Eklesiastikus 29
29
1Ka ng’ato oholo wadgi gimoro to otimo tim ng’wono,
kendo kokonye, to orito Chik Nyasaye.
2Omiyo hol wadu ka en gi chandruok,
kendo ka in ema oholi giimoro, to dwokne gino e kinde mowinjore.
3Chop singruok mitimo kode, kendo bedne jaadiera,
eka iniyud gima idwaro ndalo duto.
4Ji mang’eny kawo gir ahola ka mich,
ka gichando ng’ama ne oresogi.
5Ka ng’ato dwaro mondo wadgi ohole gimoro,
to omiyo wadgino luor kowuoyo kode maber,
kendo opako mwandune ahinya.
To ka oseyiudo gima odwaro,
kendo kinde ma onego odwoke ochopo,
to owuondore gi weche manono, kowacho ni odich.
6Kata kochune mondo ochul,
to jal mabandheno nyalo mana yudo bath gowi matin kende,
kendo okwano ni en jahawi kuom yudo kata matinno.
Ka ng’ato otamore chulo, to mwandu ng’ato ma bandheno olal,
kendo oyudo sigu kayiem nono.
To kata kochudo, to ochudo kokuong’ore kendo koyenyo,
kendo komiyo jabendho wichkuot kar goyone erokamano.
7Kuom mano, ji mang’eny tamore holo wadgi,
to ok gitamre nikech gin joma richo,
to mana nikech ok gidwar mondo owuondgi kayiem nono.
Ng’wono
8Kata kamano, bed mang’won ni ng’ama odhier,
kendo kik imi orit aming’a ka pok ikonye.
9Kony ng’ama odhier, nikech kitimo kamano to irito Chik,
kendo kodwaro gimoro, to kik iriembe odhi gi lwete nono.
10Ber konyo wadu kata osiepni gi pesani,
moloyo kanogi e bur ka nyal chamogi.
11Kan mwanduni kaka Nyasaye Maduong’ Moloyo ochiki,
eka mwandunigo nokonyi moloyo dhahabu.
12Ng’wono ema mondo obed mwandu mikano kar keno ni, mi noresi e chandruok duto.
13Enokonyi kedo gi wasiki moloyo kuot kata tong’ motegno.
Wach chung’ ni ng’ato
14Ng’ama long’o oyie chung’ ni wadgi e gimoro,
mak mana ng’ama onge gi wichhkuot chuth ema nyalo tamore chung’ ni wadgi,
15Kik wiyi wil gi ng’wono ma ng’ama ochung’ ni e gimoro otimoni,
nikech ochiwo ngimane nikech in.
16Jaketho to ok odewo gima timore ni ng’ama ochung’ne,
kendo ng’ama onge gi chuny mar goyo erokamano, wiye wil gi ng’ama norese.
17Chung’ ni ji osemiyo jomwandu mang’eny opodho,
kotungogi ka apaka mag nam.
18Oseriembo joma thuondi e miechgi,
komiyo gibayo e pinje mag jomoko nono.
19Ka jaricho ochung’ ni ji nikech odwaro yudo ohala,
to ibiro donjne e buche mathoth.
20Kony wadu kaka inyalo, to bed motang’ nikech dipo kinyumori!
Bedo gi dala
21Gik ma ng’ato nyaka dwar e ngimane gin:
pi, gi chiemo, gi nanga, kod ot modakie.
22Ber bedo gi chiemo manok e ot marachrach, moloyo bedo gi chiemo mathoth e od ng’ato nono.
23Kiyie ni gik ma in godo oromi, bed ni ging’eny kata ginok,
to ok noluongi ni jawanya.
24Ka ionge gi kar dakni iwuon,
ma omiyo nyaka idhi idag gi jomoko nono,
to in gi ngima marach,
nikech kata ka iling’ aling’a nikech ok in jadalano,
25to iwinjo wichkuot, kiwachoni weche maricho, kaka:
26“In, bi ka, ilos mesa,
kendo ka gimoro ni buti kanyo, to miya acham!”
27Kata ni, “Aye, ichiw thuolo ni wendo moluor,
nikech owadwa biro wenda, omiyo adwaro od welo.”
28Mano kaka en gima lit ni ng’ama riek, kowinjo ni ok idware,
kendo kitimone ka jagowi mapok ochudo.
Currently Selected:
Eklesiastikus 29: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.