Eklesiastikus 26
26
1Dichwo man gi dhako maber en jahawi,
kendo hike nomedre nyadiriyo.
2Dhako maber miyo chwore mor,
kendo enochop ndalo mag ngimane gi kue.
3Dhako maber en mich ma Nyasaye miyo joma oluore.
4Kata ka gidhier, kata ka gin jomwandu,
to ginibed joma mor e chunygi,
kendo wengegi nonyis mor ma gin-go ndalo duto.
5Nitie gik moko adek ma aluoro,
to mar ang’wen ema aluoro moloyo.
Gin: jogweng’ moriwore kuom ketho nying ng’ato,
gi chokruok mar jomahundu,
kod jodonjo ni ng’ato kayiem nono.
Mago duto gin gik maricho moloyo tho
6to dhako matimo nyiego gi dhako wadgi kelo mirima gi kuyo,
kendo ji duto hinyore nikech wechene makwiny.
7Dhako marach chalo gi jok maridho ng’ut dhiang’,
kendo ng’ama temo chike, chalo mana gi ng’ama omako thomoni.
8Dhako momer ketho chuny ji moloyo,
nikech ok onyal geng’o richone.
9Dhako ma jachode ng’ere nikech wang’tekone,
kendo nikech wang’e tar.
10Ka wi nyari tek, to chike matek,
nikech kichike gi muolo, to obiro kethoni.
11Tang’ne nikech wang’e onge luor,
kendo kik iwuor kineno kochayi.
12Kaka jawuoth ma lewe olodhore oko nikech riyo
modho pi apiya moyudo,
e kaka nyarino nochiwre ni ng’ato ang’ata madwaro sere.
Enoyie mondo ng’ato ang’ata okwake,
kendo noyaw olalone ni asere moro amora.
13Dhako man gi chia miyo chwore mor,
kendo timne mabeyo bende medo chwore teko.
14Dhako ma wechene nok en mich moa kuom Nyasaye,
kendo timne mabeyo ok nyal ng’iew gi pesa.
15Dhako mobidhore nigi chia malong’o ngang’.
Onge ratil minyalo pimgo chunye kaka long’o.
16Chia mar dhako maber modak e ot moik maber,
chalo gi chieng’ mawuok ewi gode mag Ruoth Nyasaye.
17Lela wang’ maber manie ringruok mochue maber
chalo gi taya marieny ewi rachung taya manie Hekalu.
18Ogwalo mabeyo mochung’ e tielo motegno,
chalo gi sirni mag dhahabu mogur e mise mag fedha.#26.18 26.19-27 ok yudre e kitepe moko mane ondik chon ahinya.
Gik machido chuny dhano
28Nitie gik moko ariyo mamiyo chunya lit,
to nitie mar adek mamiya mirima.
Gin: jalweny ma kech dwaro nego,
gi joma riek ma ji ochayo,
kod ng’at maweyo timbe mabeyo, to timo richo.
Ng’at ma kamano, Ruoth Nyasaye ochanone tho marach miwuoro!
Ohala
29Tek ni ja ohala bedo maonge gi richho,
kata ni jaduka bedo maonge ketho.
Currently Selected:
Eklesiastikus 26: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.