Eklesiastikus 32
32
Nyasi
1Ka oketi jatend nyasi, to kik isungri,
to bed abeda kaka achiel kuom welo,
kendo kik ibed piny in iwuon,
kapok ineno ni welo oseikore maber.
2To kisetieko tiji, eka inyalo bedo piny,
mondo in bende ibed mamor kaachiel kodgi.
Kamano iniyud pak kuom timbegi mabeyo.
3Un joma dongo chiwuru twak,
nikech owinjore mondo utim kamano,
to nyaka ung’e gima uwuoyoe, kendo kik uketh thum.
4Ka tugo nitie, to kik uwuo sa duto,
kendo kik inyisri ka ng’ama riek e kinde ma ok owinjore.
5Thum mamit migoyo e nyasi,
chalo gi kidi makwar ma nengone tek, moket e tere mar dhahabu.
6Adier, thum mamit migoyo kimadho kong’o mamit,
chalo gi kidi ma alum maber ahinya, mochom e dhahabu.
7Un rawere, chiwuru twak ka nitie gima onego uwachi,
to ok moloyo nyadiriyo,
to bende kik uwuo mak mana kokwau.
8To kiwuoyo, to wuo mana e wi gima iwuoyoe,
kiwacho weche manok kende,
kendo bed ka ng’ama ong’eyo wach, to ok dwar wuoyo.
9Ka inie kind joma dongo, to kik itimri ka ng’ama rom kodgi,
kendo kik igo mbaka ka ng’ama chielo pod wuoyo.
10Kaka mil polo telo ni morne,
e kaka ji ikore hero ng’ama muol kata ka pok ginene.
11Kidhi e nyasi to nyaka ia e sa mowinjore, to kik ia achien,
kendo idhi pacho ma kik iriwni e yo.
12Kichopo pacho, to eka inyalo timo gimoro amora ma chunyi ohero,
to kik itim richo kisungori.
13Ewi mago duto, onego igo erokamano ni Nyasaye ma nochweyi,
kendo mamiyi gige mabeyo.
Luoro Nyasaye
14Ng’ama oluoro Ruoth Nyasaye, oyie gi kum ma Nyasaye miye.
Nyasaye mor gi ng’ama otimo kinda kadware.
15Ng’ama oketo chunye mondo opuonjre Chik, noyud mor kuom Chik.
Jawuond to noyud mana chwanyruok kuome.
16Joma oluoro Ruoth Nyasaye nofweny gima ni kare,
kendo timbegi makare norieny ka taya.
17Jaketho ok yie mondo onyise kethone,
to odwaro mana weche mochwakogo timbene owuon.
18Ng’ama riek ok ne marach kipuonje,
to jasunga ma ok oluoro Nyasaye onge gi luor.
19Kik itim gimoro ka ok ikwongo iparo maber,
eka bang’e ok inibed gi ywak.
20Kik iluw yo motimo bugni kod kite mang’eny,
nikech dipo ka ichwanyori.
21To bende kata kiwuotho e yo mopie, to kik itugi,
22to bed motang’ king’iyo kama iwuothoe.
23Bende bed motang’ kuom gik moko duto mitimo,
nikech mano e kaka imako Chik.
24Ng’ama ogeno kuom Chik, omako weche duto mag Chik,
kendo ng’ama ogeno kuom Ruoth Nyasaye ok noyud chandruok.
Currently Selected:
Eklesiastikus 32: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.