Eklesiastikus 23
23
1A Ruoth Nyasaye, ma Wuora kendo ma Wuon ngimana,
kik iweya e teko mar lewa,
nono to achwanyora nikech en.
2Mad rieko bedna chwat mamiyo arito parona gi gombona,
mondo onyisa kethona duto, ma ok oweyo kata achiel odong’.
3Ka ok kamano, to kethona gi richona dimedre,
kendo dapodhii e nyim wasika, kamiyogi thuolo mar nyiera.
4A Ruoth Nyasaye, ma Wuora kendo ma Wuon ngimana,
kik iwe abed jasunga,
5to resa kuom gombo maricho,
6mondo kik abed jawuoro gi jaterruok,
kendo kik achiwra ni gombo mokadho ndaga.
Kuong’ruok
7Nyithinda, winjuru gima adwaro puonjou,
nikech ng’ama omako puonjna ok nochwanyre.
8Jaketho chwanyore kuom wechene owuon koyenyo, kata kosungore.
9Kik ibed ng’at ma jakuong’re
kata majaluong nying Nyasaye kayiem nono.
10Kaka misumba mikwayo sa duto ok nyal bet ma ok ochwadi,
e kaka ng’ama kuong’ore sa duto, kendo luongo nying Nyasaye,
bende ok nyal bet maonge ketho.
11Ng’ama ohero kuong’ore sa duto nigi ketho mang’eny,
kendo ode ok nobed maonge chandruok.
Ka ok ochopo singruokne, to en gi ketho,
kendo kokuong’ore kayiem, to oketho moloyo.
Adier, kokuong’ore gi wach miriambo, to ok onyal bet maonge ketho,
kendo ode nopong’ gi masiche.
Weche mochido
12Nitie twak moko moting’o tho.
Onego kik winj twak ma kamago e dhout joka Jakobo.
Joma beyo baro mabor ni twak ma kamago,
nikech ok gihero nyumore e richo.
13Kik ibed kiwacho weche maonge luor kata mochido,
nikech weche ma kamago gin richo.
14Par wuoru gi meru kibet e kind joma dongo,
nono to wiyi owil, mi ilokri ka ng’ama ofuwo e kindgi,
kendo digomb ni onego ne kik nywoli, mi ikuong’ chieng’ nywolni.
15Ng’ama ong’iyo wacho weche maricho,
ok nyal weyo weche ma kamago, kata da odag aming’a machal nadi!
Timbe mochido
16Nitie tienge ariyo mag ji mamedo ameda richo kuom richo;
tieng’ mar adek to kelo mana kum kuome owuon.
17Nitie gombo moro maliel ka mach,
ma ok nyal rumo nyaka ochop e dwarone.
Ng’ama chiwo ringre duto ni terruok,
ok nyal weyo nyaka chop gombone wang’e ka mach.
Jaterruok chal gi ng’ama ok we chiemo moro amora,
kendo ok ool nyaka chop thone.
18Ng’ama oweyo chiege, to dhi dwaro mon mamoko,
wacho e chunye niya, “Ere ng’ama dinena?
Mudho oima; kor ot ogeng’a; onge ng’ama nena.
Ere gima daluor? Nyasaye Maduong’ Moloyo ok nopar richona.”
Ng’at ma kamano oluoro mana ni mondo kik ji nene,
19to ok ong’eyo ni wenge Ruoth Nyasaye rieny moloyo chieng’ nyadi gana gi gana
koneno timbe duto mag dhano,
kata mana mago motimo kuonde mopondo moloyo.
20Nong’eyo gik moko duto kane pok ochweyogi,
kendo osiko kong’eyogi bang’ chueyogi.
21Ng’at ma kamano noyud sand e dier dala, e nyim ji duto,
komake kama ne ok ogeno ni dimakee ngang’!
22Dhako moweyo chwore,
kendo onywolone nyathi ma wuowi gi dichwo moro nono,
bende noyud sand machal kamano.
23Mokwongo nosande nikech oketho chik Nyasaye Maduong’ Moloyo,
mar ariyo oketho ni chwore,
to mar adek nikech nomako ich gi dichwo ma ok chwore.
24Notere e nyim bura, kendo nonon wach nyithinde.
25Nyithinde nobed ka yien maonge tiendegi,
kendo en owuon nobed ka yath ma bedene ok nyag olemo.
26Nyinge nobed mokuong’, kendo wichkuot ma en-go ok norum.
27Joma odong’ bang’e nong’e ni
onge gima ber moloyo luoro Ruoth Nyasaye,
kendo onge gima mit moloyo mako chikene.
Currently Selected:
Eklesiastikus 23: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.