Baruk 3
3
1A Ruoth Nyasaye Manyalo Gik Moko Duto, kendo ma Ruodh Israel, waywakni ka chunywa chandore kendo ka luoro omakowa. 2A Ruoth Nyasaye, winjwa kendo ikechwa, nikech wasekethoni. 3In ibet e komi mar duong’ mosiko, to wan walal pile. 4A Ruoth Nyasaye Manyalo Gik Moko Duto, kendo ma ruodh Israel, winj ywakwa, wan jo-Israel motho, kendo ma yawuot joma ne okethoni, kodagi winjo dwondi, in Ruoth Nyasaye ma Nyasachgi. Mano emomiyo masichegi osemakowa. 5Kik ipar richo kwerewa, to moloyo par tekoni maduong’ kod nyingi maler. 6A Ruoth Nyasaye, in e Ruoth Nyasaye ma Nyasachwa adier. Wagombo miyi duong’, 7nikech imiyo chunywa oluori, kijiwowa mondo waluong nyingi. Wagombo miyi duong’ e piny mwadakie kosedarwani, nimar waseweyo richo duto mag kwerewa mane okethoni. 8Eri, pod wasiko e piny mane iterowa mikeyowae ka gik mijokgo, kendo mokuong’, kendo misando, nikech richo duto mane kwerewa otimo ka giweyi, in Ruoth Nyasaye ma Nyasachwa.
Rieko en mich moyiedh ni jo-Israel
9Un jo-Israel, winjuru chike makelo ngima.
Chikuru itu, mondo upuonjru rieko.
10Un jo-Israel, ang’o momiyo udak e piny wasiku,
kendo ubedo moti e piny ma ok maru?
Uchalo joma nigi chola nikech udak gi jomotho,
11kendo ikwanou ka joma osedhi e piny jomotho!
12Gigo obet kamano nikech useweyo soko mar rieko.
13Ka dine uwuothi e yor Nyasaye, to dine ubedo gi kue mosiko.
14Omiyo, puonjreuru mondo ung’e kama rieko gi teko kod winjo wach, yudoree,
eka unung’e kama unyalo yudoe higni mang’eny
gi ngima, gi ler ma menyonu yo, kod kue.
15To ere ng’ama osenwang’o kama rieko odakie,
kata ma osedonjo kama rieko okanoe mwandune?
16Eke joma yande ruodhi mag ogendini?
Koso ere joma yande jodwar mager,
17kendo ma yande chiko winy ma huyo e kor polo?
Eke joma yande choko mwandu ma ok kwan mag fedha kod dhahabu,
ma gin gik ma ji ogeno kuomgi.
18Koso eke joma yande thedho fedha gi rieko mong’ith,
kendo mane tijegi ji wuoro?
19Giselal giduto ka gidhi e piny jomotho,
kendo jomoko osekawo karegi.
20Tieng’ manyien osenywol modak e piny,
to ne ok gipuonjore rieko, nikech ne ok gifwenyo yorene.
21Nyithindgi bende ne ok omake, to ne gibarone mabor.
22Ne ok onwang’ rieko e piny Kanaan,
kendo ne ok onene e piny Teman.
23Jo-Hagar mane dwaro rieko mar pinyni gi joohala mag Midian gi Tema,
gi jochuog sigendini kod joma ohero puonjruok, ok oseyudo yo materogi e rieko.
Adier, ne ok gifwenyo yo ma rieko luwo.
24Un jo-Israel, mano kaka kar dak mar Nyasaye duong’ ahinya!
Mano kaka lochne olandore malach!
25Lachne gi borne modhi malo ok nyal pim!
26Chon, joma rabede marahuma ne odak e piny.
Ne gin joma boyo ahinya, kendo ne gilony kuom kedo lweny,
27to Nyasaye ne ok oyierogi mondo gibed joge,
kendo ne ok ofwenyonigi yor rieko.
28Kuom mano, ne gilal nikech fupgi,
nimar ne gionge gi rieko.
29Ere ng’ama oseidho modhi e polo mondo omak rieko,
kogole e rumbi, kendo obiro kode piny?
30Koso ere ng’ama oseng’ado nam moyude,
kendo ong’iewe gi dhahabu maber moloyo, moduogo kode?
31Ooyo! Onge ng’ama ong’eyo yo madhi ire,
kendo onge ng’ama nyalo fwenyo yo moluwo.
32To Nyasaye, mong’eyo gik moko duto,
ema osemake gi riekone owuon.
En ema oseguro piny motegno nyaka chieng’,
koketoe le mathoth man gi tiende ang’wen.
33Ka ooro ler, to ler dhi kuma ooree,
kendo koluonge mondo oduogi, to owinje kokirni.
34Sulue rieny e sa ma Nyasaye oketonigi, ka gimor,
35kendo koluongogi to gidwoke ni “Wantie”,
nikech gihero rieny ni Jachuechgi.
36En e Nyasachgi, kendo onge moro marom kode.
37Ong’eyo yore rieko duto,
kendo nopuonjogi jo-Israel ma nyikwa Jakobo,
ma gin jotichne mohero moloyo.
Kamano e kaka nomiyo rieko othinyore e piny, modak kod ji.
Currently Selected:
Baruk 3: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.