Baruk 1
1
Baruk gi jo Yahudi man Babulon
1Ma e kitabu mane Baruk wuod Neraya, wuod Maseya, wuod Zedekia, wuod Hasadia, ma wuod Hilkia ondiko Babulon, 2chieng’ due abiriyo, e higa mar abich bang’ kinde mane jo-Babulon omakoe Jerusalem mi owang’o.
3Baruk nosomo kitabuni matek ni Jekonia, wuod Jehoyakim, ruodh Juda, gi ji duto mane obiro mondo owinj weche mondikie. 4Ne gin joma nigi dongo, gi yawuot ruoth, gi jodongo mamoko, kod ji duto matindo gi madongo te, mane odak Babulon but aora Sud. 5Kane gisewinjo wechegi, ne gilemo e nyim Ruoth Nyasaye ka giywak kendo ka gitueyo chiemo. 6Bang’e ne gichoko pesa, ka ng’ato ka ng’ato golo kar nyalone, 7mi gitero pesago Jerusalem mondo gikonygo jadolo maduong’ ma nyinge Jehoyakim wuod Hilkia ma wuod Shalum, gi jodolo mamoko, kaachiel gi ji duto mane ni Jerusalem. 8Baruk noyudo gik lemo mag Od Ruoth Nyasaye mane oyaki, mi odwokogi e piny Juda chieng’ due apar, due mar Sivan. Ne gin gik fedha mane Zedekia wuod Josia ruodh Juda oloso, 9kane Nebukadnezar ruodh Babulon ogolo Jekonia Jerusalem, motero Babulon kaachiel gi jodongo gi jotheth gi joma nigi dongo kod ji mamoko duto.
10Joma nochoko pesago nondiko barua niya: Waoronu pesagi mondo uchulgo lisweche miwang’o pep, gi lisweche mag golo richo, kod mag ubani. Losuru lisweche mag mogo mondo otim e kendo-mar-misango mar Ruoth Nyasaye ma Nyasachwa, 11kendo kwauru Ruoth Nyasaye mondo Nebukadnezar ruodh Babulon gi wuode Belshazar odag aming’a, kendo mondo ndalo ma gin-go e pinyka obed mang’eny ma ok kwan. 12Bende kwauru Ruoth Nyasaye mondo omiwa teko gi rieko makare mondo Nebukadnezar ruodh Babulon gi wuode Belshazar orit ngimawa maber, kendo mondo gibed mamor kodwa, kwatiyonigi kuom higni mang’eny. 13Wan bende kwanwauru Ruoth Nyasaye ma Nyasachwa, nikech wasekethone, kendo ok oseweyonwa mak osandowa gi sand maduong’ nyaka chil kawuono. 14To mogik, nyaka usom kitabu mwaoronuni ratiro ka uhulo richou e Od Ruoth Nyasaye chieng’ sawo, kendo e ndalo ma utimoe chokruok maduong’. 15Nyaka uwach kama:
Hulo richo
Ruoth Nyasaye ma Nyasachwa ni kare, to wan wawinjore gi wichkuot ma wan-go ndalogi, nikech chakre kwerewa, wan jo Juda, gi jo-Jerusalem, 16kaachiel gi ruodhi mawa, gi jodongwa, kod jodolowa, 17wasebedo kwaketho e nyim Ruoth Nyasaye, 18ka watamore winjo wachne, kendo ok wachik itwa ni Ruoth Nyasachwa ka nyisowa ni mondo waluw chike mane Ruoth Nyasaye oseikonwa. 19Chakre chieng’ mane Ruoth Nyasaye ogolo kwerewa e piny Misri nyaka koroni, ok wasewinjo Ruoth Nyasachwa, to wasejwang’e ka watamore chiko itwa ni wachne. 20Kuom mano, masiche gi kuong’ osemakowa, kendo osiko komakowa pile, mana kaka Nyasaye nomiyo Musa jatichne okoro, chieng’ mane ogolo kwerewa e piny Misri mondo omiwa piny maleny man gi chak kod mor kich. 21Kata obedo ni Ruoth Nyasachwa nooronwa jonabi mage gi weche mang’eny, to ne ok wawinjo dwonde, 22to waduto waseluwo gombo maricho mag chunywa, ka watiyo ni nyiseche moko manono, kendo ka watimo richo e nyim Ruoth Nyasachwa.
Currently Selected:
Baruk 1: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.