Baruk 2
2
1Kuom mano, Ruoth Nyasaye nosandowa kaachiel gi jong’ad buchewa mane rito Israel, gi ruodhi mawa, gi jotendwa kaachiel gi jo-Israel kod jo-Juda duto, kaluwore gi siem mane osiemwago. 2Gima ne otimore Jerusalem, pok otimore kamoro amora e piny duto. Kamano gik moko duto mane ondik e Chik. Musa nochopo kare. 3Nochunwa chamo ring yawuotwa gi nyiwa. 4Bende Ruoth Nyasaye nochiwowa e lwet jopinje duto molworowa, kokeyowa e kind ogendini duto mochayowa kendo mabaronwa mabor. 5Kar bedo jotelo, to ne walokore wasumbini, nikech ne waketho ni Ruoth Nyasaye ma Nyasachwa, ka wadagi winjo dwonde.
6Ruoth Nyasaye ma Nyasachwa ni kare, to wan kaachiel gi kwerewa wawinjore gi wichkuot ma wan-go ndalogi. 7Masiche duto mane Ruoth Nyasaye owacho chon ni nomakwa, koro osemakowa. 8Kata kamano, ok wasetemo mondo wami Ruoth Nyasaye obednwa mang’won, ka ng’ato ka ng’ato kuomwa weyo gombo maricho manie chunye. 9Emomiyo Ruoth Nyasaye norito nyaka ndalo mowinjore ochopo, eka nokelonwa masiche, nimar en Nyasaye makare. Kata obedo nonyisowa gik monego watim, 10to ne ok wawinjo dwonde, kata luwo chike mane oketonwa bende ne ok waluwo.
Lemo
11A Ruoth Nyasaye ma Ruodh Israel, nigolo jogi e piny Misri gi lwedo matek kod ranyisi gi honni gi teko maduong’, kirieyo badi, ni mondo jogi obed gi duong’ mosiko nyaka chil kawuono. 12A Ruoth Nyasaye ma Nyasachwa, ne waketho, kendo ne watimo richo ka waketho chikeni duto. 13Yie iwe medo timo kodwa mirima, nikech koro wadong’ mana ji manok e kind ogendini misekeyowae. 14A Ruoth Nyasaye, winj lemo ma wakwayigo, kendo ireswa mondo in iwuon iyud pwoch, kimiyo joma ne oterowa e twech timonwa ng’wono, 15mondo piny ngima ong’e ni in e Ruoth Nyasaye ma Nyasachwa, nikech Israel gi nyikwaye iluongo gi nyingi. 16A Ruoth Nyasaye, ng’iwa gie kar dakni maler, kiparowa, kendo kichikonwa iti kendo kiwinjowa. 17A Ruoth Nyasaye, yie ing’i kendo ing’e ni jomotho manie liete ma chunygi osewuok e ringregi, ok e joma miyi duong’ kendo pako adierani, in Ruoth Nyasaye. 18A Ruoth Nyasaye, ng’ama chandruok oloyo, mawuotho kokulo wiye, maonge gii teko, ma wengene otarore kendo ma kech kayo, e ng’ama miyi duong’, kendo ema pako adierani.
19A Ruoth Nyasaye ma Nyasachwa, ka wakwayo mondo ikechwa, to ok wageno kuom timbe mabeyo mag kwerewa gi mag ruodhi mawa. 20Mirima mager osemaki kodwa mana kaka nimiyo jotichni ma jonabi owacho niya, 21“Ruoth Nyasaye owacho kama: ‘Kuluru wiu piny, kendo yieuru gi ruodh babulon, eka unusik e piny mane amiyo kwereu. 22To ka ok uwinjo wach Ruoth Nyasaye, mi udagi bedo e bwo ruodh Babulon, 23to anami mahu mag mor gi ilo kod dwond weg kisera gi dwond miehni ling’ e mier mag Juda kendo e yore mag Jerusalem, kendo piny duto nolokre thim ma onge joma odakie’.” 24To ne ok wawinjo wachni mondo wayie gi ruodh Babulon, kendo mano omiyo wach mane imiyo jotichni ma jonabi okoroo ochopo kare, nikech ne giwacho ni choke mag ruodhi mawa gi mag kwerewa nogol kuonde ma giyueyoe. 25Adier, ne obolgi e lela mondo chieng’ ochamgi godiechieng’, to koyo ochamgi gotieno. Jogo notho gi tho malit ka kech gi lweny kod tuoche negogi. 26Kuom mano, isemiyo Ot miluongo gi nyingini obedo kaka ochalo kawuononi, nikech richo mag dhood Israel gi dhood Juda.
27Kata kamano, A Ruoth Nyasaye ma Nyasachwa, gima ne itimonwa owinjore gi berni kod ng’wononi mathoth, 28mana kaka nimiyo Musa jatichni ochikowa, chieng’ mane iwachone mondo ondik Chikni e nyim jo-Israel. Ne iwacho niya, 29“Ka ok uwinjo wachna, to ogandau maduong’ ma ok nyal kwanni nodog chien nyaka nodong’ mana joma nok kende e kind ogendini ma anakegie. 30Ang’eyo maber ni jogi ok nowinj wachna, nikech wigi tek moloyo, to ka osedargi motergi e piny moro mabor, to ginipar wechegi duto, 31kendo giniyie ni an e ruoth Nyasaye ma Nyasachgi, mi anamigi chuny moyie, kod it mawinjo wach. 32Ginimiya duong’ e piny ma gidakie kosedargi, kendo ginichak gipar nyinga. 33Ok ginimed timo wichteko, to giniwe timbegi maricho, ka giparo gima ne otimore ni kweregi mane timo richo e nyima, an Ruoth Nyasaye. 34Bang’e anadwokgi e piny mane asingora kakuong’ora ni anami kweregi ma Ibrahim gi Isaka kod Jakobo, kendo ginibed gi loch e pinyno. Anami ginya, kendo ok ginichak gidog chien. 35Anatim kodgi singruok mosiko, kendo anabed Nyasachgi, to gin ginibed joga, kendo ok nachak ariemb joga ma jo-Israel e piny ma asemiyogi.”
Currently Selected:
Baruk 2: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.