Eklesiastikus 31
31
Mwandu
1Parruok ma mwandu kelo, mono ng’ato nindo, kendo miyo odhero.
2Kaka tuo matek mono ng’ato nindo,
e kaka thagruok mar chuny bende mono ng’ato nindo.
3Jamoko tiyo matek kochoko mwandu,
kendo koweyo tich, to pod okonyore kod gimoro amora mohero.
4Ng’ama odhier bende tiyo matek, to gige dok mana chien,
kendo ka kinde mar weyo tich ochopo,
to oyudo ni oonge gi gimoro.
5Ng’ama ohero dhahabu ok nyal bedo ng’ama kare.
Adier, lawo pesa miyo ng’ato rwenyo.
6Ji mang’eny osepodho nikech dhahabu,
mi ginwang’o ka masiche ochomogi tir.
7Dhahabu en obeto ni joma lame,
kendo omako joma ofuwo duto.
8Jamoko ma onge ketho, kendo ma ok law dhahabu, en jahawi.
9Ng’ama kamano ema onego wapaki,
nikech otimo gik miwuoro e kind jowadgi.
10Ere ng’ama osekadho temno, mi owuok maber mak oketho?
Ng’ama kamano onego obed mamor nikech wachno.
Ere ng’ama ne nigi thuolo mar ketho, to ne ok oketho?
Kata mar timo richo, to ne ok otimo richo?
11Mwandune nogurre,
kendo ka ji ochokore to ginipak timbene mabeyo.
Nyasi
12Ka in e nyasi ma chiemo ng’enyie,
to kik imwony olawo kiwacho ni, “Mano chiemo mamit manadi!”
13Ng’e ni gombo mar wang’ rach ahinya.
Onge gombo maloyo gombo mar wang’ e piny duto.
Mano emomiyo pi wang’ chuer e sa asya.
14Kik iter lueti kuom lemo ma wang’ ng’ama in wendone oseyiero,
kendo kik ilar kode chiemo.
15Ng’e ni ng’ama ichiemogo nigi siso marom gi mari,
kendo mondo ipar kaka inyalo konye e yore duto.
16Cham gima oket e nyimi ka ng’ama ong’eyo chik adier,
kendo kik iro chiemo, nikech mano dimi ji sin kodi.
17In ema mondo ikwong iwe chiemo,
mondo inenri ka ng’ama ong’eyo chik,
to kik ibed jawuoro nikech ji disin kodi.
18Kichiemo gi ji mang’eny,
to kik ikwongnigi kawo chiemo.
19Ng’ama nigi chik maber ok chiem mang’eny,
omiyo konindo to oyueyo mayom.
20Ng’ama chiemo matin nindo maber,
kendo omondo chiew ka en gi mor.
To puodruok gi ich mokuot, kod ichkach,
gin e pok ma jawuoro yudo.
21To kochuni ni nyaka icham chiemo mang’eny,
to wuog oko mondo ing’ogi eka iwinj maber.
22Wuoda, winj wechena, kendo kik ichaya,
eka achien inine ni awacho adiera.
Gimoro amora mitimo, tim gi rieko,
eka tuo ok nomaki nyaka chieng’.
23Ji pako ng’ama chiembe thoth,
kendo pak mipakogo ng’wonone ni kare
24To jogweng’ duto ng’ur gi ng’ama guol,
kendo achaye ma gichayogo guondone ni kare.
Kong’o
25Kik imadh kong’o mang’eny, mondo eka inyisri ni in dichwo,
nikech math osemiyo ji mang’eny orwenyo.
26Kaka mach fwenyo ber mar nyinyo,
e kaka metho e kind jonyadhi bende fwenyo chuny ng’ato.
27Kong’o miyo ng’ato bedo mojing’, komadho matin maber,
kendo ka kong’o onge, to ngima maber bende onge,
nikech kong’o ne ochwe mondo omi dhano mor.
28Metho moromo e kinde mowinjore kelo chuny mamor,
29to kong’o mang’eny kelo mirima gi ayany kod dhaw.
30Mer miyo ng’ama ofuwo hinyore.
Odwoko tekone chien, kendo okelo goruok.
31Kik idhaw gi wadu kumetho,
kendo kik ichaye ka en gi mor e nyasi,
nikech mano ok en kinde monego iyanyee kata ibandhee.
Currently Selected:
Eklesiastikus 31: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.