Eklesiastikus 20
20
Ling’, kod wuoyo
1Ng’ato nyalo lwero wadgi e kinde ma ok owinjore;
ng’at machielo to ling’ aling’a, kendo mano nyiso ni oriek.
2Hulo ni ng’ato kethone, ber moloyo makone sadha.
3Ng’ama oyie gi kethone, nyalo resore kuom sand.
4Ng’ama temo ng’ado bura makare gi thwon,
chalo gi ng’ama bwoch magombo sero nyako.
5Ka ng’ato en jaling’, to ji kawe ka ng’ama riek;
ng’ama wuoyo mang’eny, to ji osin-go.
6Ng’ato nyalo ling’ nikech okia gima dowachi;
ng’at machielo to ling’ nikech orito sa monego olosie.
7Pile ng’ama riek ling’ nyaka chop sa monego olosie,
to ng’ama ofuwo loso kinde duto e sama ok owinjore.
8Ji ok ohero ng’ama wuoyo ahinya, kata ng’ama jaketre.
Weche machal to kwedore kendgi
9Kamoro masira nyalo kelo ni ng’ato ohala,
to hawi maber lokorene wang’.
10Nitie mich ma ok kel ohala ni ng’at machiwe,
to bende nitie mich ma kelone ohala nyadiriyo.
11Nitie pak madwoko ng’ato piny,
to bende nitie pak magolo ng’ato piny, ka ting’o malo.
12Kamoro ng’ato nyalo ng’iewo gimoro e nengo mayot,
to bang’e ochulo nengo gino nyadibiriyo.
13Ng’ama riek miyo ihere nikech wechene,
to mbola mar ng’ama ofuwo kadho mana nono.
14Mich ma ng’ama ofuwo ochiwo ok kel ohala,
nikech ogeno yudo gima oloyo michneno nyadibiriyo.
15Michne tin, to ayany mage thoth.
Oyawo dhoge malach ka ng’ama lando wach,
kendo koholi kawuono, to kiny odwaro ni mondo ichule.
Mano kaka en ng’ama ojogo ji!
16Ng’ama ofuwo wacho niya, “Onge ng’ama ohera.
Ji ok gona erokamano kuom timbena mabeyo,
17kendo joma chiemo koda wuoyo kuoma marach.”
To mano kaka ji duto nyiere anyiera pile!
Weche ma ok owinjore
18Ber mondo tiendi okier, moloyo kier gi lewi.
Mano bende e kaka jaricho podho apoya.
19Ng’ama onge luor chalo gi mbaka marach,
ma joma ofuwo nwoyo sa duto.
20Ngero ma ng’ama ofuwo ogoyo ok nyal miyo ji mor,
nikech ogoye e sa ma ok owinjore.
21Kamoro dhier nyalo mono ng’ato timo richo;
kamano kodhi nindo, to onge gima chando chunye.
22Kamoro ng’ato nyalo hinyore owuon nikech wichkuot manono,
kata nikech oluoro gima ng’ama ofuwo paro kuome.
23Wichkuot manono nyalo miyo ng’ato singre ni obiro timo ni osiepne gimoro,
mi olokre jasike kayiem nono.
Miriambo
24Miriambo en wichkuot maduong’ maketho nying ng’ato.
Joma ofuwo to wacho mana weche mag miriambo seche duto.
25Jakuo ber moloyo ng’ama riambo pile,
to giduto giniyud masira.
26Miriambo en achaye maduong’,
omiyo jamriambo nigi wichkuot mosiko.
Ng’ama riek
27Ka ng’ama riek wuoyo, to omedo yudo duong’,
nikech omiyo ruodhi bedo mamor kode.
28Ng’ama puro puodho noyud cham,
kendo ng’ama lombo ruodhi nowene kethone.
29Mich imo wang’ ng’ama riek,
kendo mono nyiso ng’ato kethone.
30Ka rieko opandi, kata ka mwandu oyiki e lowo,
to ere gima gikonyo?
31Ng’ama paro fupe ber moloyo ng’ama pando riekone.
Currently Selected:
Eklesiastikus 20: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.