Baruk 6
6
1Nebukadnezar ruodh Babulon biro darou katerou Babulon nikech richo ma usetimo e nyima, an Nyasaye. 2Ka usechopo Babulon, tyo unubed kuno kuom higni mang’eny madirom tienge abiriyo, to bang’e anadwoku e pinyu gi kue. 3E Babulon unune nyiseche molos gi fedha gi dhahabu kod bawo, ma ji oting’oe gokgi, kendo ma joma ok oyie kuoma oluoro ahinya. 4Omiyo, nyaka ubed motang’. Kik uluw timbe jopinje mamokogo, 5kendo ka uneno ka oganda mar joma lamo nyisechego oting’ogi, kawuotho e dala, to kik uluor nyisechegigo. To moloyo, onego uwach e chunyu niya, “A Ruoth Nyasaye ma Nyasachwa, in ema onego walami.” 6Onego uwach kamano nikech malaikana ni kodu ka rito ngimau.
7Nyisechego obaw gi dhahabu kod fedha, kendo kata obedo ni jatheth molony oserudo lewgi mapoth, to gin mana gik mag miriambo ma ok nyal wuoyo. 8Joma ok oyie kuomago loso osimbo mag dhahabu gi mag fedha, ma gisidho e wi nyisechegi ka gima gin nyiri mohero bisruok. 9Kamoro jodoloo kwalo dhahabu gi fedha mag nyisechegi mondo gikonyrego giwegi, kata mondo gichiwgi ni mon ma jochode matiyo e Hekalu maggi. 10Girwako nyiseche molos gi fedha gi dhahabu, kod bawogo gi lewni, mamiyo gichalo joma ngima, to kata obedo ni nyisechego orwak gi lewni kamano, to ok ginyal siro nyal kata thuth mondo kik chamgi. 11Buru mag hekalu mamakogi mang’eny bende nyaka ywenigi ayweya oko e wengengi. 12Nyasaye moro ma kamono nyalo bedo gii luth e lwete kochalo gi jang’ad bura, to oonge gi teko mar ng’ado ni ng’ama okethone buch tho, 13moro to nyalo bedo gi ligangla kata le e lwete makorachwich, to oonge gi teko mar siro jolweny kata riembo jokuo. 14Mago duto nyiso ratiro ni ok gin nyiseche kata matin, emomiyo kik uluorgi.
15Nyisechego obet e hekalu to gin gik manono mana ka agulu mobarore. 16Wengegi opong’ gi buru ma tiend joma donjo e hekalu dumo kuomgi. 17Kaka iloro dhoudi duto no ng’ama oseng’adne buch tho nikech oketho ni ruoth, e kaka jodolo loro dhout hekalu mag nyisechegi gi kifunde kod lodi nikech giluor ni dipo ka jokuo okwalo nyisechegigo! 18Gimoko teyni mang’eny ni nyisechegi moloyo ma gin giwegi gikonyorego, to nyisechego ok nyal neno kata mana taya achiel! 19Gichalo gi achieel kuom yien mag hekalu ma bie chamo, kendo ngero wacho ni, chunygi ocham, nikech bie moa e lowo chamogi kaachiel gi lepgi ka gikia. 20Iro mawuok e hekalu chido wengegi, 21kendo oliktiga gi opija kod winy mamoko piyo e wigi kod dendgi duto, kendo pekni bende chikore kuomgi. 22Mago duto nyiso ni ok gin nyiseche ngang’; e momiyo kik uluorgi.
23Dhahabu molosgigo ber chutho, to ka onge ng’ama yweyo dhahabugo, to nyisechego ok nyal rieny ngang. Kata mana e kinde mane ithedhogie gi mach, ne ok giwinj rem. 24Bende ne ong’iewgi gi pesa mathoth moloyo, to gionge kata mana gi muya ma ginyalo yueyogo ngang’. 25Ji ting’o gi e gokgi, nimar ok ginyal wuotho, kendo mano nyiso kaka gin gik manono. Ka gipodho, to joma lamogi yudo wichkuot kuom chungogi. 26To kosechunggi, to ok ginyal sudo giwegi, kendo kya gileng’ore to ok ginyal chung’ tir kendgi. Chiwo mimiyogi chalo gi chiwo mimiyo ng’ama otho. 27Jodolo kawo gik motimnigigo liswa mondo ging’iew gilok pesa kendo gikonyrego. Mondgi bende kawo lemo maduong’ mag chiayo motimgo liswa, githolo, to ok gimi jochan kata joma odhier gimoro. Mon man gi boke, kod ma manyuru ok oluor mulo nyisechego. 28Gigo duto nyisou ni ok gin nyiseche kata matin; omiyoo kik uluorgi.
29Chutho, ere kaka diluong gik molos gi fedha gi dhahabu kod bawo ni nyiseche, ka mon ema golonigi lisweche? 30Jodolo manie hekalu maggi bet abeta piny ka lepgi oyiech kendo ka yie wigi kod yie tikgi oliel, kendo ka wigi ni nono, 31kendo gigoyo nduru e nyim nyisechegi mana kaka ji timo ka gin e liel. 32Jodolo kawo lep nyisechego miyo mondgi gi nyithindgi. 33Kata gitimo ni nyisechegi maber kata marach, to gionge gi teko mar chuli ber kata rach. Gionge gi teko mar keto ruodhi e kombegi, kata gologi. 34Teko mar pogo mwandu kata pesa bende giongego. Ka ng’ato ok ochopo singruok mane otimonigi, to ok ginyal timone gimoro. 35Ok ginyal reso ng’ato e tho, kata reso ng’ama nyap kuom ng’ama tek, 36kata miyo muofu neno, kata reso ng’ato e chandruok, 37kata kecho chi liel, kata timo ng’wono ni nyathi ma kich. 38Nyiseche molos gi bawo kendo obaw gi dhahabu kod fedha, chalo gi kite mogor e kor got, kendo joma lamogi noyud wichkuot, 39nikech ere kaka ng’ato nyalo paro kata wacho ni gin nyiseche.
40Kata mana jo-Babulon giwegi ochayo nyisechegi, nikech ka giyudo ng’ama momo ka ok nyal wuoyo to gitere ir Bel ma nyasachgi ka gikwaye mondo omiye owuo, ka giwuondore ni onyalo winjogi. 41Ok ginyal neno ni gitimo gima ofuwo, ma mondo omi giwe nyisechegi, nikech gin giwegi gionge gi rieko. 42Mon motueyo tonde e nungogi bet e dir yore ka wang’o mihudhi ka ubani. 43Ka ng’at moro makadho kanyo okawo achiel kuom mon-go moterorego, to dhakono goyo ni dhako wadgi mobet bute siboi kojare ni en ok dichwo oyiere, kendo ok ochod tond nungone! 44Gik moko duto mogamore gi nyisechego gin mana miriambo lilo. Ere kaka ng’ato nyalo paro kata wacho ni gigo gin nyiseche?
45Jopa bawo gi jothedh dhahabu ema ne olosogi, kendo kitgi gin kido ma fundego ema oyiero. 46Ka kata mana joma losogi ema ok nyal dak aming’a, koro ere kaka gik ma giloso nyalo bedo nyiseche? 47Gik ma gipuonjo nyithindgi gin mana miriambo gi wichkuot. 48Ka lweny kata masira owuok, to jodolo ema nyaka pim wach kaka digipondi gi nyisechegi. 49Koro ere kaka ng’ato nyalo kia ni gik ma ok nyal resore e lweny kata e masiche ok gin nyiseche? 50Chieng’ moro ji nong’e ni gik molos gi bawo kendo obaw gi dhahabu kod fedhago gin mana gik manono. Adier, ogendini duto gi ruodhi duto nong’e ni gigo ok gin nyiseche, to gin mana gik ma dhano oloso, maonge gi teko kaka Nyasaye nigo. 51Bende nitie ng’ama pok ong’eyo ni gigo ok gin nyiseche?
52Nyiseche ma kamano ok nyal keto ruoth e piny moro, kata miyo ji koth, kata chano wechegi giwegi, kata konyo ng’ato motimne marach. 53Gin mana kaka agak mahuyo e kind polo gi piny ma ok nyal konyore. 54Ka mach omuoch e wi hekalu mag nyiseche mag bawo mobaw gi dhahabu kata gi fedhago, to jodologi ringo mondo oresre. Nyiseche wegi to dong’ adong’a ka wang’ mana ka yiend hekalu. 55Ok ginyal siro ruoth moro, kata wasigu bende ok ginyal kedogo. 56Kuom mano, ere kaka ng’ato nyalo yie kata paro ni gin nyiseche?
57Nyiseche mag bawo gi dhahabu kata gi fedhago ok nyal siro jokuo kata jomecho. Jogo oloyogi gi teko, kendo nyalo mayogi dhahabu gi fedha man kuomgi, mi lal gi lewni ma girwako, nikech gionge gi teko mar konyruok. 58Ruoth manyiso tekone, kata dak makonyo tich ot, kata dhoot marito gik man ei ot, kata sich bawo manie od ruoth oloyo nyisechegi. 59Chieng’ gi due kod sulue marieny winjo wach ka gitiyo tich momigi. 60Polo bende ka mil, to en gima lich neno. Yamo bende kudho e pinje duto; 61boche polo bende winjo wach Nyasaye ka gikadho e wi pije duto; mach moor koa e polo mondo owang’ gode gi bunge bende timo kaka Nyasaye ochiko. 62To nyisechego ok nyal romo gi gigo duto kuom ber kata kuom teko. 63Omiyo onge ng’ama nyalo paro kata wacho ni gin nyiseche, nikech gionge gi teko mar ng’ado bura, kata mar timo gima ber ni ji. 64Kuom mano, kik uluorgi nimar ung’eyo ni ok gin nyiseche.
65Ok ginyal kuong’o ruodhi kata guedhogi. 66Bende ok ginyal keto ni ji ranyisi e polo, kata rieny ka chieng’, kata chiwo ler ka due. 67Kata mana ondiegi mae thim oloyogi, nimar ondiegi nyalo geng’ore ka ritore giwegi. 68Onge ranyisi kata matin ma nyiso ni gigo gin nyiseche, omiyo kik uluorgi.
69Nyiseche mag bawo mobaw gi dhahabu gi fedhagi chalo gi gima oket e puoth budho mondo obwog le to ok kony gimoro. 70Gichalo gi bung kudho manie puodho ma winyo awinya piyoe, kata ka ringre ng’ama otho mowit oko e mudho. 71Lewni maratiglo gi mag bafta maber matow e dendgi nyisou ni ok gin nyiseche. To achien bie nochamgi gin giwegi, kendo ji duto nochagi. 72Ber bedo ng’ama kare maonge gi nyiseche manono. Ng’ama kamano ok nobed gi wichkuot nyaka chieng.
Currently Selected:
Baruk 6: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.