Eklesiastikus 34
34
Lek
1Geno manono wuondo joma ofuwo,
kendo lek miyo chunygi bedo mamor.
2Ng’ama oyie gi lek, chalo gi ng’ama dwaro mako tipo,
kata ma dwaro lawo yamo.
3Gima ineno e lek chalo gi kido mineno e rang’i.
4Kaka chilo ok nyal nywolo gima ler,
e kaka miriambo bende ok nyal nywolo adiera.
5Weche mokor, gi ranyisi mag gik ma biro timore, kod lek,
gin mana gik manono ka lek mar dhako ma muoch kayo.
6Kik idew gik ma kamago,
mak mana ka giwuok kuom Nyasaye Maduong’ Moloyo.
7Lek osewito ji mang’eny,
kendo joma ogeno kuomgi, ogeno mana kayiem nono.
8Ng’ama mako chik ok onego odonji e miriambo ma kamago,
nikech rieko ma ng’ama kare wacho, oromo chutho.
Wuoth
9Ng’ama jawuoth ong’eyo gik mang’eny,
kendo ng’ama oseneno gik mang’eny wuoyo gi rieko.
10Ng’ama pok owuotho malach e piny ok ong’eyo gik mang’eny,
to jawuoth ong’eyo gima onego otim kinde duto.
11Aseneno gik mang’eny e wuodhena,
kendo asepuonjora gik mathoth moloyo ma anyalo wacho.
12Ne anie masich tho ndalo mang’eny, to nakwo,
13kendo pile Ruoth Nyasaye reso joma oluore,
nimar gigeno kuom ng’ama nigi teko mar resogi.
14Ng’ama oluoro Ruoth Nyasaye ok nyal bet jaluoro.
Adier, ok enobwogi, nikech ogeno kuom Ruoth Nyasaye.
15Mano kaka ng’ama oluoro Ruoth Nyasaye en jahawi,
nikech ong’eyo kuma oyudoe konyruok.
16Ruoth Nyasaye orito joma ohere.
Adier, oritogi motegno kendo ojiwogi moloyo.
Obedonigi ka ohinga mageng’onigi yamo maliet gi chieng’ makech,
kendo oritogi mondo kik gichwanyre, kata kik gipodhi.
17Oduogo chunygi, kendo omiyo wengegi bedo mamor.
Bende ochangogi, kendo omiyogi ngima kod gueth.
Lisweche
18Timo liswa gi gima oyudi e yo marach en achaye;
Nyasaye Maduong’ Moloyo ok dwar mich joma richo,
19Kendo ok omor gi lisweche joma ok oluore.
To kata mana lisweche mitimo ma ok rum ok nomi owe ni ji richogi.
20Timo liswa gi gima oyak kuom ng’ama odhier
chal gi nego nyathi e nyim wuon mare.
21Chiemb ng’ama odhier e ngimane,
omiyo ng’ama omaye en janek.
22Ng’ama omayo wadgi tich mokonyogo ngimane en janek,
kendo ng’ama ok chul jatichne, bende en janek.
23Ka ng’ato ogedo, to ng’at machielo omuko,
ere gima giduto giyudo, mak mana tich matek?
24Kata ka ng’ato olemo to ng’ama chielo kuong’o,
ere ng’ama Ruoth Nyasaye winjo?
25Ka ng’ato opuodhore bang’ mulo ng’ama otho,
to eka ochako omule kendo, ere gima puodhruokneno konyego?
26Kamano, ka ng’ato otueyo chiemo nikech richone,
to eka ochako odhi otimo richo kendo, ere ng’ama diwinj lemo mare?
Koso sand mosandorego konye nang’o?
Currently Selected:
Eklesiastikus 34: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.