Eklesiastikus 27
27
1Ji mang’eny ketho mondo oyud ohala,
kendo ng’ama dwaro bedo jamwandu nyaka wuondre ni ok one gik moko!
2Kaka kede donjo e kind kite ariyo,
e kaka richo bende donjo e kind ng’iepo gi loko.
3Ka ng’ato ok oluoro Ruoth Nyasaye gi chunye duto, to ode nopodh piyopiyo.
Wuoyo
4Ka iyiengo rachungi, to mihudhi donjo e iye,
kamano bende e kaka ka ng’ato wuoyo, to richone fwenyore.
5Mach ema fwenyo kata ka jachue agulini osetiyo maber kata marach.
Kamano bende e kaka wuoyo ng’ato fwenyo kite.
6Olemo mipono e puodho ema nyiso kata ka puodhono ber kata rach,
kamano e kaka weche ng’ato bende fwenyo paro manie chunye.
7Kik ipak ng’ato kapok iwuoyo,
nikech wuoyo ema fwenyo kit ng’ato.
Timbe mabeyo
8Ka iketo chunyi kuom dwaro adiera, to iniyude,
kendo inirwake ka law maber mirwako e nyasi.
9Kaka winy yudore kuma winy machal kodgi nitie,
e kaka adiera bende yudore kuom joma kare.
10Kaka sibuor kiyo gima odwaro nego,
e kaka richo kiyo joketho.
11Ng’ama ber wacho weche mag rieko seche duto,
to ng’ama ofuwo lokore mana ka due.
12Ka inie e kind joma ofuwo, to rang thuolo mondo iwegi,
to kanie e kind joma riek, budh kodgi abudha.
13Twak mag joma ofuwo sino ji,
kendo kata ka gitimo gima rach ahinya, to ginyiero anyiera.
14Weche ma gikuong’orego miyo wich juol,
kendo ka gidhaw, to ji dino itgi.
15Ka josunga dhaw, to remo nyaka chuer,
kendo ayany ma giyanyorego rach moloyo.
Weche maling’ling’
16Ji duto ochayo joma hulo weche maling’ling’,
kendo onge ng’ama dibed osiep ng’ama kamano.
17Her osiepni kendo ibedne jaadiera,
to kapo ni isehulo wachne moro maling’ling’,
to kik ichak iwuoth kode kendo,
18nikech isenego osiep manie kindi kode,
mana kaka ng’ato nego wasike,
19kendo iseweyo opusoreni,
mana kaka ng’ato weyo winyo pusore e lwete,
omiyo ok nichak imake kendo.
20Kik ilawe, nikech osedhi mabor,
kendo oringo mana ka nyakech motony e obeto.
21Adhola inyalo tueyo,
kendo kata ka ng’ato oyanyi, to inyalo weyone.
Ng’at mahulo weche maling’ling’, to ok nyal gen ngang’.
Wuond
22Ng’ama tim mibadhi nenore e wange ochano timbe maricho,
kendo onge ng’ama nyalo geng’e mondo kik otimgi.
23Owuoyo mamit ka un kodgi wang’ gi wang’, kendo opako wecheni,
to kionge, to owuoyo mopogore,
kendo okonyore gi wecheni mondo okethgo nyingi.
24Nitie gik mang’eny ma ajokgo,
to onge gima ojoga maromo gi ng’ama kamano,
kendo Ruoth Nyasaye bende ojok kode.
25Kaka ng’ama odiro kidi malo, goyo mana wiye owuon,
e kaka ka ng’ato ondhogo wadgi to gihinyore giduto.
26Ng’ama okunyo bur, nonyumree owuon,
kendo ng’ama ochiko obeto, nomokie owuon.
27Ng’ama timo richo, richo noduogne kokia kuma giaye.
28Jasunga konyore gi weche malit kod ayany,
to nochulne kuor kokiye kaka sibuor kiyo le.
29Joma mor ka ng’ama kare opodho, nopodh e obadho,
kendo rem nohinggi kapok githo.
Mirima
30Kwinyo gi mirima bende gin gik ma amon-go,
to jaricho ni kodgi giduto.
Currently Selected:
Eklesiastikus 27: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.