Eklesiastikus 21
21
Richo mopogore opogore
1Wuoda, kapo ni isetimo richo, to kik imed timogi,
to kwa Nyasaye mondo oweni kuom richo misetimo.
2Tang’ ni richo mana kaka itang’ ni thuol,
nikech kisudo bute, to nyaka okayi!
Lak richo bith mana ka lak sibuor,
kendo ginyalo nego dhano.
3Ketho moro amora mikethogo chik
chal gi ligangla man gi dhoge ariyo mabith,
ma kong’adi, to dendi ok changi.
4Kaka kihondko kod timbe athwon ketho ut ruodhi,
e kaka sunga bende ketho mwandu ng’ato.
5Ka ng’ama odhier ywak,
to Nyasaye winjo ywakne, kendo ong’adone bura mak odeko.
6Ng’ama kecho konyis kethone, wuotho e yor joketho,
to ng’ama oluoro Nyasaye lokore
kendo weyo richone gi chunye duto.
7Ng’ama wuoyo mang’eny ong’ere kuonde duto,
to ng’ama riek ong’eyo kowacho gima ok ni kare.
8Kigero odi gi pesa miholo,
to ichalo gi ng’ama choko kite mag liende owuon.
9Chokruok mag joricho chalo gi pidh yugi,
ma bang’e liel mi lal nono.
10Yor joricho opie, to otero ji e piny jomotho.
Ng’ama riek gi ng’ama ofuwo
11Mako chik miyo ng’ato rito parone,
kendo luoro Nyasaye kelo rieko makare.
12Ok inyal puonjo ng’ama onge rieko,
to bende nitie rieko moro makelo mana sigu.
13Ng’eyo mar ng’ama riek medore mana kaka aora e ndalo koth,
kendo rieko mong’ado chalo gi soko makelo ngima.
14Chuny ng’ama ofuwo en kaka dapi mobarore; ok onyal kano rieko
15Ka ng’ama riek owinjo ngero moro maber,
to opako kaka ngerono ber,
kendo omedo weche moko mariek kuome.
Ng’ama ofuwo to kowinjo ngero ma kamano,
to onyiero kendo ok odewe kata matin.
16Chiko it ni weche ng’ama ofuwo, chalo gi ting’o misigo mapek.
Winjo rieko ng’ama riek to kelo mor.
17Ka ji nie chokruok, to gihero winjo weche ng’ama riek,
kendo giparo gima owacho ahinya.
18Rieko mar ng’ama ofuwo chalo gi od janam,
kendo wechene onyorore anyora.
19Puonjruok chalo ni ng’ama ofuwo kaka ratege
motuego luetene gi tiendene.
20Ng’ama ofuwo nyiero matek,
to ng’ama riek bwonjo mos.
21Puonjruok chalo ni ng’ama riek kaka thiwni mar dhahabu,
kendo kaka ronge manie bade korachwich.
22Ng’ama ofuwo mwomore amwoma e od ng’ato,
to ng’ama riek sudo kodembore.
23Ng’ama ofuwo limbo gi e dhoot,
to ng’ama ong’eyo chik rito mana gi oko.
24Chiko it e dhoot en tim marach,
kendo ng’ama riek dine wichkuot kotimo kamano.
25Ng’ama ofuwo nwoyo gik mowinjo anwoya,
to ng’ama riek paro weche duto kapok owuoyo.
26Ng’ama ofuwo wuoyo kapok oparo,.
27Ka jaricho okuong’o jasike, to okuong’ore mana en owuon,
to ng’ama riek paro motelo, eka owuoyo.
28Jakuoth bende ketho mana nyinge owuon,
kendo omiyo jogweng’gi duto sin kode.
Currently Selected:
Eklesiastikus 21: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.