Eklesiastikus 30
30
Pidho nyithindo
1Ka ng’ato ohero wuode, to nyaka ochwade pile koketho,
kamano wuode nokelne mor e ndalo mabiro.
2Ng’ama chiko wuode maber noyud gueth kuome,
kendo nying wuodeno nomi obed mamor e nyim jogweng’gi.
3Adier, ng’ama opidho wuode maber, nomi wasike nyiego,
kendo noyud mor nikech en e nyim osiepene.
4Ka en owuon otho, to enochal ka ng’ama pok otho,
nikech oweyo ng’ama chalo kode.
5Kane pod ongima, nomor bedo kode,
kendo ka thone ochopo, to oonge gi parruok,
6nikech oweyo ng’ama nyalo chulo kuor ni wasike,
kendo manyalo duoko erokamano ni osiepene.
7Ng’ama pidho wuode gi ligosi nobed ka tueyo adhonde wuode sa duto,
kendo kata owinjo mana ywak matin nono, to enobed gi kibaji.
8Kaka faras ma ok opuonj maber bedo ma wiye tek,
e kaka wuowi ma ok omi chik maber bende bedo gi wichteko.
9Kipidho nyathi gi ligosi, to chieng’ moro enobwogi,
kendo kitugo kode, to enokelni chandruok.
10Ka ok idwar riwori kode e chandruokne,
to kik inyier kode konyiero,
nikech achien inimuod lekeni!.
11Kapod otin to kik iwene thuolo mar timo gimoro amora mohero,
kendo koketho, to kik iwe mak isieme.
12Nyaka ichike kapod otin, nono to obedo ng’ama wiye tek,
kendo ok dowinji kosedoko maduong’,
kendo enomiyi mirima moloyo.
13Chik wuodi motegno, kendo isik kitimo kamano pile,
nikech dipo ka chieng’ moro ochayi, mi iywak.
Ngima maber
14Ng’ama odhier man gi ngima maber kod teko, en jahawi,
moloyo jamoko machandore gi tuoche.
15Ngima maber kod teko oloyo dhahabu duto,
kendo ringruok motegno ber moloyo mwandu mokadho akwana.
16Onge mwandu marom gi ngima maber mar ringruok,
kendo onge mor maloyo mor ma ng’ato nigo e chunye.
17Tho ber moloyo ngima mar chandruok.
Adier, yueyo ma ok rum ber moloyo midekre.
18Chiemo mabeyo moket e nyim ng’a a dhoge rach chalo gi chiemb liswa moketi e liel.
19Ere tiend liswa motim ni nyasaye manono ma ok nyal chiemo kata ma ok nyal winjo tik moro?
Kamano bende e kaka ng’ama Ruoth Nyasaye sando chalo;
20ong’iyo chiemo kendo oywak, mana ka ng’ama bwoch mokwako nyako!
Mor
21Kik iyie kuyo opong’ chunyi, kendo kik ichandri gi paro mang’eny.
22Chuny mamor miyo ng’ato ngima maber,
kendo omiyo odak aming’a.
23Bed gi ngima mamor kihoyo chunyi, kendo kiriembo kuyo mabor.
Kuyo osenego ji mathoth, bende ok okony gimoro.
24Nyiego gi mirima, ng’ado ngima dhano machwok,
kendo paro mathoth miyo wi dhano ti lwar mana mapiyopiyo.
25Ng’ama mor ohero chiemo, kendo chiemo miye teko.
Currently Selected:
Eklesiastikus 30: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.