Eklesiastikus 24
24
Rieko mar wuoyo
1Winjuru! Rieko hulo duong’ mare owuon,
kendo opwore kende e kind joge.
2Owuoyo e chokruok mar Nyasaye Maduong’ Moloyo.
Adier, opakore e nyim Nyasaye Manyalo Gik Moko Duto, kowacho niya,
3“Nawuok e dho Nyasaye Maduong’ Moloyo,
kendo naimo piny karumbi.
4Kar betna ne nie polo malo,
kendo koma mar duong’ ne nie siro mar bor polocha.
5Nawuotho kaluoro kor polo kenda,
kendo nawuotho e kud ataro.
6Nabedo gi loch kuom apaka mag nam, gi piny duto,
gi dhoudi duto kod ogendini duto.
7Namanyo kar yueyo kuondego duto,
kendo narango mondo ang’e ni piny mane madagurie hemba.
8Eka jachuech gik moko duto nopuonja,
konyisa kama hemba onego ogurie.
Nowachona ni, ‘Gur hembi ka Jakobo,
kendo ilok jo-Israel gikeni magi.
9Nochueya kapok piny ochakore, kendo pod anabedie nyaka chieng’.
10Natiyone e hema maler, kendo mano omiyo nagurora motegno Sayun.
11Nomiya yueyo e dala mane ohero,
kendo an gi loch Jerusalem kuno.
12Tienda osemoko ka yath e oganda moluor,
ma wuon gi en Ruoth Nyasaye, kendo ma gin mwandune owuon.
13Asedongo mabor ka yadh sida manie piny Lebanon, kendo ka yadh saipras manie got Hermon.
14Adier, asedongo maber mana ka yadh othith man Engedi,
kendo ka maua mabeyo man Jeriko,
kata ka yadh zeituni maber e pap,
kendo ka yath malombo wang’.
15Adum tik mamit ka yadh sinamon gi yadh akasia.
Adier, ang’ue ng’ar mana ka manemane moyier,
kendo ka yien moko madum mamit,
kata ka ich ubani madum mamit e hema maler.
16Aseyaro bedena ka yadh terebinth,
ka bedena beyo kendo long’o.
17An kaka yadh mzabibu man gi bede mabeyo,
kendo maua maga kelo duong’ gi pak mogundho. #24.18 ok yudre e kitepe moko mane ondik chon ahinya.
19Biuru ira un mugomba, mondo ucham olembena kaka uhero.
20Paro nyinga mit moloyo mor kich,
kendo bedo koda mit moloyo pet kich.
21Joma ochama nogomb mondo ochak ochama kendo,
kendo joma omadha nogomb mondo ochak omadha.
22Ng’ama owinjo wachna ok nobed gi wichkuot,
kendo ng’ama timo kaka achiko ok notim richo.’ ”
Rieko kod Chik
23Wechego duto gin weche miyudo e kitap singruok mar Nyasaye Maduong’ Moloyo.
Gin chike mane Musa omiyowa,
kendo gin mwandu mag dhout Jakobo. #24.24 ok yudre e kitepe moko mane ondik chon ahinya.
25Gikelo rieko mopong’ mana ka pi aora Pishon,
kata ka pi aora Tigris e ndalo ma cham chako chiekie,
26kendo ka pi aora Yufrate mopong’ moo oko,
kendo ka pi aora Jordan e ndalo keyo.
27Adier, gimiyo puonj mol mana ka pi aora Nael,
kendo ka pi aora Gihon e ndalo miponoe mzabibu.
28Onge ng’ama oseng’eyo rieko chutho,
chakre ng’ama nokwong chue nyaka ng’ama ogik,
29nikech paro rieko lach moloyo nam,
kendo chenone tut moloyo ataro.
30An to nabedo kaka ohula mibaro e aora, matero pi e puodho.
31Nawacho niya, “Adhi tero pi e puotha,
kakeyo pi e puothena mag maua.”
Gikanyono ohula mane asebaro nolokore aora,
to aora nogo nolokore nam.
32Abiro miyo puonj rieny ka chieng’
mondo ji one lerne kuonde duto.
33Puonjna nolandre kaka weche mokor,
mondo obed mwandu ni tienge duto mabiro.
34Ng’euru ni ne ok atiyo matek mondo an kenda ema ayud konyruok,
to ni mondo akony jogo duto madwaro rieko bende.
Currently Selected:
Eklesiastikus 24: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.