Baruk 4
4
1Rieko en kitabu, mondikie chike Nyasaye, mosiko nyaka chieng’.
Adier, en chik Nyasaye, mosiko nyaka chieng’.
Joma omake siko ka ngima, to joma ojwang’e tho.
2Un joka Jakobo, duoguru ire mondo umake, kendo uwuoth e lerne,
3mondo kik uwe jopinje mamoko kaw duong’ ma un-go.
4Wan jo-Israel, wan johawi,
nimar Nyasaye osehulonwa gik malong’one.
Gik ma jo-Jerusalem ywago, kod gik ma gigeno yudo
5Un joga, jiwuru chunyu,
nikech un ema umiyo nying Israel osiko.
6Ogendini mamoko nong’iewou,
to Nyasaye ne ok oyienigi mondo otieku, urum.
Nukwinyo Nyasaye, emomiyo nochiwou e lwet wasiku.
7Adier, kane utimo lisweche ni jochiende ma ok Nyasaye,
to nukwinyo Jachwechu.
8Wiu ne owil gi Nyasaye mochwere mane opidhou,
kendo numiyo Jerusalem mane opirou mirima.
9Kane Jerusalem oneno ka Nyasaye sandou, nowacho niya,
“Winjuru, Un joma odak e alwora mar Sayun.
Nyasaye osekelona mirima mager.
10Naneno kodar yawuota gi nyiga,
ka kum ma Nyasaye mochwere okumogigo.
11Napidhogi kamor,
to kane aneno kidarogi, naywak kendo nakuyo.
12Kik ugona siboi nikech wach ma asewachono,
nimar an chi liel ma joge mang’eny osenegi!
Athagora ka adong’ kenda,
nikech richo mag nyithinda mane oweyo Chik Nyasaye.
13Ne ok gihero ng’eyo wechene, kata luwo yorene, kata mako chikene,
kata yie mondo opuonjgi adierane.
14Un joma odak e aluora mar Sayun, suduru machiegni,
mondo aparnu kaka nodar yawuota gi nyiga,
mane en bura mane Nyasaye mochwere ong’adonigi.
15Nomiyo oganda moro modak mabor omonjogi.
Ne en oganda makoch kendo mawuoyo gi dhok ma ok ging’eyo.
Ne ok gimiyo jomoti luor, kendo ne ok ging’wono ni nyithindo.
16Ne gimaya joga, kendo ne giweya kar kenda
mana ka chi liel moma yawuote gi nyige mohero.
17Koro ere kaka an dakonyu?
18Ng’ama ne okelo masichegi kende ema nyalo resou e lwet wasiku!
19Dhiuru nyithinda, dhiuru! An to nyaka adong’ kenda!
20Aselonyo lewni mag kue, mi arwako lep kuecho,
kendo anaywagi ni Nyasaye mochwere ndalo duto mag ngimana.
21Nyithinda, jiwuru chunyu, uywag ni Nyasaye.
En ema enoresu e lwet wasiku machikou gi thwon.
22Ageno ni Nyasaye mochwere biro resou,
kendo amor kaparo resruok mabiro bironu piyopiyo
koa kuom Nyasaye Maler ma Jawaru kendo ma Nyasaye mochwere.
23Kane aneno kudhi, naywak kendo nakuyo,
to anabed gi mor ka Nyasaye oduokonau.
24Kaka joma odak e alwora mar Sayun osenenoo kaka idarou,
e kaka piyopiyo nono ginine kaka Nyasaye mochwere resou,
kobiro gi duong malich.
25Nyithinda, beduru modhil gi sand ma Nyasaye kelonu.
Wasigu osesandou, to piyopiyo nono unune ka ologi,
kendo unugang tiendeu e tokgi.
26Nyithinda ma ahero oseluwo yore maricho,
kisembogi ka jamni ma wasigu opeyo.
27Nyithinda, jiwuru chunyu, uywag ni Nyasaye.
En ema nokelonu masiche, to obiro parou.
28Chon nuweyo yiero Nyasaye, to koro lokuru chunyu mondo udware,
kutimo kinda nyadipar moloyo.
29Nyasaye mane okelonu masichegi,
ema noresu, kendo nomiu mor mosiko.”
30In Jerusalem, jiw chunyi,
nikech ng’ama ne oluongi gi nyingi mondo ibed mare, ema noresi.
31Ji duto mane otimoni marach,
kendo mane ogoyoni siboi kipodho, noyud chandruok.
32Adier, chandruok nomak mier ma nyithindi nobedoe wasumbini,
kendo dala mane okawo yawuoti, noyud thagruok.
33Dala mane obedo mamor kipodho, kagoyoni siboi kuom chandruokni,
noywag ka en owuon opodho.
34Anariemb joge mang’eny ma osungorego,
kendo nyadhi ma en-go nolokre kuyo,
35nikech Nyasaye mochwere nool kuome mach ma nowang’e nyaka chieng’,
kendo jochiende noda kuome mosiko.
36In Jerusalem, lok wang’i yo wuokchieng’,
mondo ine mor mabironi koa kuom Nyasaye.
37Neye kaka yawuoti mane ineno kaa, koro duogo!
Ruoth Nyasaye osegolo chik,
omiyo giduogo miechgi ka gia yo wuokchieng’ gi yo podho chieng’,
ka gimor ahinya nikech duong’ mar Nyasaye.
Currently Selected:
Baruk 4: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.