Eklesiastikus 28
28
1Ka ng’ato chulo kuor,
to Nyasaye mong’eyo richone duto adimba, bende nochulne kuor.
2Nyaka iwe ni wadu richo motimoni,
eka in bende kilemo to Nyasaye noweni richoni.
3Ka ng’ato osiko gi mirima kod wadgi,
to ere kaka dokwa Ruoth Nyasaye mondo ong’wonne,
4nikech ere kaka ng’ama ok ng’wonni dhano wadgi,
dihomb Nyasaye mondo owene richone owuon?
5Ka dhano adhana matho osiko gi mirima e chunye,
koro ere ng’ama diwene richone?
6Par gikoni mondo iwe sadha.
7Adier, par ni in ng’ama tho, kendo imak chike.
Par chike kendo kik ibed gi chuny marach kod wadu;
par singruok ma Ng’ama Duong’ Moloyo osetimo kodi.
Kendo kik idew rach moro amora ma ng’ato otimoni.
Dhaw
8Bar mabor gi dhaw, eka richoni nodog chien,
nikech jamrima kelo dhaw mang’eny,
9Jaketho thuwo osiepe,
kendo okelo sigu e kind joma yande nigi kue.
10Kaka mach ng’ang’ni kichwake,
e kaka dhaw bende medore kichwake.
Kaka teko ng’ato chalo, e kaka mirimbe bende chalo,
kendo kaka mwandune medore, e kaka mirimbe bende medore.
11Dhaw mowuok apoya moko mach, kendo miyo remo chuer.
12Kikudho pilni mach, to mach liel,
to king’ulo kuome olawo, to otho.
To neye kaka gik moko ariyogo wuok mana e dhogi achielno!
13Jakuoth gi jamriambo mondo okuong’,
nikech giseng’eyo ji mang’eny ma yande odak gi kue.
14Weche ng’at ma donjo e wach ma ok mare oseketho ngima ji mang’eny.
Kendo miyo gisiko gibayo e pinje duto.
Adier, weche ng’at ma kamano oseketho mier moger motegno mag siro lweny,
kendo osemuko ute ruodhi.
15Oseriembo mon mabeyo e utgi,
komayogi pok mowinjore gi tije matek ma gisetiyo.
16Ng’ama chikone ite ok nobed gi chuny mokue,
kendo ok nodag gi kue nyaka chieng’.
17Chwat mar kiboko miyo del remo,
to chwat mar lep turo choke.
18Ligangla osenego ji mathoth,
to lep osenego ji mang’eny moloyo.
19Ng’ama pok lep ohangone wach,
kata ma pok owinjo gerone, kata ting’o jokne,
kendo mapok otue gi ratege mage, en jahawi!
20Jok mar lep en jok mapek ka nyinyo,
kendo ratege mage tek ka mula.
21Tho malep kelo, en tho marach moloyo.
Ber mondo itho, moloyo bedo e teko mar lep!
22To lep ok nyal bedo gi teko kuom joma beyo,
kendo mach mochwako ok nowang’gi.
23Joma kwedo Ruoth Nyasaye nopodh e mach ma lep chwako,
kendo noliel e kindgi mana ka mach ma ok tho.
Nochikre kuomgi ka sibuor, kendo nokidhgi ka kwach!
24Kaka ng’ato chielo puothe gi kudho,
kendo kaka ng’ato loro pesane kar keno motegno,
25e kaka mondo ilos ratil mipimogo wecheni,
kendo iket thigo man gi ralor e dhogi.
26Bed motang’ mondo kik lewi chwanyi,
nikech dipo ka ipodho e lwet wasiki mokiyi.
Currently Selected:
Eklesiastikus 28: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.