Eklesiastikus 22
22
Jasamuoyo
1Jasamuoyo chalo gi kidi motimo chieth,
kendo ji duto ochaye nikech wichkuot ma en-go.
2Adier, jasamuoyo chalo gi owuoyo,
ma ng’ama okwanyo to nyaka teng’ lwete.
Nyithindo maricho
3En wichkuot bedo wuon wuowi marach,
kendo ka ng’ato onywolo nyako, to owang’.
4Nyako mariek en mwandu ne chwore,
to nyako marach miyo wuon mare kuyo.
5Nyako ma achach kelo wichkuot ni jonywolne, kendo gikwede.
6Goyo koko e sa ma ok owinjore chalo gi bedo mamor e liel,
to chwado nyathi kinyise kethone en rieko e kinde moro amora. #22.7-8 ok yudre e kitepe moko mane ondik chon ahinya.
Rieko gi fuwo
9Puonjo ng’ama ofuwo chalo gi riwo mbalatak agulu gi dwogo,
kata chiewo ng’ama nindo omero.
10Adier, puonjo ng’ama ofuwo chalo gi puonjo ng’ama nur,
nikech kisetieko wuoyo, to openji ni, “En ang’o?”
11Ng’ama otho iywago nikech lerne olal,
to ng’ama ofuwo iywago nikech riekone olal.
Ng’ama ofuwo iywago moloyo ng’ama otho,
nikech ng’ama otho nigi yueyo, to ngima mar ng’ama ofuwo rach moloyo tho.
12Ng’ama otho iywago ndalo abiriyo,
to joketho gi joma ofuwo iywago ndalo duto mag ngimagi!
13Kik imed wuoyo mang’eny gi ng’ama ofuwo,
kata lim bende kik ilime,
to bedne motang’, nikech dipo ka okeloni chandruok,
kendo kisudo bute to onyalo miyo ibed mochido.
Kidwaro bedo gi kue,
kendo ka ok idwar mondo oketh chunyi gi fupe, to bed mabor kode.
14Ere gima pek moloyo lisasi?
Donge en mana gima iluongo ni, “Fuwo”?
15Bedo ni ng’ama ofuwo en ting’ mapek,
moloyo pek mar kuoyo kata mar chumbi kata mar nyinyo.
16Kaka siro mogur motegno e ot ok nyal tugore ka piny yiengni,
e kaka chuny mojing’ gi paro mariek bende ok nodog chien e ndalo tem.
17Chuny mopong’ gi paro mariek chalo gi lowo molang motegno e kor ot.
18Kaka chiel mochiel ewi pith ok nyal siro yamo,
e kaka chuny ng’ama ofuwo ok nyal siro luoro, ka parone owuon obwoge.
Osiep
19Kaka pi wang’ ng’ato chuer kohinyo wang’e, e kaka chuny dhano bende yudo lit ka gimoro ochwanye.
20Kaka winy ringo kibayogi gi kidi,
e kaka osiep kethore kiyanyo osiep.
21Kata kapo ni iseriembo osiepni gi tong’
to kik ipar ni osiepu kode okethore chuth,
nikech pod unyalo bedo osiepe kaka chon.
22Adier, kata ka usedhaw gi osiepni, to kik chunyi sandre ruok,
nikech pod unyalo chako winjore kendo.
To gik ma miyo osiep kethore chuth gin:
ayany gi achaye, gi hulo weche maling’ling’,
kod dhiyo ni osiepni apinypiny.
23Kapo ni jal modak buti en jachan, to we obed ng’ama ogeni,
eka achien enokonyi ka en bende oseyuto.
Kik iweye ka en gi chandruok,
mondo chieng’ moro in bende okonyi, koseyudo mwandu.
24Kaka tik gi iro telo ni mach,
e kaka ayany bende telo ni goruok.
25Ok analuor reso osiepna, kendo ok analokne ng’eya.
26To ka ayudo hinyruok nikech en,
to ji duto mowinjo wachno notang’ne.
Ritruok
27Mad abed gi ng’ama nyalo rito dhoga, ka jarit marito rangach,
kendo ka chudi modino dho ko,
mondo kik lewa mi apodhi.
Currently Selected:
Eklesiastikus 22: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.