok oluoro wang’ ng’ato.
13Adier ok oluoro wang’ dhano
ma dimi omi ng’ama odhier chandruok kayiem nono.
Ochiko ite ni ywak mar ng’ama okethne,
14kendo ok ochayo ywak mar nyathi ma kich,
kata mar chi liel, ma ywakne ahinya ni mondo okonye.
15Donge pi wang’ chi liel chuer ahinya,
koywak ni ng’ama miye chandruok?
16Ng’ama tiyo ni Nyasaye gi chunye duto, ema Nyasaye norwaki,
kendo ywakne nochopi e boche polo.
17Lemo mar ng’ama obolore, powo boche polo,
kendo kapok lemone ochopo, to ok onyal yudo kue.
18Adier, ok nowe lemo
nyaka chop Nyasaye Maduong’ Moloyo winj wachne,
mi ng’ad bura maber ni ng’ama kare,
komiyo adiera chopo kare.
19Ruoth Nyasaye ok nodeki, kendo ok noriwre mak okonyogi,
20to noketh teko mar joma ok kech jowadgi,
kendo nochul kuor ni ogendini ma ok oyie kuome.
21Enotiek jolweny mag joma sungore,
kendo enoketh loch mag joricho.
22Enomi ng’ato ka ng’ato pok mowinjore gi timbene,
kendo koyalo timbegi, to enorang paro manie chunygi bende.
23Enoyal wach joge, komiyogi mor, kendo kotimonigi ng’wono.
Ng’wonone kelo mor e ndalo chandruok,
mana kaka rumbi mar koth kelo mor e ndalo oro.
Currently Selected:
Eklesiastikus 35: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.