Eklesiastikus 25
25
Ngeche moko
1Nitie gik moko adek ma chunya morgo,
kendo ma Nyasaye kaachiel gi ji bende morgo.
Gin: owete mowinjore, gi jogweng’ motimo osiep,
kod dichwo gi dhako moherore.
2To nitie ji tieng’ adek ma chunya osin-go nikech timbegi richo.
Gin: ng’ama odhier ma jasunga, gi jamwandu ma jamriambo,
kod jaduong’ mofuwo ma jaterre.
Joma oti
3Kane ok iyudo gimoro kane in rawera,
koro kiseti to ere kaka diyud gimoro?
4Paro mariek kod ngado rieko maber
owinjore moloyo gi ng’ama duong’ ma wiye oti lwar.
5Adier, paro mariek kod ng’ado rieko maber
owinjore chutho gi ng’ama duong’ ma wiye oti lwar.
6Rieko ma higni mang’eny kelo en osimbo mar joma dongo,
kendo luoro Ruoth Nyasaye ema miyogi duong’ madieri.
Ngeche apar
7Nitie ji ochiko ma aparo ni johawi,
kendo anyalo nyisou ng’at machielo ma timgi apar.
Gin: ng’ama ohero nyithinde,
ng’ama odak aming’a nyaka chop one kolo wasike,
8Dichwo man gi dhako mariek,
ng’ama ok pur gi dhiang’ kaachiel gi kanyna kanyakla,
ng’ama pok oketho gi lewe,
ng’ama ok ti ni ng’ama oloyo gi duong’,
9ng’ama nigi osiep maber,
ng’ama ji nyalo chikone itgi ka wuoyo,
10ng’ama nigi duong’ nikech rieko mane opuonjore.
11To kata kamano, onge ng’ato kuomgi
moloyo ng’ama oluoro Ruoth Nyasaye.
Luoro Ruoth Nyasaye loyo gik moko duto.
Chutho, onge gima wanyalo pimogo ng’ama oluoro Nyasaye. #25.12 ok yudre e kitepe moko mane ondik chon ahinya.
Mon
13Onge adhola maremo moloyo adhola mochwowo chuny,
kendo onge sadha moloyo sath dhako.
14Onge rach moloyo rach ma jasigu kelo, bende onge kuor moloyo kuor ma jasigu chulo.
15Onge kwiri maloyo kwich thuol, bende onge mirima maloyo mirimb jasigu.
16Daher dak gi sibuor kata gi ondiek mager,
moloyo dak gi dhako ma jasadha.
17Sadha loko kit dhako,
kendo miyo wang’e chalo gi wang’ ondiek.
18Ka chwore odhi chiemo ka owadgi, to nyaka chwore obed gi kuyo.
19Onge rach moloyo bedo gi dhako marach!
Mad oyud sand kaachiel gi joketho!
20Kaka tek ni jaduong’ moti idho got motimo kuoyo,
e kaka tek ni dichwo mamuol dak gi dhako ma ralep.
21Chia dhako kik wuondi,
kata kik iyie dhako wit riekoni.
22To dhako ema yuto, kendo konyo chuore gi gik moko.
23Dhako marach kelo kuyo, gi mieno wang’, kod chuny mosin.
Ka ng’ato nigi bede mayomyom gi chong’ monyosore,
to mano nyiso ni chiege ok miye mor.
24Dhako ema ne okwongo timo richo,
kendo waduto watho nikech en.
25Kaka ok inyal yie mondo pi ochuer achuera nono,
e kaka kik iye ni dhako marach mondo owuo awuoya kaka ohero.
26Ka ok odwar winjo chikni, to riembe.
Currently Selected:
Eklesiastikus 25: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.