Eklesiastikus 33
33
1Adier, ng’ama oluoro Ruoth Nyasaye, ok noyud masira,
kendo kinde moro amora moyudoe chandruok, to Nyasaye norese.
2Ng’ama ok dwar Chik, onge gi rieko,
to ng’ama wuondore ni omako Chik, chal gi yie ma yamo tungo.
3Ng’ama riek ogeno kuom Chik.
Adier, ogene mana ka wach moa e dho Nyasaye owuon.
4Kidwaro mondo ji owinj twak midwaro chiwo,
to nyaka ichan wecheni chon,
kendo ka pok ichiwo dwoko, to nyaka ichan wecheni motelo.
5Paro mag ng’ama ofuwo chalo gi tiend gari.
Adier, parone rundore mana ka nyange.
6Ng’ama ochayo osiepne chal gi faras moil,
maywak aywaka kata ka ng’ama nadi ema oidhe.
Pogruok manie kind gik moko
7Ere gimomiyo odiechieng’ moro ber moloyo machielo,
ka giduto giyudo ler mar chieng’ mana machalre e higa ngima?
8Nyaka ing’e ni rieko mar Ruoth Nyasaye ema opogogi,
kendo en ema opogo higni gi sewni.
9Odiechienge moko noketo mondo obed madongo kendo moyangne,
to moko noketo mondo obed odiechienge achienga.
10Ji duto oa e lowo, kendo kata mana Adam bende nochue gi lowo,
11to Ruoth Nyasaye noketo pogruok e kind ji gi riekone matut,
kendo nomiyo giluwo yore mopogore opogore.
12Moko noguedho komiyo duong’,
kendo moko noyango ni en owuon koketogi machiegni kode.
Moko to nokuong’o kendo nodwoko piny kogologi karegi.
13Ji duto nie lwet Jachuechgi, matimo kodgi kaka ohero,
mana kaka lowo nie lwet jachwecho, machueyo kode gima ohero.
14Kaka ber opogore gi rach, kendo ngima opogore gi tho,
e kaka ng’ama kare bende opogore gi jaketho.
15Kirango timbe duto mag Nyasaye Maduong’ Moloyo’,
to iniyud ka gibiro ariyo ariyo, ma moro opogore gi wadgi.
16Kata mana an awuon ne achiew mogik,
ka achalo ng’ama hulo cham bang’ jokeyo.
17Kuom ng’wono mar Nyasaye nachopo e kinde maber,
mi apong’o decha marom gi jokeyo duto.
18Ng’euru ni ne ok atiyo mana ni an awuon kende,
to natiyo bende ni ji duto madwaro puonjore.
19Un ruodhi, winjuru! Un jotend chokruok, chiknauru itu!
Bedo gi thuolo
20E kinde duto mag ngimani,
kik ichiwri e teko mar wuodi kata chiegi,
kata owadu kata osiepni.
Bende kik imi ng’at moro nono mwanduni,
nikech dipo ka iywago ang’e, kidwaro ni mondo odwoknigi
21Kapod ingima, kendo pod in gi muya,
to kik ichiwri e teko ng’ama chielo.
22Ok ber kigeno kuom kony mar nyithindi,
to ber moloyo ka nyithindi ema kwayi gik moko.
23Bed jatelo kuom gik moko duto mitimo,
kendo kik iwit duong’ mowinjore kodi.
24Ka ndalo ngimani orumo, kendo thoni koro ochopo,
eka ipog mwanduni.
Wasumbini
25Lum gi chwat kod ting’ mapek, e pok ma kanyna yudo,
to makati gi chik kod tich matek, e pok ma misumba yudo.
26To ka idwaro bedo gi kue, to nyaka imi misumbani tich matek,
to obiro chako paro kaka doyud thuolo.
27Jok kod tonde ema iboyogo rwath.
Misumba machach to iboyo gi ratege kod chwat.
28Nyaka imiye tich mondo kik odok jasamuoyo,
nikech samuoyo kelo richo mang’eny.
29Miye tich, nikech mano ema owinjorego,
kendo kotamore winji, to tueye gi ratege.
30To kik ibed makwiny ahinya,
kendo kik itim gimoro ma ok nikare.
31Ka in gi misumba achiel kende, t
o bed kode ka ng’ama uromgo,
nikech ning’iewe gi luchi iwuon.
32Adier, ka in gi misumba achiel kende, to bed kode kaka owadu,
nikech idware mana kaka idwarori iwuon.
33Kapo ni itimone marach mi oringo oa, to ere kuma didhi idwaree?
Currently Selected:
Eklesiastikus 33: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.